مويىنقۇم اۋدانىنىڭ اۋماعىندا ورنالاسقان «اناباي» گاز كەشەنى پايدالانۋعا بەرىلدى. سۋ جاڭا كەن ورنىن «QazaqGaz بارلاۋ جانە ءوندىرۋ» جشس قاجەتتى جابدىقتارمەن تولىق قامتاماسىز ەتكەن. تيىسىنشە گاز ۇڭعىمالارىن كونسەرۆاتسيالاۋ بويىنشا جۇمىستار اتقارىلعان.
«QazaqGaz بارلاۋ جانە ءوندىرۋ» جشس ءباسپاسوز قىزمەتى تاراتقان دەرەككە جۇگىنسەك, سەرىكتەستىك باسشىلىعى جوعارىدا ايتقان جۇمىستان بولەك, «اناباي-جارقۇم» گاز قۇبىرىن سالۋ جۇمىسىن جۇزەگە اسىرعان. قازىرگى كەزدە جوسپارداعى قۇرىلىس-مونتاج جۇمىستارى اياقتالعان. «QazaqGaz» باسقارما توراعاسى سانجار جاركەشوۆتىڭ سوزىنشە, «اناباي» گاز كەشەنىن ىسكە قوسۋ جۇمىستارى جول كارتاسى جوباسى اياسىندا قولعا الىنىپتى.
«QazaqGaz»-عا تيەسىلى رەسۋرستىق بازاسىن ارتتىرۋ بويىنشا ناقتى جۇمىستار جۇزەگە اسىرىلىپ جاتىر. كومپانيانىڭ تاۋارلىق گاز كولەمىن ۇلعايتۋ بويىنشا قابىلداعان «جول كارتاسى» جوباسى شەڭبەرىندە بىرنەشە گاز كەنىشىن, سونداي-اق «اناباي» كەن ورنىن ىسكە قوسۋ كوزدەلگەن بولاتىن. «QazaqGaz» گازدىڭ وزىندىك رەسۋرستىق بازاسىن ارتتىرۋ ءۇشىن جەر قويناۋىن گەولوگيالىق زەرتتەۋگە جانە جاڭا ۋچاسكەلەردى گەولوگيالىق بارلاۋعا ليتسەنزيا الۋ بويىنشا ءتيىستى جۇمىستاردى جۇرگىزىپ جاتىر», دەيدى ول.
سەرىكتەستىكتىڭ العا قويعان جوسپارى ايقىن. دەرەككە سەنسەك, 2023 جىلى گاز ءوندىرۋ كولەمىن 6,5 ملن تەكشە مەترگە جەتكىزۋ كوزدەلگەن بولسا, 2028 جىلى 44 ملن تەكشە مەترگە جەتكىزۋدى ماقسات تۇتىپ وتىر. جالپى العاندا «اناباي» كەن ورنىنان الىناتىن گاز كولەمى ىشكى نارىقتىڭ قاجەتتىلىگىن قامتاماسىز ەتۋ ماقساتىندا پايدالانىلادى ەكەن.
«QazaqGaz بارلاۋ جانە ءوندىرۋ» جشس باس ديرەكتورى الماس قۋاندىقوۆ كەلتىرگەن دەرەككە جۇگىنسەك, جاڭادان ىسكە قوسىلعان «اناباي» كەن ورنىنىڭ قورى 4 ملرد تەكشە مەتردى قۇرايدى. ءىرى جوباعا تارتىلعان ينۆەستيتسيا كولەمى 12 ملرد تەڭگەگە جەتكەن. الداعى ۋاقىتتا كەن ورنىن ودان ءارى بۇرعىلاۋ جۇمىستارىن قولعا الۋدى جوسپارلاپ وتىر.
«QazaqGaz «ۇك» اق 2022 جىلدىڭ قاراشا ايىندا «امانگەلدى گاز» جشس-عا ترانسفورماتسيالاۋ جۇرگىزىپ, اتقارىلعان جۇمىستىڭ ناتيجەسىندە ۇيىم «QazaqGaz بارلاۋ جانە ءوندىرۋ» اتاۋىمەن قايتا قۇرىلعان ەدى.
جامبىل وبلىسى,
مويىنقۇم اۋدانى