جاڭاارقا اۋدانىنىڭ ورتالىعى اتاسۋ كەنتىندەگى س.سەيفۋللين اتىنداعى تاريحي-ولكەتانۋ مۋزەيىنىڭ تاريحى وتكەن عاسىردىڭ 60-جىلدارىنان باستالادى. ەڭبەك جانە سوعىس ارداگەرى, تاريح ءپانىنىڭ مۇعالىمى, جاڭاارقا اۋدانىنىڭ قۇرمەتتى ازاماتى دالباي ىزتولەۋوۆ وسى ىسكە مۇرىندىق بولىپ, قولىنا تۇسكەن قۇندى جادىگەرلەردى ءبىر جەرگە جيناستىرا باستاعان كورىنەدى. بىراق جيىرما جىلدان اسا ۋاقىت مۋزەي مارتەبەسى بەرىلە قويماپتى. تەك 1984 جىلى رەسمي تۇردە اشىلىپ, سول جىلى تۋعانىنا 90 جىل تولۋىنا بايلانىستى مۋزەيگە ساكەن سەيفۋلليننىڭ ەسىمى بەرىلىپتى.
2004 جىلى اۋداننىڭ 75 جىلدىعى جانە س.سەيفۋلليننىڭ تۋعانىنا 110 جىل تولۋىنا بايلانىستى وتكىزىلگەن ءىس-شارالاردىڭ اياسىندا مۋزەي جەكە عيماراتقا كوشىرىلگەن.
قازىر ءتورت زالدان تۇراتىن مۋزەيدەن ەلدىڭ, جەردىڭ تاريحىنا قاتىستى كوپتەگەن جادىگەردى تاماشالاۋعا بولادى.
سولاردىڭ قاتارىندا ساكەن سەيفۋلليننىڭ تۇتىنعان زاتتارىنىڭ ورنى ەرەكشە.
مىسالى, اقىن ۇستاعان اققۇمان مەن 2 كەسەنى مۋزەيگە 1994 جىلى ساكەننىڭ ءىنىسى ءماجيتتىڭ قىزى رىمجان تاپسىرعان كورىنەدى. قىتاي فارفورىنان شامامەن ءحىح عاسىردىڭ سوڭى حح عاسىردىڭ باسىندا جاسالعان بۇل ىدىستاردى اقىننىڭ جارى گۇلباھرام ءوزى قۋعىن -سۇرگىنگە تارتىلعان ۋاقىتتا قاينىسى ماجيتكە اماناتتاپ تاپسىرعان ەكەن. رىمجان ماجيتقىزى سول جولى ساكەن اتاسىنىڭ قانت ۇساتقىشىن دا مۋزەيگە وتكىزىپتى. «شايى شۇبەرەكتەن تىگىلگەن, استارى سۇر ءتۇستى جىبەكتەن سالىنىپ, جاعاسى سىرىلىپ تىگىلگەن وزبەك شاپانىن دا مۋزەيگە رىمجان سول ساپارىندا تاپسىرىپ كەتىپتى. بۇل شاپاندى ساكەنگە وزبەكستانعا ىسساپارمەن بارعاندا الا تاقيالى اعايىندار يىعىنا جاپقان ەكەن», دەيدى مۋزەيدىڭ ديرەكتورى ەربولات شۋباەۆ.
ال اقىننىڭ سابى توبىلعىدان جاسالىپ, تەرىمەن قاپتالعان ءورىم قامشىسى مەن ەتىك تىگۋگە, جوندەۋگە ارنالعان قۇرالدارىن 1994 جىلى تايتولەۋ اسقارتەگى دەگەن كىسى تاپسىرىپتى. مۋزەي ءار جىل سايىن ساكەن سەيفۋلليننىڭ ءومىرى جانە شىعارماشىلىعىنا ارنالعان كورمەلەر ۇيىمداستىرىپ وتىرادى. اقىننىڭ تۋعانىنا 130 جىل تولۋىنا بايلانىستى بيىل س.سەيفۋلليننىڭ ەسىمىنە قاتىستى ءىس-شارالاردىڭ جىلداعىدان كوبىرەك بولا تۇسەتىنى كۇمانسىز.
ۇلىتاۋ وبلىسى,
جاڭاارقا اۋدانى