الىس اۋىلدارداعى, قالاداعى مۇقتاجدارعا, سونىڭ ىشىندە مۇمكىندىگى شەكتەۋلى جاندارعا ءدارى-دارمەكتى ەندى درون تاسىماق. ونىڭ ەرەكشەلىگى جەدەل جەتكىزەتىنىندە بولىپ تۇر. مۇنداي جاعدايعا عىلىمنىڭ جاڭالىعى, وتاندىق عالىمدارىمىزدىڭ جەتىستىگى جەتكىزبەك.
ق.ساتباەۆ اتىنداعى قازاق ۇلتتىق زەرتتەۋ ۋنيۆەرسيتەتىنىڭ زەرتتەۋشىلەرى مۇمكىندىگى شەكتەۋلى جاندارعا ءدارى-دارمەكتى جىلدام جەتكىزۋ ءۇشىن گەكساكوپتەر جاساپ شىعاردى. از قاباتتى ۇيلەر مەن الىس اۋىلدارعا ءدارى-دارمەك جەتكىزۋگە ارنالعان ۇشقىشسىز ۇشاتىن اپپارات اتالعان ۋنيۆەرسيتەتتىڭ «ەلەكتروتەحنيكا, تەلكوممۋنيكاتسيالار جانە عارىشتىق تەحنولوگيالار» كافەدراسىندا قۇراستىرىلدى.
جوبا جەتەكشىسى, اتالعان جوعارى وقۋ ورنىنىڭ قاۋىمداسقان پروفەسسورى ابدۋمەجيت داراەۆتىڭ ايتۋىنشا, ماگيسترانتتار مەن ستۋدەنتتەر توبى قاجەت جاعدايدا دارىگەرلەردىڭ جىلدام كومەك كورسەتۋىنە سەپتەسەتىن, قولايسىز اۋا رايىندا دا جول تالعاماي, جەدەل مەديتسينالىق كومەك كورسەتە الاتىن قۇرىلعى جاساۋدى وزدەرىنە ماقسات ەتىپ قويعان.
– ءبىز شالعاي, قاتىناۋعا قيىن سوعاتىن جەرلەرگە ءدارى-دارمەكتى جەتكىزەتىن ۇشقىشسىز ۇشۋ اپپاراتتارىن جاساۋعا قاجەتتى گرانت ۇتىپ الدىق. وسى جوبانى ىسكە اسىرۋعا ۋنيۆەرسيتەتىمىزدە وقيتىن باكالاۆرياتتار مەن ماگيسترانتتار اتسالىسىپ جاتىر. بۇل عىلىمي جۇمىسپەن جارتى جىلداي جۇمىس ىستەپ كەلەمىز. قازىرگى ۋاقىتتا ۇشاقسىز ۇشۋ اپپاراتى قولدانىسقا دايىن دەسە بولادى. قۇرىلعىنى ۋنيۆەرسيتەت اۋماعىندا سىناقتان وتكىزىپ تە ۇلگەردىك. ناتيجەسىندە, ەكى پاتەنت الدىق. ەندى ءبىر ايدان سوڭ ءتۇرلى الاڭداردا سىناپ كورمەكپىز. ءبىزدىڭ ءبىلىمىمىز ەلىمىزدىڭ دامۋىنا جاراسا دەيمىز. سوندىقتان الداعى ۋاقىتتا اپپاراتتى كۇندەلىكتى ومىردە قولدانۋعا ەنگىزۋگە ەڭبەكتەنىپ جاتىرمىز, – دەيدى عىلىمي جوبا جەتەكشىسى ا.داراەۆ.
ال جوبا زەرتتەۋشىلەرىنىڭ سوزىنە قاراعاندا, قۇرىلعىنى ءدارى-دارمەك تاسۋعا قولدانۋ جەتكىزۋ ۋاقىتىن قىسقارتادى, بۇل ءوز كەزەگىندە ەل ازاماتتارىنىڭ ىڭعايلى ءومىر سۇرۋىنە, سول ارقىلى ءومىر ساپاسىن جاقسارتۋعا جاردەمدەسەدى. الەمدە مۇنداي اپپاراتتاردى مۇقتاج جاندارعا مەديتسينالىق كومەك كورسەتۋدە كەڭىنەن قولدانادى. ءدارى-دارمەكتى جەتكىزۋ ءۇشىن ۇشقىشسىز ۇشۋ اپپاراتتارىن پايدالانۋ جەتكىزۋ ۋاقىتىن قىسقارتىپ قانا قويماي, قوسىمشا جەتكىزۋشى ادامنىڭ قىزمەتىنە جانە كولىككە شىعىن شىعارماۋعا مۇمكىندىك بەرەدى. ۇشقىشسىز ۇشۋ اپپاراتتارىنىڭ مانەۆرلىك جانە ءدال ۇشۋ قابىلەتى وتە جوعارى, سوندىقتان مۇنداي قۇرىلعىلار ءدارى-دارمەكتى ەڭ قيىن جەرلەرگە دە جەتكىزە الادى. تەك ءدارى-دارمەك جەتكىزۋ قاۋىپسىزدىگىن قامتاماسىز ەتۋ ءۇشىن قۇرىلعىنىڭ جۇك كوتەرگىش قابىلەتى دە شەكتەۋلى بولاتىنىن ەستەن شىعارماعان ابزال.