قىزىلوردا قالاسىنىڭ ىرگەسىنەن ورىن تەپكەن بەسارىق – جۇرتى جاڭالىق پەن جاقسىلىققا جۇمىلعان اۋىل. بۇگىندە سىرداريا اۋدانىنا قاراستى بۇل اۋىلداعى ءار شاڭىراق مال ۇستاپ, وبلىس ورتالىعىن ەتپەن قامتاماسىز ەتىپ وتىر. جىل توعىسىندا وسى بەرەكەلى بەسارىقتا بودەنە فەرماسى اشىلدى.
وبلىس اكىمى نۇرلىبەك نالىباەۆ اۋىل تۇرعىندارىن قۇتتىقتاپ, تىڭ كاسىپ باستاپ وتىرعان «اباي-داۋلەت» جشس باسشىلىعىنا تابىس تىلەدى.
– وسىدان ءسال ۋاقىت بۇرىن, تاۋەلسىزدىك كۇنى قارساڭىندا مەملەكەت باسشىسى بيزنەستىڭ الەۋمەتتىك جاۋاپكەرشىلىگى جونىندەگى «پارىز» رەسپۋبليكالىق كونكۋرسىنىڭ گران-پري جۇلدەسىن «اباي-داۋلەت» جاۋاپكەرشىلىگى شەكتەۋلى سەرىكتەستىگىنە تابىس ەتكەنى ءوڭىر جۇرتشىلىعىنىڭ ورتاق قۋانىشىنا اينالدى. بۇل جۇلدە – وسى كاسىپورىننىڭ عانا ەمەس, سىر جۇرتشىلىعىنىڭ جەڭىسى, وبلىستاعى بارلىق كاسىپكەرلەرگە بەرىلگەن جوعارعى باعا. ايماقتا ازىق-ت ۇلىك قاۋىپسىزدىگىن قامتاماسىز ەتۋ باعىتىنداعى ماڭىزدى جوبانى قولعا الىپ, بودەنە فەرماسىن سالعان كاسىپكەر, «اباي-داۋلەت» جشس جەتەكشىسى مۇرات سارسەنباەۆقا سىر جۇرتشىلىعى اتىنان شىنايى ريزاشىلىعىمىزدى ءبىلدىرىپ, العىسىمىزدى ايتامىز, – دەدى وبلىس اكىمى.
بەسارىقتىڭ بەرەكەسىن ۇستەپ وتىرعان «اباي-داۋلەت» جشس كۇرىش, قۇس, مال وسىرۋمەن, تاماق ءوندىرىسى جانە قۇرىلىس ماتەريالدارىن شىعارۋمەن اينالىسىپ, 200-گە جۋىق ادامدى جۇمىسپەن قامتىپ وتىر.
اۋىلداعى بودەنە فەرماسى جىلىنا 1 500 توننا قۇس ەتىن وندىرەدى. مۇنداعى 80 مىڭ باس قۇستىڭ جارتىسى ەت, قالعانى جۇمىرتقا باعىتىندا باعىلادى. كاسىپورىن تولىق قۋاتقا كوشكەندە 160 ادامدى جۇمىسپەن قامتيدى.
جالپى, بيىل قىزىلوردا وبلىسىندا شاعىن جانە ورتا بيزنەس سۋبەكتىلەرىنىڭ سانى 10,3 پايىزعا ارتىپ, 70 977-گە جەتكەن. كاسىپكەرلىكتى قولداۋعا ءارتۇرلى كوزدەردەن 42 ملرل تەڭگە تارتىلىپ, 3,5 مىڭنان استام جوباعا قاراجات ءبولىندى.
قىزىلوردا