الەۋمەتتىك كودەكس كۇشىنە ەنگەن بىلتىرعى شىلدەدەن باستاپ مەملەكەتتىك الەۋمەتتىك قورعاۋ ينسپەكتورلارى ينستيتۋتى جۇمىسىن باستادى. بۇل قۇرىلىمنىڭ قۇزىرەتىنە مۇگەدەكتىگى بار ادامداردى الەۋمەتتىك قورعاۋ, ارناۋلى الەۋمەتتىك قىزمەتتەر كورسەتۋ جانە الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋ كىرەدى.
وسىلايشا, وتكەن جىلى ىسكە كىرىسكەن الەۋمەتتىك ينسپەكتورلار بارلىعى 1 127 تەكسەرۋ جۇرگىزدى. مۇنىڭ 551-ءى – پروفيلاكتيكالىق باقىلاۋ شەڭبەرىندە, 476-سى جوسپاردان تىس تەكسەرۋلەر بولدى.
ماسەلەن, ەڭبەك جانە الەۋمەتتىك قورعاۋ كوميتەتىنىڭ تۇركىستان وبلىسى بويىنشا دەپارتامەنتى شىمكەنت قالاسى تۇرعىنى, ءبىرىنشى توپ مۇگەدەكتىگى بار ازاماتتىڭ ءوتىنىشى نەگىزىندە تۇركىستان وبلىسى بويىنشا سانيتاريالىق-ەپيدەميولوگيالىق باقىلاۋ دەپارتامەنتىنە, «ۇلتتىق ساراپتاما جانە سەرتيفيكاتتاۋ ورتالىعى» شجق رمك جانە «بىركولىك» وڭالتۋ ساۋىقتىرۋ كەشەنى» جشس-نا جوسپاردان تىس تەكسەرۋلەر جۇرگىزدى. تەكسەرۋ ناتيجەلەرى بويىنشا لاۋازىمدى ادامدارعا انىقتالعان بۇزۋشىلىقتاردى جويۋ تۋرالى نۇسقاما بەرىلدى, سونداي-اق اكىمشىلىك جاۋاپكەرشىلىك شارالارى قابىلداندى.
ەڭبەك جانە الەۋمەتتىك قورعاۋ كوميتەتىنىڭ سولتۇستىك قازاقستان وبلىسى بويىنشا دەپارتامەنتى شال اقىن اۋدانىنىڭ ءبىلىم بولىمىنە جانە نوۆوپوكروۆكا اۋىلدىق وكرۋگى اكىمىنىڭ اپپاراتىنا وسى وبەكتىلەردىڭ قولجەتىمدىلىگى ماسەلەسى بويىنشا جوسپاردان تىس تەكسەرۋ جۇرگىزدى. مۇندا دا اكىمشىلىك جاۋاپكەرشىلىك شارالارى قابىلداندى.
سونداي-اق وڭىرلەردەگى الەۋمەتتىك ينسپەكتورلار مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ ءۇشىن الەۋمەتتىك ينفراقۇرىلىم وبەكتىلەرىنىڭ بەيىمدەلۋ ءىس-شارالارىن جۇرگىزۋدە وڭ وزگەرىس بار ەكەنىن اتاپ ءوتتى.
«اقمولا وبلىسىندا وبەكتىلەردىڭ قولجەتىمدىلىگى مەن جارامدىلىعىنا تۇراقتى نەگىزدە مونيتورينگ جۇرگىزىلەدى. جالپى, كوكشەتاۋ قالاسى بويىنشا مۇگەدەكتىگى بار ادامدار ءۇشىن ورتانىڭ قولجەتىمدىلىگى جاقسارىپ كەلەدى. نىسان يەلەرى حالىقتىڭ وسى ساناتى الدىنداعى الەۋمەتتىك جاۋاپكەرشىلىكتى تۇسىنەدى. ماسەلەن, اۋەلبەكوۆ كوشەسى, 94 مەكەنجايىنداعى №1 قالالىق ەمحاناعا بارعان كەزدە كىرەبەرىس ەسىكتەردىڭ اۋىستىرىلعانىن, سانيتارلىق-تۇرمىستىق بولمەنىڭ بەيىمدەلگەنىن بايقاۋعا بولادى. مەملەكەتتىك قىزمەتتەردىڭ بارلىق ءتۇرىن الۋعا بولاتىن كوكشەتاۋ قالاسىنىڭ حقو-لارى دا رەتتەلدى. «كوكشەتاۋ» جانە «دوستار» مادەنيەت ۇيلەرىندەگى قولجەتىمدىلىك كوڭىلگە قۋانىش ۇيالاتادى», دەدى اقمولا وبلىسىنىڭ تۇرعىنى, ءبىرىنشى توپتاعى مۇگەدەك رامازان مۇقاتاەۆ.
سونىمەن قاتار كوكشەتاۋ قالاسىنىڭ تۇرعىنى, ءبىرىنشى توپتاعى مۇگەدەكتىگى بار ليليا حارلاموۆانىڭ ايتۋىنشا, كوپتەگەن نىساندا قولايلى جاعداي جاسالىپ جاتىر. مىسالى, قالاداعى مەملەكەتتىك مەكەمەلەردە پاندۋستار, ناشار كورەتىندەرگە تاكتيلدى قۇرالدار ورناتىلىپتى. بۇعان قوسا «كريستالل», «سويۋز», «ريو», «رۋبين», «ورتالىق بازار» ساۋدا ۇيلەرىندە كەدەرگىسىز ورتا قالىپتاسقان ەكەن.
جالپى, ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرى 2023 جىلى 1 783 تەكسەرۋ جۇرگىزىپ, انىقتالعان بۇزۋشىلىقتاردى جويۋ تۋرالى 1 171 ۇيعارىم بەردى, 98,4 ملن تەڭگەدەن اسا سوماعا 467 ايىپپۇل سالىندى.