ەلىمىزدە «كيبەر تۇمار» اتتى اقپاراتتىق ءبىلىم جوباسى باستالدى. اتالعان ءىس-شارا بالالار مەن جاسوسپىرىمدەردى تسيفرلىق ورتادا قورعاۋعا باعىتتالعان.
ءبىلىم بەرۋ ناۋقانى وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ, يۋنيسەف قازاقستان جانە ەۋروپالىق وداقتىڭ قولداۋىمەن قۇرىلعان Peremena.media اقپاراتتىق كەڭىستىگى ارقىلى جۇرگىزىلەدى. كيبەرقاۋىپسىزدىككە قاتىستى ءبىلىم بەرۋ جۇمىسى 6 اقپان – حالىقارالىق قاۋىپسىز ينتەرنەت كۇنى باستالدى. قازىرگى زاماندا تسيفرلىق تەحنولوگيالاردى, اسىرەسە ەڭ جاس پايدالانۋشىلار – بالالار مەن جاسوسپىرىمدەردىڭ جاۋاپكەرشىلىكپەن, قاۋىپسىز جانە ناتيجەلى پايدالانۋىنا نازار اۋدارتۋ بۇگىندە جاھاندىق مىندەتكە اينالدى. وسى رەتتە ۇيىمداستىرۋشىلار «كيبەر تۇمار» اتتى جاس بۋىنعا ينتەرنەتتى قاۋىپسىز قولدانۋعا ۇيرەتەتىن, دۇرىس باعىت-باعدار بەرەتىن اقپاراتتىق قۇرالدار جيىنىن ۇسىنىپ وتىر. وعان وسى ماسەلەگە نازار اۋدارتۋعا ارنالعان الەۋمەتتىك پلاكاتتار, ءتۇرلى قاۋىپ-قاتەر كەزىندەگى بازالىق الگوريتمدەردى قامتىعان اقپاراتتىق پلاكاتتار, ساراپشىلاردىڭ پراكتيكالىق كەڭەستەرى بەرىلگەن ماتەريالدار, ءبىلىم بەرۋ روليكتەرى جانە ت.ب. كىرەدى.
بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا: «ينتەرنەت – قازىرگى كەزدە تەك اقپارات قۇرالى عانا ەمەس, سونىمەن بىرگە كوممۋنيكاتسيا قۇرالى. سول سەبەپتى ادامدى مۇنداي اقپارات جانە كوممۋنيكاتسيا قۇرالدارىنىڭ الەۋەتتى مۇمكىندىكتەرىن بارىنشا سانالى, پايدالى, زيانى تيمەيتىندەي ەتىپ, قالاي قولدانۋ كەرەگىن جاس كەزىنەن ۇيرەتۋ كەرەك. «كيبەر تۇمار» اقپاراتتىق ءبىلىم بەرۋ ناۋقانىن وتكىزۋ بالالاردىڭ اقپاراتتىق قاۋىپسىزدىگىن قامتاماسىز ەتۋگە اسەر ەتەتىن, اتا-انانىڭ, بالانىڭ ونلاين ورتادا اقپاراتتى تاڭداۋعا دەگەن «يممۋنيتەتىن» قالىپتاستىرۋدا جاۋاپكەرشىلىگىن كۇشەيتۋگە كومەكتەسەتىن ماڭىزدى جانە زاماناۋي قادام بولىپ تۇر», دەدى.
ال ەۋروپا وداعىنىڭ قازاقستانداعى ەلشىسى كەستۋتيس يانكاۋسكاس: «ينتەرنەت كۇندەلىكتى ءومىرىمىزدىڭ اجىراماس بولىگىندەي بولىپ كەتتى, سونىڭ ىشىندە بالالارىمىز ءۇشىن ودان دا ماڭىزدى ەلەمەنتكە اينالدى. اتا-انا رەتىندە ءبىز بالالارىمىزدىڭ بارلىق جەردە – مەكتەپتە, كوشەدە جانە ينتەرنەت الەمىندە قاۋىپسىزدىگىن قامتاماسىز ەتىپ وتىرۋعا تىرىسامىز. ءبىز اتالعان ناۋقان اتا-انالاردىڭ دا, بالالاردىڭ دا حاباردار بولۋىنا كومەكتەسەدى دەپ سەنەمىز. بىرلەسكەن ارەكەتتەرىمىزبەن بالاعا قاۋىپسىز ءارى قولايلى ونلاين-كەڭىستىك قۇرا الامىز», دەپ پىكىرىن ءبىلدىردى.
بىرىككەن ۇلتتار ۇيىمى بالالار قورىنىڭ (يۋنيسەف) قازاقستانداعى وكىلىنىڭ مىندەتىن اتقارۋشى لەتيسيا باززي-ۆەيلدىڭ ويىنشا, «كيبەر تۇمار» قازاقستاندىق بالالاردى جەلىدەگى قاۋىپ-قاتەرلەردەن قورعاۋ رامىزىنە اينالادى. ء«ار بالا ءوزىنىڭ ناقتى قادامدارىمەن بىرگە العاشقى ۆيرتۋالدى قادامىن جاسايدى. جانە وعان تسيفرلىق كەڭىستىكتە قاۋىپسىز وسۋگە كومەكتەسەتىن قورعانىستى نەعۇرلىم ەرتە بەرۋدىڭ ماڭىزى زور. «كيبەر تۇمار» بالالاردى ينتەرنەتتەگى جاعىمسىز بايلانىستان, كونتەنتتەن جانە ءىس-ارەكەتتەن جاقسىراق قورعاۋعا ىقپال ەتەدى. بالالارىمىزدىڭ ءوز كيبەر تۇمارى بولسا, ونلاين تىلدەسۋ, دامىتۋ ويىندارى, وقۋ ولاردىڭ مۇمكىندىكتەرىن كەڭەيتە الادى», دەيدى ول.