كومەكشى بىلەزىك

ارۋجاننىڭ ويلاپ تاپقان بىلەزىگى ناۋقاسقا جەدەل جاردەم كورسەتۋدى ودان دا جەدەلتەدە تۇسەدى. ويتكەنى بىلەزىككە ادامداردىڭ مەديتسينالىق كارتاسىنا قول جەتكىزۋگە بولاتىن QR كود ورناتىلادى. ستۋدەنت بىردە وقىس جاعدايعا تاپ بولعاننان كەيىن وسى قۇرىلعىنى جاساپ شىعارۋدى ويعا العان. 2-كۋرستا وقىپ جۇرگەندە بولاشاق دارىگەر كوشەدە ەسىنەن تانىپ قالعان ادامعا قالاي كومەكتەسەرىن بىلمەي ابدىراپ قالعانىن ايتتى. «ەگەردە سول مەزەتتە ناۋقاستىڭ دەنساۋلىعى تۋرالى تولىق مالىمەت بولسا, بۇل العاشقى كو­مەك كورسەتۋگە سەپتىگىن تيگىزەر ەدى. ويت­­كەنى بىلەزىكتەگى QR كود ارقىلى ونىڭ ناقتى ديوگنازىن بىلۋگە بولادى», دەي­دى ول.

قوعامدا كەز كەلگەن ساتتە كومەكتى قاجەت ەتەتىن ناۋقاستار بارشىلىق. اسى­رەسە سول جاندارعا بۇل قۇرىلعى ناعىز كومەكشى بولا الادى. سەبەبى دەر كەزىندە كورسەتىلگەن كومەك ادامدى ءتىپتى اجالدان امان الىپ قالۋى ابدەن مۇمكىن. ستۋ­دەنت قۇندى جوباسىن جۇزەگە اسىرىپ قانا قويماي كاسىپكە دە اينالدىرۋدى كوزدەپ وتىر.

– جوبامدى ستارتاپ رەتىندە ىسكە قوسۋدى جوسپارلاپ جاتىرمىن. ءوزىم 1-كۋرستان باستاپ ستارتاپتار تاقىرىبىنا قاتتى قىزىعامىن. شىنىمدى ايتسام, مەندە ۇنەمى ءارتۇرلى بيزنەس-جوبالار كوپ بولاتىن, بىراق ولاردى قالاي جۇزەگە اسىرۋ كەرەگىن بىلمەيتىنمىن. بىر­اق بىردە ۋنيۆەرسيتەتتە ستۋدەنتتەرگە وز­دەرىنىڭ بيزنەس-جوبالارىن دامىتۋعا كومەكتەسەتىن ۇيىمعا – Enactus-قا ىرىكتەۋ جاريالادى. وسىلايشا, مەن كاسىپكەرلىك تۋرالى العاشقى ءبىلىمىمدى الدىم, – دەيدى ارۋجان قاليحانوۆا.

بولاشاق دارىگەر بىلەزىكتە كورسە­تىلەتىن مالىمەتتەرگە DamuMed اقپارات­تىق جۇ­يە­سى ارقىلى قول جەتكىزبەكشى. ويتكەنى وندا ءار­بىر ازاماتتىڭ مەديتسي­نالىق كارتاسى بار.

«جەدەل جاردەم ەس-ءتۇسسىز جاتقان ادامنان دەنساۋلىعى تۋرالى سۇراي ال­مايدى. سونداي كەزدە بىلەزىكتەگى اقپا­رات ەڭ قۇندى اقپارات بولماق. ەگەر دارى­گەرلەر جولدا كەتىپ بارا جاتقاندا ناۋ­قاستىڭ ناقتى نەمەن اۋىراتىنىن بىلسە, ولار دەر كەزىندە كومەكتەسە الادى», دەيدى ول.

مەديتسينالىق كارتاعا تەك دارىگەرلەر قول جەتكىزە الادى. ول بىلەزىكتەگى QR كودتى سكانەرلەپ, DamuMed ەسەپتىك جاز­باسىنداعى مەديتسينالىق تاريحىن, قان توبىن, بايلانىس دەرەكتەرىن, فوتو­سۋرەتتەرىن, تالداۋ ناتيجەلەرىن كورە الادى. ياعني بىلەزىك ارقىلى جەدەل جاردەم ماڭىزدى باستاپقى اقپاراتتى الا الادى. سونداي-اق ولار وقيعا ورنىنان قوڭىراۋ شالعان ادامعا دۇرىس نۇسقاۋ بەرەدى. ستۋدەنت قازىر ءونىمدى شىعارۋعا دايىنداپ جاتىر.

