ەكىنشى دۇنيەجۇزىلىك سوعىستىڭ ساربازى قيسىم اديەۆتىڭ سۇيەگى اتىراۋ قالاسىنداعى «نوعاي» مۇسىلماندار زيراتىنا قايتا جەرلەندى. Atamnyn Amanaty قوعامدىق بىرلەستىگىنىڭ باستاماسىمەن قازاقستانعا قارۋلى كۇشتەردىڭ اۋە قورعانىسى كۇشتەرى اسكەري-كولىكتىك ۇشاعىمەن ساربازدىڭ سۇيەگى رەسەيدەن جەتكىزىلگەن بولاتىن, دەپ حابارلايدى Egemen.kz.
قورعانىس مينيسترلىگىنىڭ ءباسپاسوز قىزمەتى ءمالىم ەتكەندەي, جاۋىنگەردىڭ رۋحىنا قۇرمەت كورسەتۋ ءۇشىن قالالىق اكىمدىك وكىلدەرى, اۋعان سوعىسى ارداگەرلەرى, تاجىك-اۋعان شەكاراسىنداعى بىتىمگەرلىك ميسسياعا قاتىسۋشىلار, اتىراۋ قالاسىنداعى اسكەري-تەحنيكالىق مەكتەپتىڭ كۋرسانتتارى جينالدى.
قيسىم اديەۆ 80 جىلدان استام ۋاقىت بويى حابارسىز كەتكەندەر تىزىمىندە بولعان. جەرلەنگەن جەرىن رەسەيلىك «فەنيكس» ىزدەۋ توبى تاپقان. Atamnyn Amanaty قوعامدىق بىرلەستىگى ونىڭ اتىراۋدا تۇراتىن كىشى ۇلى سەمباي قيسىموۆتى ىزدەپ تاپقان.
مايدانگەردىڭ كاسكاسى مەن مەدالى تابىستالعان بالاسى سەمباي قيسىموۆ ىزدەۋشىلەرگە جانە سۇيەگىن ەلگە قايتارۋعا اتسالىسقاندارعا العىس ايتا كەلە: «اكەمنىڭ مۇسىلمانشا كىندىك قانى تامعان تۋعان جەرىندە قايتا جەرلەنگەنىن كورىپ, كوڭىلىم جاي تاپتى», دەدى.