قوستانايداعى جاستار سارايىندا «تۇركى الەمى» حالىقارالىق ەتنوفەستيۆالى ءوتتى. باۋىرلاس ەلدەردىڭ اراسىنداعى مادەني بايلانىستىڭ بەكي تۇسۋىنە سەپتىگى مول ءداستۇرلى ءىس-شاراعا قوستاناي وبلىسىنىڭ ونەرپازدارى, وزبەكستان, قىرعىزستان جانە باشقۇرتستان رەسپۋبليكاسىنان كەلگەن ونەر ۇجىمدارى قاتىستى.
جالپى, «تۇركى الەمى» فەستيۆالىن العاش ۇيىمداستىرىپ, ءجون-جوسىعىن كورسەتىپ جولعا قويىپ كەتكەن تالانتتى كۇيشى, قوستانايداعى قازاق وركەسترىنىڭ نەگىزىن قالاپ, قۇرامىن قالىپتاستىرعان مارقۇم نازىمبەك مولداحمەتوۆ ەدى. ءتۇبى ءبىر تۇركى حالىقتارىنا ورتاق ونەر مەرەكەسى سودان بەرى ۇزىلمەي جالعاسىپ كەلەدى.
فەستيۆال اياسىندا باشقۇرتستاننىڭ «دەرت», قىرعىزستاننىڭ «كۇۇ بۋلاك», وزبەكستاننىڭ «تاراننۋم» انسامبلدەرىنىڭ جەتەكشىلەرى, سونىمەن قاتار وزبەكستاننىڭ حالىق ءارتىسى, ديريجەر فارۋح سادىقوۆ قاتىسقان جيىن ءوتتى. مەيماندار فەستيۆالدىڭ ءمان-ماڭىزىن, ەرەكشەلىگىن تىلگە تيەك ەتىپ, ۇيىمداستىرۋشىلارعا ريزاشىلىق ءبىلدىردى.
«قازاقتىڭ ۇلتتىق مۋزىكاسى وتە باي. بۇل ەلدە حالىقارالىق دەڭگەيدە وتەتىن بايقاۋ-فەستيۆالدار وتە كوپ. سونىسىمەن كوبىمىزگە ۇلگى. ونىڭ ىشىندە جىل سايىن قوستانايدا ءوتىپ تۇراتىن «تۇركى الەمى» فەستيۆالى مەن ديريجەرلەر فورۋمىن ەرەكشە اتاپ وتەر ەدىم. قوستاناي وبلىستىق فيلارمونياسىنان وزگە فيلارمونيالاردىڭ ەشقايسىسىندا مۇنداي كەڭ اۋقىمدى جوبالار جوق دەسەم, قاتەلەسپەيمىن. سىزدەر ۇيىمداستىرىپ جاتقان ءىس-شارالار ءبىزدىڭ ەلدە دە بەلگىلى بولا باستادى. بۇل – تۇركىتىلدەس اعايىندار ءۇشىن اسا ماڭىزدى جانە كەرەك فەستيۆال. الدە دە جاندانا, جەتىلىپ, دامي ءتۇسۋىن تىلەيمىن», دەيدى وزبەكستاندىق مەيمان فارۋح سادىقوۆ.
«دەرت» ءانسامبلىنىڭ جەتەكشىسى ەمير اۋباكيروۆ تە قازاقستاندا وتەتىن حالىقارالىق ونەر بايقاۋلارىنا مۇمكىندىگىنشە قالماي قاتىسىپ تۇرادى ەكەن. «باشقۇرت باۋىرلارىن ۇمىتپاي, ۇنەمى شاقىرۋ جىبەرىپ وتىراتىن ۇيىمداستىرۋشىلارعا, باۋىرلاس اعايىنعا العىسىمىز شەكسىز. بۇل فەستيۆالدىڭ جىلدان-جىلعا بەدەلى ارتىپ كەلە جاتقانىن كوزبەن كورىپ وتىرمىز. قازاقستانعا كەلگەن سايىن جەرگىلىكتى جۇرتتىڭ ىستىق ىقىلاسىن سەزىنىپ, ءوز ەلىمىزگە ەرەكشە شابىتپەن قاناتتانىپ قايتامىز. وسىدان-اق تۇركىتىلدەس ەلدەر مادەنيەتىنىڭ ءبىر-بىرىنە جاتتىعى جوق ەكەنىن, تامىرلاستىعىن اڭعارامىز. الداعى ۋاقىتتا اۋقىمى كەڭەيە بەرسىن دەپ تىلەيمىز», دەيدى ە.اۋباكيروۆ.
ءوز كەزەگىندە قىرعىز ەلىنەن كەلگەن داستان بورونقۇلوۆ تا «تۇركى الەمى» فەستيۆالىنىڭ كوركەمدىگى, ەرەكشەلىگى, مازمۇنى, سونداي-اق الداعى جوسپارلارى تۋرالى ويىن ورتاعا سالدى.
فەستيۆال شىمىلدىعىن قوستاناي وبلىستىق فيلارمونياسىنىڭ «اقجەلەڭ» ءانسامبلى اشىپ بەردى. ونەر ۇجىمىنىڭ سۇيەمەلدەۋىمەن ساحناعا سايىن دالانىڭ سالقار كەڭدىگىن سىيدىرىپ جىبەرگەندەي بولعان جەرگىلىكتى ءداستۇرلى ءانشى ماناپبەك قادىروۆ تە نۇرجاننىڭ نازىمدارىن ناقىشىنا كەلتىرە ورىنداپ بەردى. بىشكەك قالاسىنان كەلگەن «كۇۇ بۋلاك» ءانسامبلىنىڭ ونەرى دە تىڭدارماندى بەيجاي قالدىرماي, بىردەن باۋراپ الدى. اۋەلى ايگىلى «ماناس» جىرىنان ءۇزىندى ورىندالىپ, كەيىن ۇلتتىق كۇيلەرى, اۋەزدى, اسەرلى اندەرى ساحنانى جاڭعىرىقتىرىپ جىبەردى. ال باشقۇرتستاندىق «دەرت» ءانسامبلىنىڭ ورىنداۋىنداعى سىرلى ساز يىرىمدەرى كورەرمەندى تىپتەن بولەكشە سەزىمگە بولەدى. كوراي اسپابىنىڭ شەبەرلەرى شىنىمەن دە تۇركى الەمىنىڭ قاتپارلى عاسىرلارىنا ساپار شەكتىرگەندەي بولدى. انشىلىكتىڭ «كومەيمەن ايتۋ» تەحنيكاسىنىڭ ۇزدىك ۇلگىسىن دە كورسەتتى. وزدەرىنىڭ داستۇرلەرىنە ساي باعدارلامالارىنىڭ ورتاسىندا ءبىر كورايدى كورەرمەندەردىڭ بىرىنە سىيعا تارتتى.
ۇيىمداستىرۋشىلار الىس-جاقىننان كەلگەن مەيمانداردىڭ ۇسىنىس-تىلەگى بويىنشا جولدىڭ قاشىقتىعى ەسكەرىلە وتىرىپ, الداعى ۋاقىتتا ءداستۇرلى فەستيۆال وتەتىن ۋاقىتتى باسقا مەزگىلگە اۋىستىرۋ ماسەلەسى قاراستىرىلاتىنىن ايتتى.
قوستاناي وبلىسى