2022 جىلدىڭ سوڭىندا جەرگىلىكتى قالامگەرلەرمەن كەزدەسكەن وبلىس باسشىلىعى جەرگىلىكتى قازىنادان 50 ميلليون تەڭگە قارجى ءبولىپ, جامبىلدىق اقىن-جازۋشىلاردىڭ جيناعىن شىعارۋعا ۋادە بەرگەن بولاتىن.
ءوڭىر باسشىسى ەربول قاراشوكەەۆ باياندى باستامانى اياعىنا دەيىن جەتكىزدى. بيۋدجەتتەن بولىنگەن قاراجاتقا قازاقستان جازۋشىلار وداعىنىڭ وڭىردەگى مۇشەلەرىنىڭ جانە بىرنەشە اۆتوردىڭ پوەزيا, پروزا جانرىنداعى جيناقتارى جارىق كوردى. جوبا اياسىندا قالامگەرلەرگە قالاماقى بەرىلمەك.
كىتاپتاردىڭ تۇساۋكەسەرىنە قاتىسقان وبلىس اكىمى ەربول قاراشوكەەۆ الداعى ۋاقىتتا دا قالامگەرلەردى قولداۋ ماقساتىندا بىرقاتار جۇمىستار قولعا الىناتىنىن ايتتى. ءىس-شارا بارىسىندا ەربول قاراشوكەەۆ زيالى قاۋىم وكىلدەرى ايتقان ماڭىزدى ۇسىنىستاردى زەردەلەپ, مادەنيەت, رۋحانيات باعىتىنداعى وزەكتى ماسەلەلەردى تالقىلادى.
كەزدەسۋدە وڭىردە ادەبي ورتا قۇرۋ, ءبىلىم مەن مادەنيەت وشاقتارىنىڭ سانىن ارتتىرۋ, قالامگەرلەردىڭ شىعارماشىلىعىن كوپشىلىك اراسىندا ناسيحاتتاۋ سەكىلدى ماسەلەلەر كوتەرىلدى.
جامبىلدىق قالامگەرلەردىڭ جيناقتارىن باسىپ شىعارعان «اباي» باسپاسىنىڭ ديرەكتورى, اقىن اقبەرەن ەلگەزەك «اۋليەاتا» سەرياسى جوباسىن ىسكە اسىرۋ, اقىن-جازۋشىلاردىڭ قالاماقىسىن رەتكە كەلتىرۋ تۋرالى پىكىرىن ورتاعا سالدى.
ەربول قاراشوكەەۆ بارلىق ۇتىمدى ۇسىنىس-پىكىرلەردى قولداپ, ولاردىڭ مىندەتتى تۇردە نازارعا الىناتىنىن ايتتى. سونداي-اق ول ءوز سوزىندە «اۋليەاتا» سەرياسى اياسىندا كىتاپحانا قورىن مولايتۋ, كىتاپتاردىڭ ەلەكتروندىق نۇسقاسىن جاساۋ ىسىنە كوڭىل ءبولۋ قاجەتتىگىنە توقتالىپ, ماحاببات رامىزىنە اينالعان قاراحان مەن ايشا بيبىگە ارناپ پوەما, رومان جازىلسا, فيلم تۇسىرۋگە قولداۋ كورسەتۋگە نيەتتى ەكەنىن جەتكىزدى.
تاراز