سەنات توراعاسى ماۋلەن اشىمباەۆ اقمولا وبلىسىنىڭ جۇرتشىلىعىمەن, جەرگىلىكتى اقساقالدارمەن, جاستار جانە ءماسليحات دەپۋتاتتارىمەن كەزدەستى. كۇن تارتىبىندە مەملەكەت باسشىسىنىڭ جولداۋدا جانە ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ىسكە اسىرۋ ماسەلەلەرى, سەناتتىڭ ءوڭىردى دامىتۋعا ىقپالى جانە پالاتا مەن ءماسليحاتتاردىڭ ءوزارا ءىس-قيمىل بارىسى تالقىلاندى, دەپ جازادى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
ءوڭىردىڭ ءماسليحات دەپۋتاتتارىمەن جانە جۇرتشىلىعىمەن كەزدەسۋدە ساياسي, ەكونوميكالىق, الەۋمەتتىك رەفورمالاردى ىسكە اسىرۋعا, سونداي-اق, وبلىستى دامىتۋدىڭ كەلەشەگىنە باسا ءمان بەرىلدى.
«پرەزيدەنت قاسىم-جومارت كەمەل ۇلى توقاەۆ ۇكىمەتتىڭ كەڭەيتىلگەن وتىرىسىندا الەۋمەتتىك-ەكونوميكالىق دامۋ, بيۋدجەت جانە سالىق ساياساتىنىڭ تيىمدىلىگىن ارتتىرۋ سالالارىندا اتقارىلۋعا ءتيىس ماڭىزدى مىندەتتەردى بەلگىلەپ بەردى. بۇل باسىمدىقتار دەپۋتاتتاردىڭ نازارىندا بولۋعا ءتيىس, سونداي-اق, جۇمىس بارىسىندا جانە سالىق كودەكسىن ازىرلەۋ كەزىندە ەسكەرىلۋى كەرەك. الداعى ۋاقىتتا اۋىل شارۋاشىلىعىن قارجىلاندىرۋ دايەكتى تۇردە ارتادى. اقمولا وبلىسى اگرارلىق سالا دامىعان ءوڭىر بولعاندىقتان, مۇنداي باستاما ايماق تۇرعىندارى ءۇشىن ەرەكشە ماڭىزعا يە. مەملەكەت باسشىسى كوتەرگەن الەۋمەتتىك سالانى رەفورمالاۋ دا اۋقىمدى جۇمىستى تالاپ ەتەدى. ەلدىڭ يگىلىگىنە ارنالعان وسى باعىتتاردا بارلىق مەملەكەتتىك ورگان بىرلەسىپ جۇمىس ىستەۋى كەرەك», دەدى م.اشىمباەۆ.
سونىمەن قاتار سەنات توراعاسى ەكونوميكانى كەشەندى تۇردە ىرىقتاندىرۋدىڭ نەگىزگى باسىمدىقتارىنا توقتالدى. بۇل رەتتە مەملەكەتتىڭ ەكونوميكالىق ۇدەرىستەرگە شامادان تىس ارالاسۋىنان باس تارتۋدىڭ, مەملەكەتتىك ساتىپ الۋ, مەملەكەت پەن جەكەمەنشىك سەرىكتەستىگى, قۇرىلىس سالاسىن رەتتەۋ جۇيەلەرىن وزگەرتۋدىڭ ءمانى جوعارى. كەزدەسۋدە مەملەكەت باسشىسىنىڭ رەسپۋبليكالىق ماڭىزى بار جولداردى جوندەۋ جانە ينفراقۇرىلىمدى دامىتۋعا قاتىستى باستامالارى دا تالقىلاندى. ولار وڭىرلەردىڭ وركەندەۋى ءۇشىن وتە وزەكتى ەكەنى انىق.
«ەل ەكونوميكاسىن دامىتۋدا جانە ەلوردانى اۋىل شارۋاشىلىعى ونىمدەرىمەن قامتاماسىز ەتۋدە اقمولا وبلىسىنىڭ ماڭىزى ايرىقشا زور. وڭىردە تۇرعىن ۇيلەر مەن الەۋمەتتىك نىسانداردىڭ, ونىڭ ىشىندە, اۋىلدىق جەرلەردە مەكتەپتەردىڭ قۇرىلىسى قارقىندى جۇرگىزىلىپ جاتىر. دەگەنمەن, ايماقتا جەتىستىكتەرمەن قاتار, شەشىمىن كۇتكەن پروبلەمالار دا بار. اسىرەسە, ينجەنەرلىك جانە ەنەرگەتيكالىق ينفراقۇرىلىمدى جاڭعىرتۋ ماسەلەسى وتە وزەكتى. ششۋچينسك-بۋراباي دەمالىس ايماعىندا ەكولوگيالىق تۇيتكىلدەر دە جوق ەمەس. ءبىز وڭىرلەردىڭ مۇددەسىن قورعايتىن پالاتا رەتىندە وسى باعىتتاردا ماسليحاتتارمەن بايلانىستى ارتتىرىپ, ماڭىزدى ماسەلەلەردى شەشۋگە ىقپال ەتەمىز», دەدى سەنات توراعاسى وبلىستىڭ ءماسليحات دەپۋتاتتارىن زاڭ شىعارۋ جۇمىسىنا, پارلامەنتتىك تىڭداۋلار, ۇكىمەت ساعاتتارى, دوڭگەلەك ۇستەلدەر مەن كوشپەلى وتىرىستار سياقتى پالاتا ۇيىمداستىراتىن ءىس-شارالارعا بەلسەندى قاتىسۋعا شاقىردى. بۇل جيىنداردا بەلگىلى ءبىر ماسەلەلەردى شەشۋگە ارنالعان تۇجىرىمدامالىق ۇسىنىستار تالقىلانىپ, ازىرلەنەدى. ماۋلەن اشىمباەۆ مەملەكەت باسشىسىنىڭ تاپسىرماسىمەن قۇرىلعان ورنىقتى دامۋ ماقساتتارى جونىندەگى پارلامەنتتىك كوميسسيانىڭ جانە جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەس, ء«وڭىر» دەپۋتاتتىق توبى سەكىلدى سەنات جانىنداعى الاڭداردىڭ جۇمىسىنا نازار اۋدارىپ, بۇل باعىتتار بويىنشا دا ىنتىماقتاستىقتى ارتتىرۋعا مۇمكىندىك مول ەكەنىن ايتتى.
