ولشەۋلى ءومىردىڭ ۇكىمىندەي ونكولوگيالىق اۋرۋلاردىڭ اتىنىڭ ءوزى ەستىگەن جاننىڭ ۇرەيىن تۋعىزادى. ال وسى دەرتتى دەنىنە جاماعان جۇرتتىڭ جاي-كۇيىن ويلاۋ تىپتەن اۋىر. تالاي زاماننان بەرى الەمنىڭ نەبىر بىلگىر دارىگەرلەرى تابانداپ, تالاپ قىلىپ وبىردى جەڭۋدىڭ تىڭ, ءتيىمدى تاسىلدەرىن تابۋعا تىرىسىپ-اق كەلەدى. وسى عالامدىق ماسەلەنى شەشۋگە اتسالىسقان وتاندىق عالىمدار ەڭبەگىنىڭ ناتيجەسى تاياۋدا بەلگىلى بولدى.
وسىناۋ اقجولتاي جاڭالىقتى عىلىم جانە جوعارى ءبىلىم ءمينيسترى ساياسات نۇربەك جەتكىزدى. ونىڭ ايتۋىنشا, وبىرعا قارسى جاڭا ءدارىنى وتانداسىمىز, عالىم دوس سارباسوۆ جاساپ شىعاردى. ول بۇگىندە نازارباەۆ ۋنيۆەرسيتەتىندە ەڭبەك ەتەدى.
«بيوتەحنولوگ دوس سارباسوۆ تەحاس ونكولوگيالىق ۋنيۆەرسيتەتىنىڭ اندەرسون زەرتحاناسىندا ۇزاق ۋاقىت جۇمىس ىستەدى. ول جاسۋشالىق تاماقتانۋعا ماماندانعان. وتانداسىمىز قاتەرلى ىسىك جاسۋشالارىنىڭ قورەكتىك ۇدەرىسىن بۇزۋدىڭ جولىن تابا الدى. بۇل – ونكولوگيالىق اۋرۋلارمەن كۇرەسۋدىڭ يننوۆاتسيالىق ءتاسىلى», دەدى س.نۇربەك.
ءمينيستردىڭ ايتۋىنشا, يننوۆاتسيالىق ءدارىنى الدىمەن قوياندار مەن تىشقاندارعا سىناعان. سوسىن ونكولوگيا ۋنيۆەرسيتەتىندە قاتەرلى ىسىكپەن اۋىراتىن 15 ادامعا وسى پرەپاراتتى قولدانىپ, سىناقتىڭ ءبىرىنشى كەزەڭى ءوتتى. ءبارى ويداعىداي بولسا, كەلەسى جىلى جاڭا ءدارىنى نارىققا شىعارۋ جوسپارلانىپ وتىر ەكەن.
«D-Vس قاتەرلى ىسىككە قارسى وتاندىق پرەپارات ازىرلەۋ» جوباسى بويىنشا جاسالىپ جاتقان بۇل ءدارىنىڭ الەمدە بالاماسى جوق. جاڭا پرەپارات وبىردىڭ اۋىر تۇرلەرىنە دۋشار بولعان ناۋقاستاردىڭ ءومىرىن ۇزارتاتىن ءتيىمدى ەم بولادى دەگەن سەنىم مول.