قوستاناي وبلىسىنا جۇمىس ساپارىمەن كەلگەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا رۋدنىي قالاسىنا بارىپ, بىرنەشە كاسىپورىندى ارالادى. ودان كەيىن ءوڭىردىڭ وندىرىستىك كاسىپورىندارىنىڭ جۇمىسشىلارىمەن كەزدەستى. «گورنياك» مادەنيەت ۇيىندە وتكەن جيىنعا «سارىباي-سوكولوۆ» كەن بايىتۋ بىرلەستىگى, «كراسنووكتيابرسك بوكسيت كەنى باسقارماسى», «قوستاناي مينەرالدارى», «اگروماشحولدينگ», «ۆارۆارينسكوە», «وركەن» «سارىارقااۆتوپروم», «كوماروۆ تاۋ-كەن كاسىپورنى» سەكىلدى ءىرى ءوندىرىس ورىندارىنىڭ جۇمىسشىلارى مەن كاسىپوداق ۇيىمدارىنىڭ وكىلدەرى قاتىستى.
كەزدەسۋ بارىسىندا وندىرىستەگى ەڭبەك قاۋىپسىزدىگى مەن الەۋمەتتىك قورعاۋ ماسەلەلەرى تالقىلاندى. سونداي-اق ۇزاق جىل بويى زياندى ەڭبەك جاعدايىندا جۇمىس ىستەپ جۇرگەن ازاماتتارعا جاڭا الەۋمەتتىك تولەم ەنگىزۋدىڭ جولدارى تۋرالى ءسوز بولدى. ءمينيستردىڭ ايتۋىنشا, 2024 جىلدىڭ 1 قاڭتارىنان باستاپ زياندى جۇمىس ورىندارىندا ەڭبەك ەتىپ جۇرگەن ازاماتتارعا 55 جاستان زەينەت جاسىنا تولعانعا دەيىن ارنايى الەۋمەتتىك تولەم ەنگىزىلەتىن بولادى.
«پرەزيدەنتتىڭ تىكەلەي تاپسىرماسىمەن مينيسترلىك بىرنەشە زاڭعا تۇزەتۋ ەنگىزۋ تۋرالى جوبا ازىرلەدى. بۇل تۇزەتۋلەر زياندى ەڭبەك جاعدايىندا جۇمىس ىستەيتىن ادامداردى الەۋمەتتىك قورعاۋ دەڭگەيىن ارتتىرۋ ماقساتىندا ەنگىزىلەدى. اتالعان زاڭ جوباسى پارلامەنت ءماجىلىسىنىڭ جالپى وتىرىسىندا ماقۇلدانىپ, سەنات قاراۋىنا جىبەرىلدى. اتالعان الەۋمەتتىك تولەم ءتورت قاراجات كوزىنەن جۇرگىزىلەدى. رەسپۋبليكالىق بيۋدجەتتەن ەكى ەڭ تومەن كۇنكورىس دەڭگەيى مولشەرىندە – 86 814 تەڭگە تولەنەدى. جۇمىس بەرۋشى 43 407 تەڭگە تولەيدى. وعان قوسا ءومىردى ساقتاندىرۋ قورى مەن مىندەتتى زەينەت جارنالارى ەسەبىنەن 43 407 تەڭگەدەن تولەنەدى. جالپى, تولەمنىڭ كولەمى 200 مىڭ تەڭگەدەن اسادى. تولەم زەينەتكەرلىك جاسقا دەيىن تولەنەدى», دەدى سۆەتلانا جاقىپوۆا.
«كەزدەسۋگە قاتىسۋشىلار جاڭا الەۋمەتتىك تولەم كىمدەرگە, قانداي جاعدايدا تاعايىندالادى؟ بۇل باسقا الەۋمەتتىك تولەمدەرگە اسەر ەتپەي مە؟ جۇمىس بەرۋشىلەردىڭ جارناسى زەينەتاقى قورىنا نە وزگەرىس اكەلەدى؟» دەگەن سياقتى سۇراقتار قويدى. ءار ساۋالعا جان-جاقتى, تياناقتى جاۋاپ بەرىلدى. كەزدەسۋدەن كەيىن مينيستر جەكە باسىنداعى ماسەلەلەر بويىنشا جولىققىسى كەلگەن بىرنەشە ازاماتتى قابىلدادى.
قوستاناي وبلىسى