قايسارلىق – قازاق قىزدارىنا عانا ءتان سياقتى. انانىڭ اق سۇتىمەن سىڭەتىن بۇل قاسيەتتىڭ ۇشقىنى ت ۇلىمى جەلبىرەپ, تالشىبىقتاي ءوسىپ كەلە جاتقان ايمەكەننىڭ بويىنان انىق بايقالادى.
ءتاڭىرتاۋدىڭ تۋماسى ايمەكەن كىشكەنتايىنان مالدىڭ ءبىر شەتىندە ءجۇرۋدى ادەتكە اينالدىرعان ەكەن. اكەسى ەربولاتتىڭ ەركە قىزى وتە وجەت. الا جازداي اتاقتى شالكودە جايلاۋىنىڭ باۋرايىندا مال باعاتىن اتا-اناسىنىڭ جانىنان ءبىر ەلى الىستامايتىن بالانىڭ مالعا دەگەن ىقىلاسى ەرەكشە. سوندىقتان بولار ءىرىلى-ۇساقتى مالدى جازباي تانۋعا بەيىم.
بۇگىندە تالعار قالاسىنداعى س.سەيفۋللين اتىنداعى №2 ورتا مەكتەپتىڭ 3-سىنىبىندا وقيتىن ايمەكەن اۋەلحان قىسقى دەمالىستا ءوزى تۋىپ-وسكەن قوشقار اۋىلىنا بارىپ, ەنشىسىندەگى ەكى-ءۇش جاباعىنىڭ جالىنا جارماسا جۋاسىتقان ەرلىگى جۇرتتى ءسۇيسىنتتى. ونىڭ اساۋدى اۋىزدىقتاپ, تاقىمداۋعا قۇمارلىعى ەسەيگەن سايىن ەسەلەنە تۇسۋدە. ءسويتىپ, ات جالىندا وينايتىن بالدىرعان باتىلدىعىمەن دارالانىپ كەلەدى.
«بەس جاسىنان اكەسىنە ىلەسىپ, كوكپارعا باراتىن. سودان بەرى اتقا قۇمار. جىلقىعا ەرەكشە اڭسارى اۋىپ تۇرادى. قىز بالا بولعان سوڭ ۋايىمدايتىنىم بار. وندايدا «اجە, مەن باتىرمىن, قورىقپا» دەپ ءوزىمدى قايراپ قويادى. ءتىل-كوزدەن ساقتاپ, امان ءجۇرسىنشى», دەپ 80-نەن اسقان ءباتيحان اجەسى تىلەۋىن تىلەۋدە.
اتقۇمار ايمەكەننىڭ سۋرەت سالۋعا, ولەڭ وقۋعا دا جاقىندىعى جوق ەمەس. مۇقاعالي اتاسىنىڭ ءبىراز شۋماقتارىن جاتتاپ العان. اشىق تا جايدارى مىنەزىمەن كوپشىلىكتى باۋراپ الاتىن قىلىعى سۇيسىنتپەي قويمايدى. قىسى-جازى ءۇي مەن ءتۇزدىڭ شارۋاسىن شالقىتىپ جۇرگەن اناسىنىڭ دا قولقاناتى بولا باستاعان بالدىرعاننىڭ بولاشاعىنان زور ءۇمىت كۇتۋگە بولادى. «بولام دەگەن بالانىڭ بەتىن قاقپا, بەلىن بۋ» دەپ بەكەر ايتپاعان عوي. اۋىزدىقپەن الىسقان اساۋدى تىزگىندەگەن ايمەكەندى وسى جاستان ات سپورتىنا باۋليتىن بولسا جۇلدىزى جارقىراعان سپورتشى شىعارىنا سەنىم مول.
الماتى وبلىسى