شوگەن دوبى

شوگەن دەگەن نە؟ بۇل قازىر كوپشىلىككە «پولو» دەگەن اتپەن تانىمال ويىن ءتۇرى. ءتۇپ تامىرى تۇركى دالاسىنان باستاۋ العان ويىندى ساياحاتشى ماركو پولو اعىلشىن ەلىنە الىپ بارىپ, سودان الەمگە «پولو» اتاۋىمەن تاراپ كەتسە كەرەك.

ءبىر عاجابى, بۇل ويىن ەش­قاي­دا جوعالىپ تا كەتپەگەن. بالكىم, ەلىمىزدىڭ بار­لىق ايماعىندا بولماسا دا, بەرتىنگە شەيىن ۇلىتاۋ – قار­ساقباي جاعىندا وينالعانعا ۇقسايدى. ويتكەنى شوگەن دوبىن مۋزەيگە ۇلىتاۋ اۋدانى بوزداق اۋىلىنىڭ تۇرعىنى مىرزاحان سالاحوۆ ەسىمدى ازامات 1989 جىلى تاپسىرعان ەكەن.

– بۇل دوپتى مۋزەيگە تاپسىر­عاندا مىرزاحان اعامىز «مۇنى بوزبالا كەزىمىزدە اۋىلدا ات ۇس­تىندە ءجۇرىپ وينايتىنبىز. مىنا دوپتى ماعان انام كەزىندە سيىر­دىڭ جۇنىنە قىل قوسىپ ىستەپ بەرگەن. ءجۇن جۇمىرلانىپ دوما­لاق بولۋ ءۇشىن اراسىنا اسىق سالعان ەدى. قازىرگىلەر شوگەن وينامايدى. ۇيدە جاتقانشا, ەلدىڭ كورگەنى, بىلگەنى دۇرىس» دەگەن بولاتىن. مىنە, سودان بەرى شوگەن دوپ وسىندا تۇر, – دەيدى مۋزەيدىڭ باس قور ساقتاۋشىسى زيباگۇل نۇرماعانبەتوۆا.

ۇلىتاۋ وبلىسى