– مەن العاشىندا IFMSA-عا ءوتىنىش بەردىم. وندا جوبام مالىمەتتەر بازاسىنا ەنگىزىلىپ, كومەك تۋرالى ۇسىنىسى بار سەرتيفيكات جىبەرىلدى. الايدا بۇل قۇ­جاتپەن قايدا بارۋ كەرەكتىگىن بىلمەدىم. سودان كەيىن جوبام جۇزەگە اسىرىلماي قالدى. 6-كۋرستا قازاق ۇلتتىق مەديتسينا ۋنيۆەرسيتەتىندە بيزنەس-ينكۋباتور پايدا بولدى. سوعان قاتىسۋعا بەل بۋدىم. ناتيجەسىندە, جوبا باعدارلامانىڭ ءفيناليستى بولدى. تالىمگەرلەرمەن بىرگە پروتوتيپ جاساپ, بيزنەس-جوسپار قۇردىق. University DemoDay-دا (مەديتسينالىق ستارتاپتاردىڭ پيتچينگى) جاساعان بايان­دامامنان كەيىن قازاق ۇلتتىق مەديتسينا ۋنيۆەرسيتەتىنىڭ ەن­داۋمەنت-قورى بىلەزىككە قى­زىعۋشىلىق تانىتتى. ولار ماركەتينگ جانە سەرىكتەستەر تابۋ جاعىنان كومەكتەستى. ءبىز ءونىمدى شى­عارۋعا دايىندالىپ جاتىرمىز. DamuMed جوبام تۋرالى بىلەدى, بىراق ءالى رەسمي كەلىسىم بەرگەن جوق. بىراق وڭ جاۋاپ الۋ ءۇشىن نە ىستەۋ كەرەگىن سۇرايتىن بولامىز. ەگەر DamuMed ينتەگراتسياسى ءساتسىز بولسا, پايدالانۋشى ءوزى تۋرالى مەديتسينالىق اقپاراتتى ەنگىزە الاتىن ۆەب-سايت جاساپ شىعارامىز. قازىر جوبانى جۇزەگە اسىرۋعا قانشا قارجى قاجەت بولاتىنىن ەسەپتەپ جاتىرمىن ءارى ينۆەستورلار ىزدەستىرۋدەمىن. ءبىز ءونىمدى ەمحانالارعا ساتقىمىز كەلەدى. سونداي-اق بارلىق تاۋار قور كاتالوگىندا جانە Arumedix Instagram اككاۋنتىندا قول جەتىمدى بولادى, – دەيدى ارۋجان.

بولاشاق دارىگەر كاسىبي ءبىلىمىن كاسىپكەرلىكپەن بايلانىستىرىپ دامىت­قىسى كەلەتىنىن ايتتى. ول مەديتسينا سالاسىن سانالى تۇردە تاڭداعان. سەبەبى 15 جاسىندا اكەسى جۇرەك اۋرۋىمەن اۋىرعان ەكەن. «اكەم جۇرەگى ۇستاپ, تىزەمە كەلىپ قۇلاعاندا, قالاي كومەكتەسەتىنىمدى بىلمەي تۇرىپ قالدىم. بۇل دارمەنسىزدىك سەزىمىن ءالى ۇمىتا المايمىن. وسى جاعدايدان كەيىن دارىگەر بولۋعا شەشىم قابىلدادىم. مەن ادامدارعا قالاي دا كومەكتەسكىم كەلەدى», دەيدى ول.

ارۋجان قاليحانوۆا كاسىبي مانسابى جولىندا ەلگە ءوز پايداسىن تيگىزەتىن, وتاندىق مەديتسينانىڭ دامۋىنا ۇلەس قوساتىن مامان بولعىسى كەلەتىنىن اتاپ ءوتتى. ونىڭ قولعا العان جوبالارى دا وسىعان دالەل.

«تۇركيادا, پولشادا تاعىلىم­دا­مادان ءوتتىم. بەرتىنگە دەيىن تۇركياعا كوش­كىم كەلەتىن. ويتكەنى وندا مەديتسينا دامىعان. بىراق كەيىن ءوز ەلىمىزدە قالعىم كەلەتىنىن ءتۇسىندىم. بولاشاقتا شەتەلدەگى ارىپتەستەرىمنەن تاجىريبە جيناۋعا باراتىن دا شىعارمىن. بىراق ءوز ەلىمدە جۇمىس ىستەيمىن. وتانىما پايدا اكەلگىم كەلەدى», دەيدى ارۋجان.