ەلىمىز تاۋەلسىزدىك العاننان كەيىن الەمدىك تاجىريبەگە سۇيەنىپ ەكى دەڭگەيلى بانك جۇيەسىن تاڭداپ الدىق. ويتكەنى بۇل جۇيەنى وزگە مەملەكەتتەردىڭ باسىم بولىگى قولداناتىن ەدى. ونىڭ ءبىرىنشىسى – مەملەكەتتىك مەكەمە قۇزىرىنداعى ورتالىق بانك بولسا, قالعاندارى ەكىنشى دەڭگەيلى بانكتەر (ەدب) سانالدى. بۇگىندەرى ەلىمىزدىڭ باس قارجى رەتتەۋشىسى – ۇلتتىق بانك ەلدەگى ينفلياتسيانى باسەڭدەتۋ, باعانىڭ تۇراقتىلىعىن, اقشا-كرەديت ساياساتىن ازىرلەپ, تولەم جۇيەسىنىڭ جۇمىسىن, ۆاليۋتالىق رەتتەۋ مەن ونى باقىلاۋدى جۇزەگە اسىرىپ وتىرعان جايى بار.
حالىققا نەسيە بەرەتىن, ولاردان دەپوزيت جينايتىن, ءتۇرلى تولەمدەر جۇرگىزەتىن وزىمىزگە ۇيرەنشىكتى ەكىنشى دەڭگەيلى بانكتەردىڭ بيىلعى جىلدىڭ ون ايىنداعى پايداسى 1,78 ترلن تەڭگەگە جەتىپ, بىلتىرعى جىلدىڭ سايكەس كەزەڭىمەن سالىستىرعاندا 53,8%-عا ارتىق شىقتى. اتالعان بانكتەر وندىعىنداعى ەڭ جاقسى كورسەتكىش وتباسى بانكىندە, بىردەن پليۋس 62,8%. جىل ىشىندە 127,8 ملرد تەڭگەنى قۇراعان.
وتكەن جىلى وسى بانكتىڭ تازا پايداسى 96 ملرد تەڭگەنى قۇراپ, ءوسىم 46%-عا جەتكەن. ءتۇرلى وپەراتسيالاردى قامتاماسىز ەتەتىن قارجى نارىعىنداعى بەلسەندىلىگى بىرقالىپتى. ءتيىمدى تۇرعىن ءۇي قۇرىلىس جيناق جۇيەسى جانە قولجەتىمدى تۇرعىن ۇيمەن قامتاماسىز ەتۋدىڭ جاڭا مەملەكەتتىك باعدارلاماسى ارقاسىندا وتباسى بانكى جۇرتشىلىقتى قولداۋدىڭ ماڭىزدى ينستيتۋتىنا اينالىپ وتىر دەۋگە بولادى. بۇگىندەرى تۇرعىن ءۇي قۇرىلىس جيناق جۇيەسىنە قاتىسۋشىلاردىڭ سانى ارتىپ, بانكتىڭ دەپوزيتتىك بازاسى مەن نەسيەلەۋ كولەمىنىڭ ۇلعايۋى جوعارى تابىستىلىق كورسەتكىشتەرگە جەتۋدە. اتالعان بانك وتكەن جىلى تولىق پايدانىڭ 70 پايىزىن نەمەسە 67,2 ميلليارد تەڭگەنى ديۆيدەنت تۇرىندە «بايتەرەك» ۇلتتىق باسقارۋشى حولدينگىنە اۋدارعان. بۇل – بارلىق «بايتەرەك» ۇبح» اق كومپانيالارى اراسىنداعى ەڭ ماڭىزدى سوما. الدىنعى جىلى دا بۇل قارجى ينستيتۋتى ءوزىنىڭ تازا تابىسىنىڭ شامامەن 50 پايىزىن نەمەسە 32,9 ميلليارد تەڭگەنى باس كومپانياعا ديۆيدەندتەر تولەۋگە بولگەن.
ال كىرىستىك ءوسىمى جاعىنان ەلدەگى ءىرى بانكتەر اراسىندا Kaspi Bank ەكىنشى ورىندا. ءبىر جىل ىشىندە – 33,8%, 390,9 ملرد تەڭگە. ۇزدىك ۇشتىكتى ەۋرازيالىق بانك 26,3%-بەن قورىتىندىلايدى. كىرىستىك ءوسىم 97,2 ملرد تەڭگەنى قۇراعان.
پايىزدىق كورسەتكىشى تومەن حالىق بانكى –25,2%, Jusan Bank – 24,1%, Bank RBK – 20,3% جانە ForteBank (10,7%) ءوسىم كورسەتتى. بيىل بىردە-ءبىر قارجى ينستيتۋتى ەشقانداي شىعىن كورسەتپەدى. ءبىر جىل بۇرىن ەكىنشى دەڭگەيلى نەگىزگى بانكتەردىڭ ىشىندە بەرەكە بانكى (وتاندىق بانكتەردىڭ توبىنا كىرگەن بۇرىنعى رەسەيلىك جيناق بانكى) بەلگىلى سەبەپتەرمەن شىعىنعا ۇشىراعان بولاتىن. الايدا بيىل قارجى ينستيتۋتى ءوز ورنىن قالپىنا كەلتىرىپ, از دا بولسا 19,4 ملرد تەڭگە كولەمىندە پايدا ءتۇسىردى. ەدب اراسىندا ەڭ ءىرى بانك سانالاتىن تسەنتركرەديت بانكى بىلتىرعى جىلمەن سالىستىرعاندا نەبارى 115,1 ملرد تەڭگەگە تولەم جاساپ, ءبىر جىل بۇرىنعى كورسەتكىشىنەن بىردەن 13,9%-عا ازايدى.