ءماجىلىستىڭ بۇگىنگى جالپى وتىرىسىندا «قانداس» مارتەبەسىن بەرۋ جەتىلدىرىلەتىنى ايتىلدى. تۇزەتۋلەردى ەكىنشى وقىلىمعا دايىنداۋ بارىسىندا دەپۋتاتتار «قانداس» مارتەبەسىن بەرۋ ءتارتىبىن جەتىلدىرۋگە باعىتتالعان جاڭا نورما ازىرلەدى, دەپ جازادى Egemen.kz ء ماجىلىستىڭ ءباسپاسوز قىزمەتىنە سىلتەمە جاساپ.
«قانداس» مارتەبەسىن جانە قازاقستان ازاماتتىعىن الۋ ءۇشىن ءوتىنىش بىلدىرگەن ادامداردىڭ ۇلتى قازاق ەكەنىن انىقتاۋ ءتارتىبى جەرگىلىكتى اتقارۋشى ورگانداردىڭ قۇزىرەتىنە كىرەدى. سونداي-اق قانداستاردى قابىلداۋدىڭ وڭىرلىك كۆوتاسىنا ەتنيكالىق قازاقتاردىڭ جەكە وتباسى مۇشەلەرى, قانداستاردىڭ جەسىرلەرى جانە ولاردىڭ ورتاق بالالارى ەنگىزىلەتىن» نورما كۇشىنە ەنەدى.
سونىمەن قاتار ازاماتتىق الۋدىڭ وڭايلاتىلعان ءتارتىبىن قولدانا الاتىن ادامدار ساناتى كەڭەيتىلدى. «ەندى ەلىمىزدە زاڭدى تۇردە تۇراقتى تۇراتىن قازاقستان رەسپۋبليكاسى ازاماتتارىنىڭ جەسىرلەرى تۇرۋ مەرزىمىنە قاراماستان وڭايلاتىلعان (تىركەۋ) تارتىپپەن قازاقستان ازاماتتىعىن الا الادى. سونداي-اق بۇل قاتارعا حالىقارالىق شارتتار نەگىزىندە وڭايلاتىلعان تارتىپپەن قازاقستان ازاماتتىعىن الۋعا قۇقىعى بار ادامدار دا كىرەتىنى» ايتىلعان اقپاراتتا.