توي ۇستىندەگى بۇل ارەكەت اقتاۋداعى بەسىك تويلاردىڭ بىرىندە بولعان. بەسىكتىڭ ۇستىنە ءمىنىپ, اتتاي قامشىلاعان اقتاۋلىق اپانى جۇرتشىلىق سىناپ تاستادى. پىكىر الاڭىندا ونىڭ بۇل ارەكەتىن جاقتاۋشى دا, داتتاۋشى دا تابىلادى, دەپ جازادى Egemen.kz.
ۆيدەودان ورتا جاستان اسقان ايەلدىڭ سالت بويىنشا جابۋ جابىلعان بەسىكتىڭ ۇسىتىنە شىعىپ, سۇيرەلەپ, قامشىلاپ جاتقانىن كورۋگە بولادى.
جەلى قولدانۋشىلارى اراسىندا حالقىمىزدا مۇنداي ىرىمنىڭ بار-جوعىنا قاتىستى تالاس تۋىنداعان.
ءبىرى ايەلدىڭ بۇل قىلىعى وعاش كورىنەتىنىن ايتىپ جاتسا, ەكىنشىلەرى سالتتان حابارسىزسىڭدار دەپ وزگەلەرگە ءمىن تاعىپ جاتىر. ەكىنشى تاراپتىڭ ايتۋىنشا بۇل - بالا بەسىككە سالىنعاننان كەيىن «مەككەگە-قوقانعا الىپ قاشۋ» ىرىمى. تيىسىنشە بالانىڭ اتاسى نە اكەسى الىپ قاشۋشىعا اقشا بەرىپ, ءوز ۇيلەرىندە قالۋعا كوندىرەدى.
ال اقتاۋلىقتار ورامالسىز الا شاپقىن بولىپ جۇرگەن اپانىڭ قىلىعىنا اڭ-تاڭ.