ۇكىمەت وتىرىسىندا كۇن تارتىبىنەن تىس جەو مەن جىلۋ جەلىلەرىندەگى شتاتتان تىس جاعدايلاردىڭ سالدارىن جويۋ جانە ولاردىڭ ورىن الۋ ماسەلەلەرى قارالدى. ەنەرگەتيكا ءمينيسترى الماسادام ساتقاليەۆتىڭ مالىمدەۋىنشە, اۋا رايىنىڭ سۋىتۋىنا بايلانىستى ەنەرگيا كوزدەرى مەن جىلۋ جەلىلەرىندە بىرقاتار تەحنولوگيالىق اقاۋ ورىن الدى. اتاپ ايتقاندا, ريددەر جەو-سى, تەمىرتاۋ 1-ماەس-ءى, ەكىباستۇز جەو-سى جۇمىسىندا اقاۋلار بولدى. اتالعان نىساندار بويىنشا تەمپەراتۋرالىق رەجيم تولىعىمەن قالپىنا كەلتىرىلدى. سونىمەن قاتار ستەپنوگورسك, بالقاش, اقتاۋ, كوكشەتاۋ قالالارىنداعى جىلۋ جەلىلەرىندەگى تەحنولوگيالىق اقاۋلار دا جەدەل جوندەلدى. قازىرگى ۋاقىتتا بارلىق تۇتىنۋشى جىلۋعا قوسىلعان, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
جىلۋ بەرۋ ماۋسىمىنا جۇيەلى دايىندىق اياسىندا رەسپۋبليكانىڭ ەلەكتر ستانتسيالارىندا 8 ەنەرگەتيكالىق بلوك, 40 قازاندىق جانە 42 تۋربيناعا كۇردەلى جوندەۋ جۇرگىزىلدى. 2 ەنەرگەتيكالىق بلوك, 9 قازاندىق جانە 11 تۋربينا بويىنشا جۇمىستار – سوڭعى كەزەڭدە. وعان قوسا 25,3 مىڭ شاقىرىم ەلەكتر بەرۋ جەلىلەرى, 564 قوسالقى ستانتسيا جانە 3,5 مىڭ تاراتۋ پۋنكتى كۇردەلى جوندەۋدەن ءوتتى.
وڭىرلەر اكىمدەرى كوكشەتاۋ مەن ستەپنوگورسك قالالارىندا جىلۋ بەرۋ ماۋسىمىنىڭ قالاي ءوتىپ جاتقانى, ەكىباستۇز جانە ريددەر جەو-لارىنداعى احۋال, بالقاش پەن تەمىرتاۋداعى جىلۋ بەرۋ نىساندارىن جوندەۋ, سونداي-اق اقتاۋدى جىلۋمەن جابدىقتاۋ جانە اتىراۋدى سۋمەن جابدىقتاۋ تۋرالى اقپارات بەردى.
پرەمەر-مينيستر رەسپۋبليكادا كۇننىڭ كۇرت سۋىتىپ كەتۋىنە بايلانىستى كوممۋنالدىق جۇيەلەرگە تۇسەتىن جۇكتەمە دە ارتا تۇسكەنىن ايتتى. مۇنداي كەزدە جىلۋ جانە ەنەرگيا وبەكتىلەرىندە شتاتتان تىس جاعدايلار ورىن الاتىنى ءمالىم.
«تەحنولوگيالىق اقاۋلارعا بايلانىستى ينتسيدەنتتەر بولىپ جاتىر. بۇزىلعان ۋچاسكەلەردى نورماتيۆتىك مەرزىمدە قالپىنا كەلتىرۋ بويىنشا شۇعىل شارالار قابىلداندى», دەدى ءاليحان سمايىلوۆ.
ۇكىمەت باسشىسىنىڭ ايتۋىنشا, اۆاريالار بولعان جاعدايدا بارىنشا شۇعىل ارەكەت ەتىپ, ءتيىستى شارالار قابىلداۋ كەرەك.
«حالىققا ناقتى جاعداي تۋرالى, جوندەۋ جۇمىستارى مەن جوسپارلى جۇمىستار تۋرالى دەر كەزىندە وبەكتيۆتى ءارى تۇسىنىكتى اقپارات بەرۋ – ماڭىزدى ماسەلە. ايتپەسە, وتىرىك اقپارات پەن فەيك تاراپ كەتەدى», دەدى پرەمەر-مينيستر.
ۇكىمەت باسشىسى ءوڭىر اكىمدىكتەرىنە جىلۋ وبەكتىلەرىنىڭ يەلەرىمەن بىرگە تۇراقتى جۇمىس ىستەيتىن جوندەۋ بريگادالارىنىڭ بولۋىن, شۇعىل جوندەۋ جۇمىستارى قاجەت بولعان جاعدايدا قوسالقى بولشەكتەردىڭ ءازىر تۇرۋىن قامتاماسىز ەتۋدى تاپسىردى.
وعان قوسا ءاليحان سمايىلوۆ «قازاقستان تەمىر جولى» جانە «قازمۇنايگاز» ۇلتتىق كومپانيالارىنان ءبىرىنشى كەزەكتە جىلۋ ستانتسيالارى مەن قازاندىقتارعا وتىننىڭ ۋاقىتىلى جەتكىزىلۋىن قامتاماسىز ەتۋدى تالاپ ەتتى.