پروكۋراتۋرا جۇرگىزگەن ارنايى ءىس-شارالاردىڭ ناتيجەسىندە سولتۇستىك قازاقستان وبلىسىنداعى كۇماندى مەملەكەتتىك ساتىپ الۋلار توقتاتىلدى, دەپ حابارلايدى Egemen.kz.
قاداعالاۋ ورگانىنىڭ ءباسپاسوز قىزمەتى قۇرىلىس ءبولىمىنىڭ قىزمەتكەرلەرى بالاباقشا قۇرىلىسىنا مەملەكەتتىك ساتىپ الۋ جۇرگىزگەنىن ايتتى. جوبانىڭ قۇنى 1,7 ملرد تەڭگەنى قۇرايدى. تەك قولدارىندا جەر تەلىمىنە قۇقىق بەلگىلەيتىن قۇجاتتارى بولماعان.
«تاعى ءبىر جاعدايدا, قىزىلجار جانە ءۋاليحانوۆ اۋداندارى اكىمدىكتەرىنىڭ لاۋازىمدى تۇلعالارى اشىق كونكۋرستىڭ ورنىنا باعا ۇسىنىستارىن سۇراتۋ ارقىلى 107 ميلليون تەڭگەدەن استام سوماعا مەملەكەتتىك ساتىپ الۋدى جۇزەگە اسىرماق بولعان», دەپ حابارلادى وبلىس پروكۋراتۋراسى.
ايىرتاۋ, مۇسىرەپوۆ جانە قىزىلجار اۋداندارىنىڭ جەرگىلىكتى بيلىگى ساپا سەرتيفيكاتى جوق سپورت الاڭدارىنا مەملەكەتتىك بيۋدجەتتەن 148 ملن تەڭگە جۇمساۋدى جوسپارلاعان.
بارلىق ساتىپ الۋلار توقتاتىلدى. قىزمەتكەرلەر ءتيىستى جاۋاپكەرشىلىككە تارتىلادى.