ەلىمىزدە جاڭا ءوندىرىس ورىندارى اشىلادى

«ەلىمىزدەگى ءوندىرىستىڭ دامۋىنا تىڭ سەرپىن بەرۋ قاجەت. بارشاعا تۇسىنىكتى جانە ءتيىمدى يندۋستريا ساياساتىن جۇرگىزۋ ءۇشىن بىلتىر جەكە مينيسترلىك قۇرىلدى. سودان بەرى ءبىراز ۋاقىت ءوتتى, ەندى جۇمىستىڭ ناتيجەسىن كورسەتۋ كەرەك. مينيسترلىك سالانىڭ دامۋ باعدارىن انىقتاپ, ينۆەستورلارعا جول كورسەتۋى كەرەك. وزىق تەحنولوگيانى قولداناتىن جاڭا وندىرىستەر اشۋ قاجەت. الايدا, ناقتى شارالار مەن ءادىس-تاسىلدەر دايىن ەمەس. ءوندىرىستىڭ دامۋىنا سەرپىن بەرەتىن جوبالاردىڭ ءتىزىمى بار, دەگەنمەن, بۇل جۇمىس تا تولىق اياقتالماعان. بۇل وندىرىستەر ەكونوميكا قۇرىلىمىن وزگەرتۋگە, ەلىمىزدىڭ مىقتى ونەركاسىپتىك نەگىزىن قالاۋعا جانە تەحنولوگيالىق ءوسىمدى قامتاماسىز ەتۋگە ءتيىس. ازىرگە مۇنىڭ ەشقايسىسى ىسكە اسقان جوق», دەدى ق.توقاەۆ.

مەملەكەت باسشىسى ۇكىمەت حالىقارالىق قارجى ينستيتۋتتارىمەن, ترانسۇلتتىق كورپوراتسيالارمەن جانە وتاندىق كاسىپكەرلەرمەن اراداعى سىندارلى ديالوگتى نىعايتا ءتۇسۋى قاجەت ەكەنىن ايتىپ, جاڭا ءوندىرىس  ورىندارىن اشۋ, جاڭعىرتۋ ماسەلەسىنە توقتالدى.

«مەملەكەت بولاشاقتا ەلىمىزدىڭ ەكونوميكالىق وركەندەۋىنە نەگىز بولاتىن اۋقىمدى ءارى يننوۆاتسيالىق جوبالاردى ءبىرىنشى كەزەكتە قولداۋى قاجەت. وسى تۇستا, جۇمىس ىستەپ تۇرعان وندىرىستەردى جاڭعىرتۋمەن قاتار, ەلىمىز ءۇشىن مۇلدە جاڭا ءوندىرىس ورىندارىن اشۋعا باسا ءمان بەرۋ كەرەك. جالپى, ەلىمىزدىڭ بولاشاقتاعى يندۋستريالىق كەلبەتى قانداي بولادى, قانداي كاسىپورىندار ماڭىزدى ءرول اتقارادى دەگەن ساۋالدارعا جاۋاپ بولۋعا ءتيىس. ۋاقىتتىڭ تالابىنا ساي بەلسەندى جۇمىس ىستەۋ كەرەك», دەپ ءتۇسىندىردى پرەزيدەنت.

قاسىم-جومارت كەمەل ۇلى قازىرگى ءوندىرىس ورىندارىن تۇبەگەيلى جاڭعىرتۋ ماسەلەسى تاعى ءبىر ماڭىزدى مىندەت ەكەنىن ايتتى. ەل پرەزيدەنتىنىڭ ايتۋىنشا, بۇل جۇمىستى, ەڭ الدىمەن, ابدەن توزعان مەتاللۋرگيا كومبيناتتارىنان باستاۋ كەرەك. ويتكەنى, ونداعى جاعداي وتە ناشار دەۋگە بولادى.

«سەبەپ – بارىمىزگە بەلگىلى. ءوندىرىستى دامىتۋعا جانە جاڭعىرتۋعا قاجەتتى ينۆەستيتسيا سالىنبايدى. سونىڭ سالدارىنان دايىن ءونىمنىڭ قوسىلعان قۇنى تومەندەيدى, ساپالى جۇمىس ورىندارى ازايادى», دەپ تولىقتىردى مەملەكەت باسشىسى.