جامبىل وبلىسىندا تۋريزم يندۋسترياسىن دامىتۋعا ايرىقشا نازار اۋدارىلىپ وتىر. اسىرەسە جاۋاپتى باسقارما قىزمەتكەرلەرى بالالاردى ءتۇرلى ساياحاتتارعا اپارىپ, ولاردىڭ تانىمىن ارتتىرۋعا ارنالعان جوبالاردى مىقتاپ قولعا العان.
«بالالار مەن جاسوسپىرىمدەر ءتۋريزمىن دامىتۋعا ارنالعان ءىس-شارالار بيىل دا ساتىمەن جالعاستى. ماسەلەن, جىلدىق جوسپارعا سايكەس, «Taraz city bus» ەكسكۋرسيالىق اۆتوبۋسىنىڭ جۇمىسى ۇيىمداستىرىلدى. جوبا 2022 جىلدان باستاپ قولعا الىنعان. ءىس-شارا مامىر-ماۋسىم, قىركۇيەك-قازان ايلارىندا وتكىزىلىپ, وعان مىڭنان اسا وقۋشى قاتىسسا, بيىل ءساۋىر ايىنان باستاپ, 6 اي بويى ۇزدىكسىز جۇرگىزىلدى. ناتيجەسىندە, 2 مىڭعا جۋىق وقۋشى قامتىلدى. ەكسكۋرسيا بارىسىندا تاراز قالاسىنىڭ تاريحي-مادەني نىساندارى, اتاپ ايتقاندا, «ەجەلگى تاراز» تاريحي-ەتنومادەني كەشەنى, «تەكتۇرماس», «ايشا ءبيبى», «قاراحان», «داۋىتبەك» كەسەنەلەرى ۇسىنىلدى. سونىمەن قاتار تاراز-تۇركىستان باعىتى بويىنشا قالاارالىق ەكسكۋرسيالىق تۋر وتكىزىلدى. تۋر اياسىندا تۇركىستان وبلىسىنىڭ «اق مەشىت» تۋريستىك نىساندارى, «دومالاق انا», «ارىستان باب», «قوجا احمەت ياساۋي» كەسەنەلەرى, «كەرۋەن ساراي» كەشەندەرىنە بالالاردى ارنايى اپارىپ, ارالاتتىق», دەيدى «تاراز-تۋريزم» كوممۋنالدىق مەملەكەتتىك مەكەمەسىنىڭ ديرەكتورى ماحانبەت راحىمجانوۆ.
ونىڭ ايتۋىنشا, ءوڭىر وقۋشىلارىنىڭ تانىمىن كەڭەيتۋگە ارنالعان «جاندى ساياباقتار» جوباسى دا 7-8-سىنىپ وقۋشىلارىنىڭ قىزىعۋشىلىعىن تۋدىرىپ وتىر. بۇل جوبا بالالاردىڭ تاريح-گەوگرافيا سەكىلدى پاندەر بويىنشا ءبىلىمىن تەرەڭدەتۋگە باعىتتالعان.
«جالپى العاندا ەكسكۋرسيالىق باعدارلاما ارقىلى بالالاردىڭ ىقىلىم زاماننان كەلە جاتقان باي تاريحقا دەگەن قۇرمەتىن اڭعاردىق. «ەجەلگى تاراز» اشىق اسپان استىنداعى تاريحي-ارحەولوگيالىق مۇراجايى, «قاراحان», «داۋىتبەك», «ايشا ءبيبى», «بابادجا حاتۋن» جانە «تەكتۇرماس» كەسەنەلەرى سەكىلدى تاريحي نىساندارعا ساياحاتتاعان بالالاردىڭ بويىنان كونە شاھاردىڭ وتكەن-كەتكەنىنە دەگەن قىزىعۋشىلىق ايقىن بايقالىپ تۇردى. جالپى العاندا بيىل 500-دەن اسا وقۋشى قالاداعى تاريحي ورىندارمەن تانىستى», دەيدى ول.
جامبىل وبلىسى