ەگىزى كوپ ەرەكشە اۋىل

سوناۋ 1939 جىلى العا, جاڭاباسشىلىق, بوزكول جانە جاڭاجول كولحوزدارىن بىرىكتىرۋ ارقىلى قۇرىلعان اۋىل 1956-1966 جىلدارى كارل ماركس اتىنداعى كولحوز بولىپتى. ەلدەگى اعايىننىڭ تىرلىگىنە بايلانىستى وكتيابر كۇرىش كەڭشارى اتانعان دا كەزى بار. 80-جىلداردان باستاپ كەڭەس وداعىنىڭ باتىرى ءۇرماش تۇكتىباەۆتىڭ ەسىمىمەن اتالىپ كەلگەن مەكەن وسى كۇنى العا اۋىلدىق وكرۋگىنىڭ ورتالىعى سانالادى. ەسىمى ەلدى مەكەن اتاۋىن يەلەنگەن ءۇرماش تۇكتىباەۆ – 1917 جىلى وسى توپىراقتا دۇنيەگە كەلىپ, ەكىنشى دۇنيەجۇزىلىك سوعىستا 27 جاسىندا لاتۆيانىڭ لۋدزاسىندا جان قيعان باتىر.

2 مىڭعا جۋىق تۇرعىنى بار بۇل اۋىلدا جاستار كوپ. جۇمىسقا جارامدى جۇرتتىڭ ءبارى قول قۋسىرىپ قاراپ وتىرعان جوق. ەگىن ەگىپ, مال باعىپ, تىرشىلىك كوشىنە ىلەسىپ كەلەدى. 400-دەن اسا بالا №88 بايجىگىت ابدىرازاقوۆ اتىنداعى ورتا مەكتەپتە ءبىلىم الادى. بىلتىر وسى ءبىلىم وشاعىن بىتىرگەن 21 وقۋشىنىڭ 17-ءسى گرانت يەلەنىپ, جوعارى وقۋ ورنىنا ءتۇسىپتى. مەكتەپ عيماراتىنداعى №20 «جاينا» بالاباقشاسىنا باراتىن ءسابي قاتارى قالىڭ.

بالا دەمەكشى, ەگەر وسى اۋىل­دا دۇنيەگە كەلگەن ەگىزدەردى توپتاسا, ءبىر قاۋىم ەلگە اينالار ەدى. سوناۋ 1973 جىلى اۋىلداعى ورىنباەۆتار شاڭىراعىندا اسقار, گاۋھار اتتى ەگىز دۇنيە ەسىگىن اشىپتى. ءتورت جىلدان كەيىن وزگە دە وتباسىلاردا ايگۇل-نۇرگۇل بەگاليەۆالار, التىنبەك-بولاتبەك الاۋوۆتەر, قانات-جانات جۇگىنىسوۆتەر دۇنيەگە كەلىپ, ىڭگالاپ جاتىپتى.

ودان كەيىن دە ءار جىلداردا قوس-قوستان تۋعاندار از ەمەس. ەل تاۋەلسىزدىك العان 1991 جىلى اۋىلداعى ءۇش ۇيەلمەندە ەرجان-نۇرجان, جانارىس-بەكارىس, المات-سامات سەكىلدى ەگىزدەر دۇ­نيەگە كەلىپتى. قازىر بۇل جىگىتتەر ءار سالادا جەمىستى ەڭبەك ەتىپ كە­لەدى.

جالپى, قازاقتىڭ جان سانامايتىنىن بىلەمىز. سول ىرىمعا قىرىن كەلمەس دەپ ەسەپتەپ كور­سەك, سوناۋ 1973 جىلدان بەرى وسى اۋىلدا 24 ەگىز تۋىپتى. ال­دى ەلۋدەگى, سوڭى 5 جاسقا ەندى ىلىگە­تىن سول ەگىزدەردى جيناپ, 48 ادام قاتىسقان شەرۋ وتكىزۋگە دە بولادى ەكەن.

وسىدان 4 جىل بۇرىن وسى اۋىلداعى بەس بالالى التىن­باەۆتار وتباسىنا بىردەن 3 ءسا­بي قوسىلدى. قىزىلوردا قالاسىن­داعى انا مەن بالا ورتالىعىندا دۇنيە ەسىگىن اشقان ۇشەمدەر – ايعانىم, ايعانات, اسىلىم قازىر امان-ەسەن ءوسىپ كەلەدى.

جالپى, وسى ۋاقىتقا دەيىن ەلىمىزدە بۇل قۇبىلىستىڭ سىرىنا بويلاعان ەشكىم جوق. الەمدىك زەرتتەۋشىلەر دەرەگىنشە, ەگىزدەر سانىنان ەۋروپا قۇرلىعى كوش باستاسا, قازاقستان 48-ورىندا تۇرعان كورىنەدى. جەر بەتىنە سىيماي جاتقان قىتايىڭىز سوڭعى ورىندا تۇر.

ءبىزدىڭ بىلۋىمىزشە, قىزىلور­دادان بولەك اقتوبە وبلىسىنداعى التاي باتىر, قوستانايداعى تاگىل ەلدى مەكەندەرى ەگىزدەرىمەن ەرەكشەلەنەدى. دەگەنمەن دە بۇل تاراپتاعى ناقتى كورسەتكىشتەرى بار مالىمەتتەر جوقتىڭ قاسى.

قىزىلوردا