جۋىردا رەسەي فەدەراتسياسىنا قاراستى بۋرياتيا رەسپۋبليكاسى اۋماعىنان عۇن داۋىرىندە قولادان قۇيىلىپ, تابانىنا ات ۇستىندەگى شاباندوز بەينەسى بادىزدەلگەن مورلەر تابىلدى.
بۇل جاڭالىق ەڭ اۋەلى رەسەي عىلىم اكادەمياسى ماتەريالدىق مادەنيەت تاريحى ينستيتۋتىنىڭ سايتىندا جاريالاندى. وسىنداعى ءباسپاسوز مالىمەتىنە قاراعاندا, جادىگەر كەزدەيسوق جاعدايدا تابىلعان. ال مورگە قاتىستى زەرتتەۋ جۇرگىزگەن ماماندار: ء«موردىڭ تابانىنا سالىنعان جىلقى مەن شاباندوز بەينەسى سول ءداۋىردىڭ اسكەري قولباسشىسى نەمەسە جەكەلەگەن باتىرعا ءتان گەرالديكالىق بەلگى بولۋى جانە موردەگى جالىن ءتارىزدى يرەك بەلگى ونىڭ يەسىنىڭ قۋات-كۇشىن ايگىلەيتىن تاڭبا بولۋى مۇمكىن», دەسە, تاعى بىرەۋلەر بۇل ءمور-تاڭبا جىبەك جولى بويىمەن جىلقى جەتكىزۋمەن اينالىساتىن ساۋداگەرگە تيەسىلى كىركە (پايزا), ياعني قۇقىقتىق مارتەبە بەرەتىن قۇجات دەيدى.
اتالعان جادىگەر تابىلعان بۋرياتيانىڭ وڭتۇستىگىندەگى دۋرەنى اۋلىنىڭ ماڭىنان رەسەيلىك ارحەولوگتەر 1979 جىلى عۇن يمپەرياسى ەليتا وكىلدەرىنىڭ مارتەبەسىن ايقىندايتىن اتريبۋتتارى بار يتبالىق, تاۋ ەشكى, ت.ب. زاتتاردى تاپقان ەدى. بۇل جادىگەرلەرگە عالىمدار «عۇن يمپەرياسىنىڭ سولتۇستىك شەكاراسى بيلىگىندە بولعان اقسۇيەكتەردىڭ وتباسىلىق بەلگىسى بولۋى مۇمكىن» دەگەن ءپاتۋا بەرگەن كورىنەدى. بۇل پايىم پەن جاڭادان تابىلعان جادىگەرلەرگە قاتىستى ايتىلعان تۇجىرىم سايكەس كەلىپ تۇر.