كەيىنگى ءۇش تاۋلىكتە قازاقستاننىڭ شىعىسىندا اياز كۇشىنە ءمىنىپ تۇر. سالدارىنان سەمەيدەگى تانىمال اسپالى كوپىر جارىلىپ كەتتى. كوپىر ۇستىندەگى جارىق ولشەمى كەي جەرلەردە 25 سم-گە جەتەدى, دەپ جازادى Egemen.kz.
AbaiNews سەمەيدە اسپالى كوپىردىڭ دەفورماتسيالىق جىگىنىڭ ورنىندا جارىقتار پايدا بولعانىن حابارلادى.
ەرتىستى كەسىپ وتەتىن كوپىر ۇستىندەگى جارىقتاردى كورگەن تۇرعىندار الاڭداۋلى. جەرگىلىكتى پوليتسيا ۆيزۋالدى تەكسەرۋ جۇرگىزگەن.
«پوليتسيا قىزمەتكەرلەرى ءوز قۇزىرەتى شەگىندە كوپىردىڭ جاي-كۇيىنە ۆيزۋالدى تەكسەرىس جۇرگىزدى. تەكسەرۋ قورىتىندىسى بويىنشا اكىمدىككە دەفورماتسيالىق جىكتى مۇزدان تازارتۋ قاجەتتىگى تۋرالى ۇيعارىم جىبەرىلدى. دەفورماتسيالىق جىكتىڭ اشىلىپ كەتۋىنە اۋا تەمپەراتۋراسىنىڭ تومەندەۋى سەبەپ بولعان», دەدى اباي وبلىستىق پوليتسيا دەپارتامەنتىنىڭ وكىلى.
اباي وبلىسىنىڭ اكىمدىگى اسپالى كوپىردەگى ساڭىلاۋلار كولىك قاتىناسىنا كەدەرگى كەلتىرمەيتىنىن العا تارتىپ, كوپىردىڭ قۇلاۋىنا قاتىستى قاۋىپ جوق دەپ باعامدادى.
«16 اقپاندا اۋا تەمپەراتۋراسى -29 گرادۋس بولعان كەزدە جولاۋشىلار كولىگى جانە اۆتوموبيل جولدارى ءبولىمىنىڭ وكىلدەرى اسپالى كوپىردەگى دەفورماتسيالىق جىكتەر مەن كوپىردىڭ كوزگە كورىنەتىن تىرەكتەرىنىڭ قۇرىلىمدارىن ۆيزۋالدى تەكسەردى. ناتيجەسىندە دەفورماتسيالىق جىك قىرلارىنىڭ اراسىنان №1 تىرەكتەن 70 مم-دەي جانە №10 تىرەكتەن 60 مم-دەي ساڭىلاۋ انىقتالدى. كوپىر تىرەگىنىڭ جاعدايى قاناعاتتانارلىق دەپ باعالاندى, كوپىردىڭ قۇلاۋ قاۋپى انىقتالعان جوق», دەدى اكىمدىك.
الايدا اكىمدىك وكىلدەرى كوپىردىڭ تەحنيكالىق جاعدايى تاۋلىك بويى باقىلاۋدا بولاتىنىن مالىمدەدى.