استانا قالاسىنىڭ وقۋشىسى كەمەل ءجۇسىپوۆ ءوزىنىڭ تۋعان كۇنىندە پرەزيدەنتكە حات جازدى. حاتىندا ول قاسىم-جومارت توقاەۆتىڭ قولتاڭباسى جازىلعان «اكە تۋرالى وي-تولعاۋ» كىتابىن سىيلىققا العىسى كەلەتىنىن, سونداي-اق پرەزيدەنتتى كورگىسى كەلەتىنىن جازدى, دەپ حابارلايدى Egemen.kz.
«قۇرمەتتى قاسىم-جومارت كەمەل ۇلى, مەنىڭ اتىم ءسىزدىڭ اكەڭىزدىڭ ەسىمىمەن اتتاس - كەمەل. بۇگىن مەنىڭ تۋعان كۇنىم جانە وسىدان تۋرا 12 جىل بۇرىن اتا-انام ماعان بۇل ەسىمدى قويعان. مەن استانا قالاسىندا تۇرامىن جانە وسى جەردە وقيمىن. مەنىڭ سۇيىكتى پاندەرىم - قازاقستان تاريحى, دۇنيەجۇزىلىك تاريحى جانە گەوگرافيا. ءارتۇرلى ەلدەردىڭ بانكنوتتارى مەن تيىندارىن دا جينايمىن. مەن ساياحاتتاۋدى جاقسى كورەمىن جانە الەمنىڭ ءتورت ەلىندە بولدىم.
مەن بۇكىل الەمدى ساياحاتتاۋدى ارماندايمىن. مەن ءار ساپارىمدا جاڭا ادامدارمەن تانىسىپ, ارالاسامىن. ءسىزدى كورىپ, سىزبەن سويلەسىپ, قولتاڭباڭىز جازىلعان «اكە تۋرالى ءسوز» كىتابىن الۋدى ارماندايمىن. مەنىڭ حاتىمدى وقىپ, ارمانىم ورىندالادى دەپ سەنەمىن», دەپ جازدى ءجاسوسپىرىم.
بالانىڭ ايتۋىنشا, 21 جەلتوقساندا ونىڭ ارمانى ورىندالدى. ول اناسىمەن بىرگە پرەزيدەنت اكىمشىلىگىنە شاقىرىلدى, سونداي-اق سىيلىققا كىتاپ الدى.
«كەمەل جۇسىپوۆكە ومىردە اق جول تىلەيمىز! ازامات بول!», دەپ مەملەكەت باسشىسى قول قويدى.
بالا سىيلىق ءۇشىن ەل پرەزيدەنتىنە العىسىن ءبىلدىردى.
«پرەزيدەنت مەنىڭ حاتىمدى وقىدى. ال مەن قاسىم-جومارت كەمەل ۇلى توقاەۆتىڭ قولتاڭباسى مەن تىلەكتەرى جازىلعان كىتاپتى سىيلىق رەتىندە الدىم. مەنىڭ ارمانىم ورىندالدى, مەن وعان ءالى سەنبەيمىن. سىزگە كوپ راحمەت», دەپ بالا Instagram جەلىسىندە العىسىن ءبىلدىردى.