تالدىقورعان قالاسىنىڭ ىرگەسىندەگى ىنتىماق اۋىلىندا كوپتەن كۇتكەن №30 مەكتەپتىڭ ەسىگى اشىلدى. بۇل ءبىلىم ورداسىنىڭ جارتىسى جەمقورلىقتان تاركىلەنگەن قاراجاتقا سالىنعان. 1200 بالاعا شاقتالعان شاڭىراق بارلىق تالاپقا ساي, ءتىپتى وقۋشىنىڭ جەكە شىعارماشىلىعىمەن اينالىسۋىنا بولادى. سان ءتۇرلى ۇيىرمە, سپورتتىق سەكتسيالار ماڭايداعى اۋىل بالالارىنىڭ قۋانىشىن ەسەلەدى.
كۇمىس كۇلكىسى سىڭعىرلاعان جاس وسكىندەر مەن عۇمىرىن ءبىلىم جولىنا ارناپ كەلە جاتقان ۇستازدار قاۋىمى, اتا-انالار قۋانىشتى ساتكە كوزايىم بولىپ, مەكتەپتىڭ اشىلۋ سالتاناتىن اسقاق كوڭىلمەن وتكەردى. جەتىسۋلىق زيالى قاۋىم, ەل جاقسىلارى مەن شاھار تۇرعىندارى قاتىسقان №30 ورتا مەكتەپتىڭ اشىلۋ سالتاناتىندا العاشقى بولىپ وبلىستىق ءبىلىم باسقارماسىنىڭ باسشىسى مارات سۇلەيمەنوۆ ءسوز الدى.
«مەملەكەت باسشىسى وسكەلەڭ ۇرپاقتىڭ تەرەڭ ءبىلىم, ءتالىمدى تاربيە الۋىنا بارلىق جاعداي جاساۋدى مىندەتتەدى. سوعان وراي ەلىمىزدە, سونىڭ ىشىندە وڭىرىمىزدە دە ءبىلىم سالاسىن دامىتۋعا بارىنشا قولداۋ كورسەتىلىپ جاتىر. «جايلى مەكتەپ» ۇلتتىق جوباسى اياسىندا وبلىستا 7 مەكتەپ, سونىڭ 3-ءۋى تالدىقورعان قالاسىندا سالىنادى. سول سياقتى وتكەن جىلى 10 ءبىلىم نىسانىنىڭ قۇرىلىسىن اياقتاۋ جوسپارلانعان, سونىڭ ءبىرى – وسى ىنتىماق اۋىلىنداعى بۇگىن ەسىگىن ايقارا اشىپ وتىرعان 1200 ورىندى ءبىلىم ورداسى», دەدى م.سۇلەيمەنوۆ.
بۇگىندە مەكتەپكە 661 وقۋشى قابىلداندى, 31 كلاسس كومپلەكتىسى اشىلدى. ونىڭ ىشىندە, وتەناي اۋىلىنداعى №21 ورتا مەكتەپتەن 13 سىنىپ, 345 وقۋشى كوشىپ كەلگەن. ولار جەتەكشىسىمەن جاڭا مەكتەپكە بىرگە اۋىسىپ, وقۋشىلاردى تاسىمالداۋ ماسەلەسى شەشىلدى. سونىمەن قاتار پەداگوگتەرگە 30 بوس ورىن جانە 20 كىشى قىزمەتكەرگە كونكۋرس جاريالانىپ, قابىلدانۋدا.
ءوز كەزەگىندە ءسوز العان ارداگەر ۇستاز مينۋار بايمولدانوۆا دا ءبىلىم مەن ونەر تۇرعىسىندا ورەلى ويلارىن ايشىقتاپ, ىزگى تىلەگىن ارنادى. كەلەسى كەزەكتە مەكتەپ قۇرىلىسىنا جاۋاپتى مەردىگەر كومپانيا «گۋنن ستروي سەرۆيس» جشس باس ديرەكتورى ءسابيت قاليمولداەۆ جاڭا نىساننىڭ كىلتىن مەكتەپ ديرەكتورى ساۋلە ۇسەنوۆاعا تابىس ەتتى. ءان اسقاقتاپ, بي بيلەنگەن شارا بارىسىندا مەكتەپ لەنتاسىن وبلىستىق ءبىلىم باسقارماسىنىڭ باسشىسى م.سۇلەيمەنوۆ پەن ارداگەر ۇستاز م.بايمولدانوۆا قيدى.
جاڭادان اشىلعان مەكتەپ زاماناۋي تالاپقا ساي جابدىقتالعان. وقۋشىلاردىڭ ساپالى ءبىلىم الۋىنا بارلىق مۇمكىندىكتەر جاسالعان. مەكتەپتە 50 ورىندى وقۋ زالىمەن كىتاپحانا, سپورت زال, گيمناستيكالىق زال, 405 ورىندى اسحانا, 390 ورىندى ءماجىلىس زالى, 2 فيزيكا, 2 حيميا, 2 بيولوگيا جاڭا موديفيكاتسيالىق كابينەت, 4 مۋلتيمەديالىق كابينەت, 2 ۇلدار شەبەرحاناسى, 2 قىزدار شەبەرحاناسى بار. سونىمەن قاتار بارلىق ءپان كابينەتتەرى قاجەتتى ادىستەمەلىك, تەحنيكالىق قۇرالدارمەن جابدىقتالعان.
ادامنىڭ جاقسى بولماعى اتا-انا, ۇستاز بەن ءومىر سۇرگەن ورتاسىنا بايلانىستى ەكەنىن اباي بابامىز ايشىقتاپ كەتكەن. بۇگىندە حاكىم ايتقان ۇشتاعاندى تاربيەنى نىقتاۋ وزەكتى ماسەلە. بۇل رەتتە ءبىلىم وشاقتارىنىڭ ماڭىزى زور. ەندەشە ۇلت پەن ۇرپاق بولاشاعى ءۇشىن بوي كوتەرگەن وسىنداي ءزاۋلىم رۋحاني عيماراتتار كوبەيە بەرسىن دەمەكپىز.
جەتىسۋ وبلىسى