«ازاماتتارعا ارنالعان ۇكىمەت» مەملەكەتتىك كورپوراتسياسى بيىل اۆتوكولىكتەرگە ارنالعان VIP نومىرلەردىڭ باعاسى تۋرالى ايتتى, دەپ حابارلايدى Egemen.kz مەملەكەتتىك كورپوراتسيانىڭ ءباسپاسوز قىزمەتىنە سىلتەمە جاساپ.
«ازاماتتارعا ارنالعان ۇكىمەت» قازاقستاندا «VIP» نومىرلەردى ساتۋ تاجىريبەسى 2014 جىلى ەنگىزىلگەنىن ەسكە سالدى. ولاردى ساتۋدان تۇسكەن كىرىس رەسپۋبليكالىق بيۋدجەتكە تۇسەدى.
مەملەكەتتىك كورپوراتسيانىڭ مالىمەتىنشە, 2023 جىلى ەڭ جىلدام ساتىلعان نومىرلەر: 010, 020, 030, 040, 050, 060, 070, 077, 080, 090, 707. ءار ءنومىردىڭ باعاسى 57 اەك, ياعني 210 444 تەڭگەنى قۇرايدى (2024 جىل).
بۇل رەتتە VIP جەلىسىندەگى ەڭ قىمبات نومىرلەر قاتارىنا 001, 002, 003, 004, 005, 006, 007, 008, 009, 777 ساندارى كىردى. مۇنداي نومىرلەر 285 اەك, ياعني 1 052 220 تەڭگە تۇرادى.
سونىمەن قاتار قازاقستاندا «ادەمى» نومىرلەرگە سۇرانىس ارتقان.
«ازاماتتارعا ارنالعان ۇكىمەت» اگەنتتىگىنىڭ حابارلاۋىنشا, 2023 جىلى مامانداندىرىلعان حالىققا قىزمەت كورسەتۋ ورتالىقتارى 30 مىڭعا جۋىق جوعارى ەڭ ۇرانىسقا يە نومىرلەردى كولىك يەلەرىنە بەرگەن. مەنشىك يەلەرى ولار ءۇشىن 10 ميلليارد تەڭگەدەن استام اقشا تولەگەن. ال 2022 جىلى ەل ازاماتتارى VIP نومىرلەرگە جالپى 7 ميلليارد تەڭگەدەن استام قارجى جۇمساعان.
وتكەن جىلى قازاقستان بويىنشا مامانداندىرىلعان حالىققا قىزمەت كورسەتۋ ورتالىقتارىندا 3,2 ميلليوننان استام كولىك تىركەلىپ, 1,1 ميلليون جۇرگىزۋشىگە كۋالىك بەرىلدى.