بيىل ۇبت تاپسىرۋ فورماتى وزگەرە مە؟

بيىل «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. بۇل بەيىندىك پاندەر بويىنشا سۇراقتار سانىن 40-قا دەيىن ارتتىرۋعا مۇمكىندىك بەردى. سونىمەن قاتار بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى. بۇل وزگەرىستەر – تەست تاپسىرمالارىنىڭ ساپاسىن ارتتىرۋ مەن ولاردىڭ فۋنكتسيونالدىق ساۋاتتىلىق پەن سىني ويلاۋ داعدىلارىن باعالاۋدىڭ الەمدىك ستاندارتتارىنا سايكەستىگى باعىتىنداعى جۇمىستاردىڭ قيسىندى جالعاسى.

«وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى», دەپ ءتۇسىندىردى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.

تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.

شىعارماشىلىق باعىتتى تاڭداعان تالاپكەرلەر وتكەن جىلدارداعىداي ۇبت-نى ەكى ءپان «قازاقستان تاريحى» (20 تاپسىرما, شەكتى بالل – 5) جانە «وقۋ ساۋاتتىلىعى» (10 تاپسىرما, شەكتى بالل – 3) بويىنشا تاپسىرادى. تاپسىرمالاردى ورىنداۋ ۋاقىتى – 70 مينۋت. ال شىعارماشىلىق ەمتيحاندار جوعارى وقۋ ورىندارىندا وتەدى.