بيىل قىزىلوردادا العاش رەت «پاراسات جولى» الەۋمەتتىك جوباسى جۇزەگە اسىرىلىپ كەلەدى. جاس مەملەكەتتىك قىزمەتشىلەردى مادەني-كوپشىلىك, ينتەللەكتۋالدىق جانە سپورتتىق ءىس-شارالارعا قاتىستىرىپ, نەتۆوركينگ الاڭىن قۇرۋعا, قولداۋعا باعىتتالعان جوبا اياسىنداعى ءىس-شارالارعا مىڭنان اسا مەملەكەتتىك قىزمەتشى قاتىستى.
ايماقتاعى مەملەكەتتىك قىزمەتشىلەردى قولداۋ شارالارى وبلىس اكىمى نۇرلىبەك نالىباەۆ پەن «پاراسات جولى» وبلىستىق سلەتى اياسىندا سىر ەلىنە كەلگەن پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىلدىڭ كەزدەسۋىندە تالقىلاندى. ايماق باسشىسى بۇل ءىس-شارانىڭ مەملەكەتتىك قىزمەتشىلەردىڭ وڭ ءيميدجىن قالىپتاستىرۋدا, تاجىريبە, ءوزارا پىكىر الماسۋ الاڭىنا اينالدىرۋدا ماڭىزى زور ەكەنىن اتاپ ءوتتى.
«مەملەكەتتىك قىزمەتشىلەردىڭ بىلىكتىلىگىن ارتتىرۋ, قىزمەتتىك وسۋىنە جاعداي جاساۋ ۇدايى نازاردا. بيىل وڭىردە 96 مەملەكەتتىك قىزمەتكەر قايتا دايارلاۋدان ءوتتى, 697-ءسى بىلىكتىلىك ارتتىرۋ كۋرستارىندا ماشىعىن جەتىلدىردى. وڭىرلىك رەزەرۆتى قالىپتاستىرۋ ءۇشىن قۇزىرەتتەردى باعالاۋدى جۇزەگە اسىراتىن اسسەسمەنت قىزمەتىنە قاجەتتى قارجى قارالىپ جاتىر. ايماقتاعى مەملەكەتتىك قىزمەتشىلەردىڭ پرەزيدەنت جانىنداعى مەملەكەتتىك باسقارۋ اكادەمياسىندا ءبىلىم جەتىلدىرۋىنە, اكادەميا تۇلەكتەرىنىڭ ەل دامۋى جولىندا ەڭبەك ەتۋىنە ۇنەمى قولداۋ بىلدىرەمىز», دەدى نۇرلىبەك ماشبەك ۇلى.
پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى وبلىس اكىمىنە كورسەتكەن قولداۋى ءۇشىن العىس ايتىپ, الداعى ۋاقىتتا دا ءتيىمدى ارىپتەستىك ورناتۋعا نيەت ءبىلدىردى. وبلىستا 3200-دەن استام مەملەكەتتىك قىزمەتشى ءتۇرلى سالادا ەڭبەك ەتەدى, 35 جاسقا دەيىنگى 471 مەملەكەتتىك قىزمەتشىنىڭ جيىرماسى – پرەزيدەنت جانىنداعى مەملەكەتتىك باسقارۋ اكادەمياسىنىڭ, ۇشەۋى «بولاشاق» باعدارلاماسىنىڭ تۇلەگى. بىلتىر وبلىستا 9 مەملەكەتتىك قىزمەتشى پرەزيدەنت جانىنداعى مەملەكەتتىك باسقارۋ اكادەمياسى گرانتىن يەلەنسە, بيىل 6 مەملەكەتتىك قىزمەتشى اكادەميادا جاڭا ءبىلىم داعدىلارىن مەڭگەرۋدە.
قىزىلوردا