كەشە اقتاۋ قالاسىنداعى Yessenov University-دە ماڭعىستاۋ وبلىسى اكىمىنىڭ ورىنباسارى قانات قۇلجانوۆتىڭ قاتىسۋىمەن مەملەكەتتىك قىزمەت سالاسىنىڭ ارداگەرى, قوعام قايراتكەرى, ماڭعىستاۋ وبلىسىنىڭ قۇرمەتتى ازاماتى ساقىپ بۇركىتباي ۇلى كەرەلباەۆ اتىنداعى وقۋ-اۋديتوريانىڭ سالتاناتتى اشىلۋ ءراسىمى ءوتتى.
اتالمىش جاڭا وقۋ اۋديتورياسى كوركەم بەزەندىرىلىپ, اتالمىش تۇلعا حاقىندا كوپتەگەن مالىمەتتەر مەن فوتوسۋرەتتەرى ياكي جازعان ەڭبەكتەرى ەرەكشە كورىنىس تاپقان.
سالتاناتتى راسىمنەن كەيىن Yessenov University-ءنىڭ ءماجىلىس زالىندا «ماڭعىستاۋدىڭ الەۋمەتتىك-ەكونوميكالىق دامۋى جانە س.كەرەلباەۆ فەنومەنى» اتتى عىلىمي-كوپشىلىك جيىنى ءوتتى.
عىلىمي جيىندا ماڭعىستاۋ وبلىسى اكىمىنىڭ ورىنباسارى قانات قۇلجانوۆ رەسمي قۇتتىقتاۋ سوز سويلەسە, سودان كەيىن قايراتكەر س. كەرەلباەۆ حاقىندا زامانداس دوستارى, ۇزەڭگىلەس ارىپتەستەرى: دارجوك سەيباعىتوۆ, قايروللا ەرەجەپوۆ, اقمونشاق باۋجانوۆا, جالعاس جاپاقوۆ, نۇرنياز مۇقانوۆ, سالامات نۇر ۇلى ت.ب. جانە Yessenov University-ءنىڭ پروفەسسور-عالىمى, فيلولوگيا عىلىمدارىنىڭ كانديداتى, «قازاق فيلولوگياسى» كافەدراسىنىڭ قاۋىمداستىرىلعان پروفەسسورى ادىلەت قابىلوۆ, تۋعان-تۋىستارى اتىنان اعاسى, قازكسر ەڭبەك سىڭىرگەن دارىگەرى سايىن كەرەلباەۆ تۇششىمدى ەستەلىكتەرىمەن ءبولىستى.
- ماڭعىستاۋ وڭىرىندە قىزمەتىمىزدىڭ بارىسىندا تالاي-تالاي ەل اعالارىمەن ارالاسىپ, قويان-قولتىق بايلانىستا كەلەمىز. سولاردىڭ اراسىندا ءوز ورنى ەرەكشە, ەسىمى رەسپۋبليكامىزعا ءمالىم, مەملەكەتتىك قىزمەت سالاسىنىڭ قىزمەتكەرى, قوعام قايراتكەرى, مارقۇم ساقىپ كەرەلباەۆ اعامىزدىڭ ازاماتتىعى مەن پاراساتتىلىعى ءبىر الابوتەن ەدى.
ارداقتى اعامىز وڭىرىمىزدەگى جالعىز ءبىلىم ورداسى Yessenov University-نە ءاردايىم قولداۋ كورسەتىپ, بىزدەرگە كەرەك جەرىندە اقىل-كەڭەسىن ۇسىنىپ, ىلعي جاقسى قارىم-قاتىناستا ارالاسقان تۇعىنبىز. پاراساتتى تۇلعانىڭ ورتامىزدا بيىل جوقتىعىنا دا 2 جىلدان اسىپ بارادى.
ماڭعىستاۋ ولكەسىندە ساقىپ بۇركىتباي ۇلىن بىلمەيتىن جان كەمدە كەم شىعار. اعامىزدىڭ ەتكەن ەڭبەگى مەن ەرەن ىستەرى ەشۋاقىتتا حالقىنىڭ ەسىنەن جانە جۇرەك تۇكپىرىنەن وشپەسى انىق. بۇگىنگى اشىلعان وقۋ اۋديتورياسىندا ءبىلىم الاتىن قانشاما مىڭ ستۋدەنت شاكىرتتەرىمىز اعا ەسىمىن ۇلىقتاپ, ەڭبەكتەرىنە قانىعىپ وسەتىندەرى ايدان انىق.
