كۇنى كەشە ىلە اۋدانىندا جولاۋشىلار مىنگەن قوعامدىق كولىك جۇرگىزۋشىسىنىڭ جۇرەك تالماسى ۇستاپ قالىپ, وقىس وقيعا ورىن العان ەدى.
اۆتوبۋستىڭ باعىتى وزگەرىپ بارا جاتقانىن بايقاپ قالعان ءجاسوسپىرىم ويلانباستان بىردەن ارەكەتكە كوشكەن. ول تەز ارادا اۆتوبۋس تەجەگىشىن باسىپ ۇلگەرگەننىڭ ارقاسىندا اۆتوبۋس سوعىلۋدان امان قالعانىن كۋاگەرلەر جارىسا جازىپ, جۇرەك جۇتقان جاس بالاعا العىستارىن جاۋدىرۋدا.
وقىس وقيعا ورىن العاندا باتىلدىق تانىتىپ, جىلدام ارەكەت ەتكەن اقجول نۇرلان ۇلى وتەگەن باتىر اۋىلىنداعى №24-ليتسەيدىڭ 8 «ە» سىنىبىندا وقيدى. كوپبالالى وتباسىنان شىققان اقجول اكە-شەشەسى, اتا-اجەسىمەن بىرگە تۇرادى. بالا كۇننەن تەحنيكاعا اۋەس اقجول, تەجەگىش باسۋدى اكەسىنەن ۇيرەنگەن ەكەن. ول وسى ۋاقىتقا دەيىن اۆتوكولىك ماركالارىمەن قاتار, ولاردىڭ قۇرىلىمدارىن دا وتە جاقسى اجىراتا بىلەدى.
«وتكەن جىلى وسى ليتسەيگە اۋىسىپ كەلگەن اقجول سىنىپتاستارىمەن تەز ارالاسىپ, كىشىپەيىل, كوپشىلدىگىمەن ءوز ورتاسىنا ءسىڭىسىپ كەتتى. وزىنە تاپسىرىلعان تاپسىرمانى تياناقتى ورىنداۋعا تىرىسادى. وعاش قىلىعىن كورسەتپەيتىن اقجولدىڭ ءىس-قيمىلى شيراق ءارى شاپشاڭ. قوعامدىق جۇمىستارعا بەلسەنە ارالاسادى. بۇگىنگى باتىلدىعى بويىندا بار وسى قاسيەتتەرىنىڭ كورىنىسى», دەيدى اتالعان ليتسەيدىڭ ديرەكتورى زاحيدا تورەحودجاەۆا.
الماتى وبلىسى