«بۋراباي» مەملەكەتتىك ۇلتتىق تابيعي پاركىندە بيىل 520 مىڭ ءتۇپ تال ەگۋ جوسپارلانىپ وتىر. وسىلايشا, ورمان القابى جاس كوشەتتەردىڭ ەسەبىنەن 65 گەكتارعا ۇلعايۋعا ءتيىس.
ۇلتتىق پارك قىزمەتكەرلەرى بىلتىر دا 500 مىڭنان اسا قاراعاي مەن قايىڭ وسكىنىن وتىرعىزعانىن ايتا كەتەيىك. كوشەتتەر پاركتىڭ 1960 جىلى اشىلعان تالىمباعىندا وسىرىلەدى. قايىڭ مەن قاراعايدان بولەك, مۇندا قاراقات, الما, تاڭقۋراي, ۇيەڭكى جانە بورىقاراقات سىندى اعاشتار ەگىلەدى.
– جىل سايىن ينسپەكتورلار قاراشا ايىنان قاڭتارعا دەيىن ورماننان قاراعايدىڭ بۇرشىگىن تەرەدى. بۇل جۇمىس بيىل دا ۋاقتىلى جۇرگىزىلدى. جينالىپ, بىرنەشە كۇن كەپتىرىلگەن تۇقىم قازىر تالىمباقتاعى تەمپەراتۋراسى مەن دىمقىل دەڭگەيى رەتتەلەتىن جابىق ورىندا, ارناۋلى كامەرالاردا ساقتاۋلى تۇر. كوكتەمگە سالىم ءبۇر جارا باستاعان بۇرشىكتەردى توپىراققا سەۋىپ, تىڭايتقىش سالۋ, ءارامشوبىن تازالاۋ سىندى اگروتەحنيكالىق جۇمىس جۇرگىزىپ, ەكى جىل باپتايمىز. سودان كەيىن عانا تامىر جايا باستاعان, ساباعى بىرنەشە سانتيمەترگە جەتكەن وسكىندى جابايى تابيعات اياسىندا وسىرۋگە بولادى, – دەيدى ۇلتتىق پاركتىڭ ورمان مەن وسىمدىكتەر الەمىن قورعاۋ جانە جانداندىرۋ ءبولىمىنىڭ باستىعى الەكساندر كوۆالەۆ.
ونىڭ ايتۋىنشا, ادەتتە كوشەت ءساۋىر ايىنىڭ سوڭىنا قاراي ەگىلەدى. نازىك وسكىن جاڭا توپىراقتى جەرسىنۋى ءۇشىن تالىمباقتان تامىرىنداعى ميكروفلوراسىمەن بىرگە اكەلىپ وتىرعىزادى.
مەملەكەت باسشىسىنىڭ تاپسىرماسى بويىنشا ەلىمىزدە 5 جىلدا 2 ملرد ءتۇپ اعاش وتىرعىزۋ تۋرالى كەشەندى جوسپار جۇزەگە اسىرىلىپ جاتقانى بەلگىلى. پرەزيدەنت ءىس باسقارماسىنا قاراستى مەكەمە دە مۇنى جۇزەگە اسىرۋعا ۇلەس قوسىپ كەلەدى.