ابزال ازامات, پاراساتتى باسشى, كەمەڭگەر تۇلعا ساقىپ كەرەلباەۆ ەسىمى ۋاقىت وتكەن سايىن بيىكتەي ءتۇسىپ, وسكەلەڭ جاسۇرپاققا جالعاسا بەرەرى حاق, - دەدى قۇتتىقتاۋ سوزىندە Yessenov University-ءنىڭ پرەزيدەنتى بەرىك احمەتوۆ.
قوعام قايراتكەرى ساقىپ بۇركىتباي ۇلى وردابۇزار وتىزدىڭ ورتاسىندا ماڭعىستاۋ اۋدانىنىڭ ءبىرىنشى باسشىسى لاۋازىمىنا تاعايىندالىپ, ەردىڭ جاسىنا جەتكەندە وبلىس باسشىلىعىندا ۇزاق جىل ابىرويمەن قىزمەت اتقارعانىن بىلەمىز. سول تۇستا قويىن-قولتىق جۇمىس ىستەگەن اۋداندىق ءماسليحاتتىڭ حاتشىسى قىزمەتىن اتقارعان جالعاس جاپاقوۆ اقساقال: - ساقىپ – بۇرىنعى بابالار ءسوزىن قۇرعاق جاتتاماي, قايتالاماي, بۇگىنگى كۇن تۇرعىسىنان, ومىرمەن, بۇگىنگى شىندىقپەن بايلانىستىرا سويلەيتىن, اقىلدى, شەشەندىك, كوسەمدىك ءسوز ۇلگىسىن ۇستانعان بۇگىنگىنىڭ ءبيى, – دەدى ەل اعاسى ەستەلىگىن ءبولىسىپ.
ءوز ەڭبەكتەرىندە ساقىپ اعامىز بىلاي دەيدى:«ۋاقىت شىركىن جاۋ وعىنداي جىلدام ەكەن. ونىڭ جىلدامدىعىنا ۇشقان قۇس تا, جۇگىرگەن اڭ دا, تۇياقتى تۇلپار دا ىلەسە الماسىنا كۇن سايىن كۋا بولىپ كەلەمىز. تاڭمەن تالاسا باستالاتىن تىرشىلىكتە تاعىلىمدى تارتۋ جاساي الساڭ, ۋاقىتىڭنىڭ زايا كەتپەگەنى بولار. وسى رەتتە جاسىڭ ۇلعايىپ, قاتارلاستارىڭ ازايىپ, كوڭىل كوكجيەگىڭ كەڭىپ, ساناڭ سارعايعان سايىن وتكەن ءومىرىڭ ەسكە كوبىرەك تۇسە باستايدى ەكەن», – دەپتى. ءيا, ۋاقىتتىڭ جۇيرىكتىگىن, تىرلىكتىڭ تۇرلاۋسىزىن ءبارىمىز بىلەمىز. ايتسە دە, ءومىر كورگەن كىسىنىڭ ءسوزى سانامىزعا ءوتىمدى, جۇرەگىمىزگە جەتىمدى بولماق. ويتكەنى وسى اقيقاتقا ابدەن كوزى جەتكەن ازامات ءوزى ومىردەن وتسە دە, ارتىنا ولمەيتىن اتىن, وشپەيتىن حاتىن قالدىرىپ كەتتى. ەندەشە, ودان كارىمىز دە, جاسىمىز دا ۇلگى-ونەگە الۋىمىز قاجەت-اق.
Yessenov University-ءنىڭ «مەنەدجمەنت» كافەدراسىنىڭ جانىنان جاساقتالعان س.كەرەلباەۆ اتىنداعى وقۋ اۋديتورياسىندا ستۋدەنتتەر نەگىزىنەن مەنەدجمەنت, مەملەكەتتىك جانە جەرگىلىكتى باسقارۋ ببب بويىنشا ءبىلىم الادى. ايتسە دە, ساقىپ كەرەلباەۆتىڭ تاعى ءبىر قىرى – قالامگەرلىك قابىلەتىن ناسيحاتتاۋ دا نازاردان تىس قالمايدى. جاستارعا كەرەلباەۆتىڭ قالامىنان شىققان كىتاپتاردى وقىتۋ دا جوسپارلانىپ وتىر.