تۇرعىندار تۇرمىسى جەڭىلدەدى

«پرەزيدەنت قاسىم-جومارت توقاەۆ جولداۋلارىندا ءبىرىنشى كەزەكتە حالىقتىڭ تۇرمىس-تىرشىلىگىن جاقسارتۋدى تاپسىرىپ كەلەدى. الدىڭعى كەزەكتە اۋىزسۋمەن, ەلەكتر ەنەرگياسىمەن قامتاماسىز ەتۋ, جول جاساۋ, سونداي-اق تابيعي گازعا قوسۋ مىندەتتەرىن جۇزەگە اسىرۋ بويىنشا ءوڭىر باسشىسىنىڭ ناقتى تاپسىرمالارى بار. بۇگىنگى ءىس-شارا – سونىڭ جارقىن كورىنىسى. اۋدانىمىزدا 61 ەلدى مەكەن بار. سونىڭ ىشىندە سامسى مەن تارعاپ اۋىلىنىڭ تۇرعىندارى بۇگىن كوگىلدىر وتىنعا قوسىلادى. بۇل باعىتتارعا ءبولىنىپ جاتقان قاراجات تا قوماقتى. سەبەبى وتكەن جىلدىڭ وزىندە گازداندىرۋ باعىتىندا 3,5 ملرد تەڭگە قارجى قاراستىرىلسا, وسى جىلدىڭ باسىندا ەلدى مەكەندەردى كوگىلدىر وتىنمەن قامتاماسىز ەتۋ ءۇشىن قوسىمشا 1,5 ملرد تەڭگە قارجى قاراستىرىلدى. ءبىزدىڭ اۋدانىمىزدا بۇعان دەيىن 28 ەلدى مەكەن, ياعني 46 پايىزى كوگىلدىر وتىنمەن قامتىلعان بولسا, 2025 جىلعا دەيىن بۇل كورسەتكىشتى 65 پايىزعا جەتكىزۋدى كوزدەپ وتىرمىز. بۇل ءۇشىن تولىق جوبالىق-سمەتالىق قۇجاتتارىمىز ازىرلەنىپ جاتىر», دەدى جامبىل اۋدانىنىڭ اكىمى نۇرلان ەرتاس.

ول تابيعي گازدىڭ كەلۋى اۋىلداردا بيزنەستىڭ كەڭەيۋىنە, كاسىپپەن اينالىساتىنداردىڭ كوبەيۋىنە وڭ اسەر ەتەتىنىن ايرىقشا اتادى.

«بيۋدجەت ەسەبىنەن بەرىلىپ جاتقان كوگىلدىر وتىننىڭ ەرەكشەلىگى – ەڭ الدىمەن حالىققا قولجەتىمدىلىگىندە. مىسالعا ايتساق, اۋدان ورتالىعىندا جەكە ينۆەستورلار سالعان گازعا قوسىلۋدىڭ باعاسى 350-380 مىڭ تەڭگەدەن بولسا, سامسى اۋىلىنىڭ تۇرعىندارى 200-220 مىڭ تەڭگەنىڭ توڭىرەگىندە تولەيدى. وسى باعانى ۇستاپ قالۋ – ءبىرىنشى كەزەكتەگى ماقساتىمىز», دەگەن اۋدان اكىمى جيىلعان جۇرتتى قۋانىشىمەن قۇتتىقتادى.

جيىن بارىسىندا اۋىل اقساقالدارى اعىنان جارىلدى. ولار سامسىعا كوگىلدىر گازدىڭ كەلۋىنە ىقپال ەتىپ, تابانىن توزدىرعان بەلسەندى ازاماتتاردىڭ اتىنا العىس ءبىلدىرىپ, اۋىلعا جاعداي جاسالسا, جاستار قالاعا كەتپەي, تۋعان جەرىن تۇلەتەتىنىن ايتتى.

«كوگىلدىر وتىننىڭ كەلۋىن كوپتەن كۇتتىك. وسىنىڭ ارقاسىندا كومىرگە كەتكەن شى­عىندارىمىز ازايادى. ەندى اۋىلدىڭ كوشەلەرى جارىقتانىپ, اسفالتتالسا, مادەنيەت ءۇيى سالىنسا, تۇرمىسىمىز بۇدان دا جاقسارا تۇسەدى», دەدى اۋىلدىق اقساقالدار كەڭەسىنىڭ توراعاسى مۇحتار نايمانحان ۇلى.

