بالالاردى قولونەرگە باۋليدى

تەرەڭساي – ايتەكە بي اۋدا­نىنىڭ ورتالىعى ت.جۇرگەنوۆ اۋىلىنان 107 شاقىرىم جەردە, اقتوبەدەن قوستانايعا باراتىن تاسجولدىڭ بويىندا ورنالاسقان قيىرداعى اۋىل. ەلىمىز تاۋەلسىزدىك العان جىلدارى تۋعان جەرىندە ەڭبەك جولىن باستاعان جاس مامان سودان بەرى تالاي ءومىر بەلەسىنەن وتسە دە اۋىلىنان ۇزاپ كەتپەدى, سۇيىكتى ماماندىعىنان قول ۇز­گەن جوق. ون ساۋساعىنان ونەر تامعان شەبەر ۇل-قىزدار­دىڭ كوركەم ەڭبەك پانىنە دە­گەن قىزىعۋشىلىعىن ارت­تىرىپ قانا قويماي, ولار­دىڭ يكەمدىلىگىنە قاراي بوي­لا­رىنداعى قابىلەتتەرىن اشا بىلەدى. ەڭبەككە باۋ­لۋدى ءبىر قاراعاندا ۇساق-تۇيەك بولىپ كورىنەتىن جۇمىستاردان باستايدى. قو­سىمشا ساباقتاردا ەر بالالاردى شەگە قاعىپ, كۇرەك ساپتاۋ, بىلىك تەمىرلەردى جونۋ, تاقتاي سۇرگىلەۋگە ۇيرەتەدى. جاسى­راتىنى جوق, قازىرگى كەزدە اۋىلدا شەگەنى ءتۇزۋ قا­عا المايتىن, كۇرەك ساپتاي بىلمەيتىن اقساۋساق بالا كوبەيىپ بارادى. ءۇي شارۋا­شىلىعىنا جاستايىنان يكەمدەلمەگەن جەتكىنشەك وسكەندە كوپ جاعدايدا شارۋاعا قىر­سىز بولىپ قالادى. بالا تاربيە­سىندەگى وسى ولقىلىقتىڭ ورنىن تولتىرۋ ءۇشىن تەحنو­لوگيا ءپانىنىڭ مۇعالىمى قارا­پايىم قاعيدالارعا سۇيەن­گەندى ءجون كورەدى. سول ءۇشىن دە ساباقتان تىس ۋا­قىتتا مەك­تەپ­تە «قولونەر», «شەبەر قول­دار» ۇيىرمەلەرىن ۇيىمداس­تىردى. قولى بوس كەزدە ۇيىن­دە ۇلت­تىق ناقىشتاعى دۇ­نيەلەر جاسايدى. اعاشتان ءتۇرلى بۇيىم جاساعاندى جانى سۇيەدى. قولونەرگە قاجەتتى ما­تەريالدى اۋىل اراسىنان ىزدەيدى, اۋدان ورتالىعىنان الدىرتادى. شەبەر قاجەتتى ماتەريالداردىڭ تەز تابىلمايتىنىنا قاپالى, «قولونەرگە قاجەتتى زاتتار تولىپ تۇرسا, ۋاقىتىمىز ۇنەمدەلەر ەدى, بالالاردى ۇيرەتۋ دە وڭايعا تۇسەر ەدى», دەيدى ول. اۋىل مەك­تەپتەرىن تەحنولوگيا پانىنە قاجەتتى ءتۇرلى قۇرالدارمەن, ما­تەريال­دارمەن جەتكىلىكتى تۇر­دە قامتا­ما­سىز ەتسە, وقۋشى­لار­دىڭ كاسىپ­تىك داع­دىلاردى مەڭگەرۋ ساپاسى دا ارتاتىنى راس.

قولدا باردى ۇقساتىپ جۇرگەن شەبەردىڭ شاكىرتتەرى شەتىنەن ونەرلى. تەرەڭساي اۋى­لىنداعى بالاباقشا, مادەنيەت ءۇيىنىڭ كىرەبەرىستەرىنە وقۋ­شىلاردىڭ قولدان جاساعان ساندىك بۇيىمدارى قويىلعان. اۋداندىق, وبلىستىق, رەس­پۋب­­­ليكالىق شەبەرلىك باي­قاۋلارى مەن كورمەلەردە سا­مات امان­عوس­ ۇلىنىڭ وقۋ­شىلارى جۇل­دەلى ورىنداردى يەلەنىپ ءجۇر. شەبەردىڭ شاكىرت­تەرى قول­ونەردى مامان­دىققا اينال­دىرىپ, كەيبىرى اقتوبە قالا­سىندا جيھاز جاسايتىن تسەحتاردا ەڭبەك ەتسە, ەندى ءبىرى ءتۇرلى سالاداعى ديزاي­نەر مامان­دىقتارىن تاڭ­دادى. تەرەڭ­ساي­دىڭ توپى­راعىنان تۇلەگەن جاستار سامات اعايىنان العان تاربيە مەن ونەگەنى ومىردە ءوز ماق­­ساتتارىنا پايدالانا بىل­گەن­دەرىنە ريزا. ويتكەنى ونەرلى جان قاي كەزدە دە قاجەت.

اقتوبە وبلىسى