بۇگىندە اۋستراليادا تەننيستەن ءوتىپ جاتقان دۇركىن-دۇركىن تۋرنيرلەردە وتانداستارىمىز جاقسى ونەر كورسەتىپ جاتىر.
اتاپ ايتقاندا, ەلىمىزدىڭ ءبىرىنشى, الەمنىڭ 31-راكەتكاسى الەكساندر بۋبليك ادەلايدە ATP 250 تۋرنيرىندە شيرەك فينالعا شىقتى. ول العاشقى كەزدەسۋىن دۇنيەجۇزىلىك رەيتينگىدە 278-ورىندا تۇرعان اۋستراليالىق دجەيمس ماككەيبپەن وتكىزىپ, ايقىن باسىمدىق تانىتتى – 6:2, 6:3. ال ەكىنشى ماتچىندا بريتانيالىق دەنيەل ەۆانسپەن جولىعىپ, ويىن تاعدىرى ءۇش سەتتە شەشىلدى. ءسويتىپ, 4:6, 6:2, 6:1 ەسەبىمەن ا.بۋبليك جەڭدى.
سونداي-اق ەلىمىزدىڭ جۇپتىق سىنداعى ءبىرىنشى, الەمنىڭ 46-راكەتكاسى الەكساندر نەدوۆەسوۆ تە ادەلايدە ATP 250 ءتۋرنيرىنىڭ شيرەك فينالىنا شىقتى. ول ەكۆادورلىق گونسالو ەسكوبارمەن بىرگە ەكىنشى اينالىمدا جارىستىڭ 7-راكەتكالارى, ۇلىبريتانيالىق للويد گلaسسپۋل – نيدەرلاندتىق جان-جيۋلەن رويەرمەن كەزدەستى. ەسەپ – 6:4, 6:4.
تاعى ءبىر وتانداسىمىز بەيبىت جۇقاەۆ اۋستراليا اشىق چەمپيوناتىنىڭ ىرىكتەۋ سايىسىن جەڭىسپەن باستادى. ول ىرىكتەۋ سايىستارىنىڭ شيرەك فينالىندا دۇنيەجۇزىلىك رەيتينگىدە 511-ورىندا تۇرعان اۋستراليالىق نيكولاس كيكەردى 6:1, 6:4 ەسەبىمەن جەڭدى.