ءسويتىپ, سامسى اۋىلىنا كەلگەن كوگىلدىر گازدىڭ الاۋى سالتاناتتى تۇردە تۇتاتىلىپ, زەرلى كيمەشەك كيگەن اجەلەر شاشۋىن شاشىپ, ال اتالار اق باتاسىن بەرىپ, ارقا-جارقا بولدى.

«ۇيىمىزدە جاسى 80-نەن اسقان تىل ارداگەرى اتامىز بەن اپامىز بار. قاراشاڭىراقتىڭ كەلى­نىمىن, ءتورت بالامىز ءوسىپ كەلەدى. ءوزىم «ماي­بۇ­لاق» سۋ جۇيەسىندە ەڭبەك ەتەمىن. ەر­تەلى-كەش وت جاعۋ وڭايعا سوقپايدى. ۇلكەن كىسى­لەر مەن بالا-شاعا جاۋراپ قالماسىن دەپ الاڭ­داي­تىنبىز. گازعا قوسىلعالى جۇمىسىمىز جەڭىل­دەپ, ۋاقىتىمىز ۇنەمدەلىپ, راقاتتانىپ قالدىق», دەيدى قۋانىشىن جاسىرا الماعان دينا نۇرعالىموۆا.

الماتى وبلىسىندا 384 ەلدى مەكەننىڭ 294-ءى گازداندىرۋعا جاتادى. قازىرگى ۋاقىتتا 149 ەلدى مەكەن, ياعني 51 پايىزى گازداندىرىلىپ, بارلىعى 1,1 ملن ادام كوگىلدىر وتىنعا قول جەتكىزدى.

«شاڭىراقتارىڭىزعا كوگىلدىر وتىنمەن بىرگە قۇت-بەرەكە كەلسىن. بۇگىن تارعاپ پەن سامسى ەلدى مەكەنى قوسىلسا, كەلەر اپتا ۇلگىلى اۋىلى دا وسىنداي قۋانىشقا كەنەلەدى. 2023 جىلى گازداندىرۋعا وبلىستىق بيۋدجەتتەن 3,6 ملرد تەڭگە قاراستىرىلعان. سونىڭ نەگىزىندە اقتەرەك, ب.قىدىربەك ۇلى, جايسان, اقسەڭگىر, كوكدالا جانە قازىبەك بەك, دەگەرەس, بەرىكتاس اۋىلدارىنا تابيعي گاز قۇبىرىن جۇرگىزۋ جۇمىستارى باستالدى. ەلدى مەكەندەردى گازداندىرۋ جۇمىستارى ءوڭىرىمىزدىڭ ىلە, بالقاش, تالعار, ۇيعىر اۋداندارىندا دا جالعاسىپ جاتىر. بىلتىر باقاناس اۋىلىنىڭ 7 مىڭ تۇرعىنى تابيعي گازعا قول جەتكىزدى. سونداي-اق قوناەۆ قالاسىن دامىتۋدىڭ 2024-2025 جىلدارعا ارنالعان كەشەندى جوسپارىنا سايكەس, «جاڭا-ىلە», «قوناەۆ-2» اگتس قۇرىلىسى بويىنشا كونكۋرستىق راسىمدەردى وتكىزۋگە جانە №10, №9, №20, ارنا, سپۋتنيك, راۋان شاعىن اۋداندارىنا ينجەنەرلىك ينفراقۇرىلىمىنا ماگيسترالدىق گاز قۇبىرىن سالۋعا تەحنيكالىق قۇجاتتاما دايىندالىپ جاتىر. ونىڭ سمەتالىق قۇنى 3 077,203 ملن تەڭگەنى قۇرايدى. مۇنىڭ بارلىعى اۋىل تۇرعىندارىنىڭ تۇرمىسىن جەڭىلدەتە تۇسەدى», دەدى وبلىستىق تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى اسحات بەردىحانوۆ.

الماتى وبلىسى