سايتىمىزدا جاريالانعان «جۇرگىزۋشى كۋالىگىن ساۋدالاعان توپ» اتتى ماقالاعا وراي «ازاماتتارعا ارنالعان ۇكىمەت» مەملەكەتتىك كورپوراتسياسى كەاق-تىڭ ءباسپاسوز قىزمەتى رەسمي جاۋاپ جولدادى, دەپ حابارلايدى Egemen.kz.
- «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق-نىڭ قاۋىپسىزدىك قىزمەتى تەكسەرۋ ءىس-شارالارى بارىسىندا جۇرگىزۋشى كۋالىگىن زاڭسىز بەرۋ فاكتىلەرىن انىقتادى. 2023 جىلدىڭ 14 قىركۇيەگىندە ىشكى قاۋىپسىزدىك قىزمەتكەرلەرى راستايتىن قۇجاتتاردى قۇقىق قورعاۋ ورگاندارىنا تاپسىردى. قازىرگى ۋاقىتتا قىلمىستىق ءىس اياسىندا ايعاقتاردى الۋ جانە ءتىنتۋ جۇرگىزىلىپ جاتىر. وزگە مالىمەتتەر تەرگەۋ امالدارى اياسىندا جاريا ەتىلمەيتىنىن العا تارتامىز. ايتا كەتۋ كەرەك, مەملەكەتتىك كورپوراتسيا ءوز قۇزىرەتى شەگىندە قىزمەتكەرلەر اراسىنداعى قۇقىق بۇزۋشىلىقتاردى بولدىرماۋ ماقساتىندا تۇراقتى تۇردە قاجەتتى شارالار قولدانادى, - دەلىنگەن جاۋاپتا.
ەسكە سالا كەتەيىك, بۇعان دەيىن جامبىل وبلىسىنىڭ پوليتسيا دەپارتامەنتى جۇرگىزۋشى كۋالىگىن ساۋدالاعان قىلمىستىق توپ مۇشەلەرىن قاماۋعا العان ەدى. اتالعان توپ قۇرامىندا لاۋازىمدى قىزمەتكەرلەر دە بولعان.