وبلىستىڭ بەلسەندى جاستارىمەن كەزدەسۋدە رەفورمالاردى ىسكە اسىرۋدا جانە ايماقتىڭ الەۋەتىن ارتتىرۋدا جاس بۋىننىڭ اتقاراتىن ءرولى تالقىلاندى. سەنات توراعاسى ءوز سوزىندە قازىرگى تاڭدا ەلىمىزدە جاستارعا جۇيەلى تۇردە قولداۋ كورسەتىلىپ كەلە جاتقانىن, وسى باعىتتا كەشەندى رەفورمالار ىسكە اسىرىلىپ, ستراتەگيالىق باعدارلامالار جانە مەملەكەتتىك جوبالار ازىرلەنگەنىن اتاپ ءوتتى.
«مەملەكەت باسشىسىنىڭ باستاماسىمەن قازاقستاندا جاستاردىڭ ساپالى ءبىلىم الۋىنا, ولاردى باسپانامەن قامتاماسىز ەتۋگە جانە قىزمەتتە وسۋىنە بارلىق جاعداي جاسالىپ كەلەدى. ءوڭىر جاستارىنىڭ كاسىپكەرلىك باستامالارىنا كومەك كورسەتۋ جانە ولاردى جۇمىسپەن قامتۋ ماسەلەلەرىن جۇيەلى شەشۋ باعىتىندا دا ىرگەلى ىستەر اتقارىلىپ جاتىر. پرەزيدەنتتىك جاستار كادرلىق رەزەرۆىنىڭ ارقاسىندا تالانتتى, ءبىلىمدى, بىلىكتى جاس ماماندارعا جاۋاپتى قىزمەتتەرگە كەلۋدىڭ جاڭا ءبىر جولى اشىلدى. الداعى ۋاقىتتا اقمولا وبلىسىندا دا جەرگىلىكتى كادرلىق رەزەرۆكە ىرىكتەۋ باستالادى. وبلىس جاستارى ءوڭىردىڭ عانا ەمەس, تۇتاس ەلىمىزدىڭ دامۋىنا ۇلكەن ۇلەس قوسادى دەپ سەنەمىن», دەگەن ماۋلەن اشىمباەۆ ءماجىلىس جانە ءماسليحات دەپۋتاتتارىنىڭ قاتارىندا جاستاردىڭ بولۋىن قامتاماسىز ەتەتىن زاڭنامالىق نورمالارعا دا توقتالىپ ءوتتى.
پالاتا سپيكەرى سەناتتا بەلسەندى جاستاردى قولداۋعا ارنالعان تالداۋ مەكتەبى, جاس ساراپشىلار كلۋبى سياقتى ناقتى جوبالار قولعا الىنعانىن دا تىلگە تيەك ەتتى. وسى ساپار الدىندا كوكشەتاۋ قالاسىندا سەنات جانىنداعى جاس ساراپشىلار كلۋبىنىڭ مۇشەلەرى اقمولا وبلىسىنىڭ ساراپشىلار قاۋىمداستىعىمەن كەزدەستى. وندا ءوڭىردى دامىتۋ ماسەلەلەرى جانە وبلىستىڭ ساراپشىلار قاۋىمداستىعىنىڭ كلۋبپەن ءوزارا ءىس-قيمىل جاساۋ تەتىكتەرى تالقىلاندى. مۇنىڭ ءبارى سەناتتىڭ وڭىرلەرمەن, ونىڭ ىشىندە جەرگىلىكتى ساراپشىلارمەن جۇيەلى بايلانىس ورناتۋ باعىتىنداعى كەشەندى جۇمىستىڭ ناقتى ناتيجەسى ەكەنى ءسوزسىز.
ساپار اياسىندا سەناتورلار شوقان ءۋاليحانوۆ اتىنداعى ۋنيۆەرسيتەتتىڭ ستۋدەنتتەرىمەن جانە پروفەسسور-وقىتۋشىلار قۇرامىمەن كەزدەستى. سونداي-اق «بوتا-2015» سويا, كۇنباعىس, راپس مايلارىن شىعاراتىن زاۋىتتىڭ جانە «ماكينسك قۇس فابريكاسىنىڭ» قىزمەتىمەن تانىستى. ەڭبەك ۇجىمدارىمەن كەزدەسۋلەردە وندىرىستەردى ودان ءارى دامىتۋ, قارجىلاندىرۋ جانە كاسىپورىنداردىڭ ماتەريالدىق-تەحنيكالىق بازاسىن جاقسارتۋ ماسەلەلەرى ءسوز بولدى.
ودان بولەك, سەناتورلار «Viamedis» ەمحاناسى بار كلينيكالىق-وڭالتۋ ورتالىعىنا باردى. بۇل نىسان زاماناۋي مەديتسينالىق قوندىرعىلارمەن جابدىقتالعان جانە ءوڭىردىڭ 20 مىڭنان استام تۇرعىنىنا قىزمەت كورسەتەدى.