ىرعىز, قوبدا, ويىل اۋداندارىندا وتكەن ساياسي ناۋقان كەزىندە سايلاۋشىلار تىزىمىنە 28 897 ازامات ەنگىزىلگەن ەدى. ال داۋىس بەرۋگە 17 033 سايلاۋشى قاتىسقان. ونىڭ ىشىندە ەسەپتەن شىعارۋ كۋالىكتەرى بويىنشا – 8, داۋىس بەرۋگە ارنالعان ءۇي-جايلاردان تىس 1809 تۇرعىن قاتىستى.
ءۇش اۋداننان توعىز ۇمىتكەر شىقتى. وبلىستىق اۋماقتىق سايلاۋ كوميسسياسى توراعاسى نۇرلىبەك ءجۇسىپوۆتىڭ حابارلاۋىنشا, جەرگىلىكتى ۋاقىتپەن 18.00-دە ءۇش اۋداندا تىركەلگەن سايلاۋشىلاردىڭ 65 پايىزى 79 سايلاۋ ۋچاسكەسىندە داۋىس بەرىپ ۇلگەرگەن. «سايلاۋ ۋچاسكەلەرىندە ەشقانداي دا زاڭ بۇزۋشىلىق تىركەلگەن جوق. ءبارى زاڭ اياسىندا ءوتتى, جۇرتشىلىق وزدەرى تاڭداعان ۇمىتكەرگە داۋىس بەردى», دەيدى ن.ءجۇسىپوۆ.
اۋدان اكىمى بولۋعا تالپىنعان توعىز ۇمىتكەردىڭ ۇشەۋى ساياسي پارتيالاردان, ال التاۋى ءوزىن-ءوزى ۇسىنعان. ۇمىتكەرلەردىڭ جاسى 38-دە بولسا, ەڭ ۇلكەنى 61 جاستا.
قوبدا اۋدانىندا وتكەن سايلاۋدا باعدات امانتاەۆ – 1 599, باۋىرجان مۇساەۆ – 891, ال ىزگىلىك تىنىمگەرەەۆ سايلاۋشىلاردىڭ 4 672 داۋىسىنا يە بولدى. اۋداندا 38 تۇرعىن بيۋللەتەننىڭ «بارلىعىنا قارسىمىن» دەگەن بولىگىن بەلگىلەگەن. ال ويىلدا سايلاۋشىلاردىڭ 943-ءى ارسلانبەك الديارعا ءوز داۋىسىن بەرگەن. اسقار قازىباەۆقا – 3 742, ايبەك سۇلتانوۆقا 2 154 داۋىس بەرىلدى. «بارلىعىنا قارسى» بەلگىسى بار بيۋللەتەندەر سانى – 140.
سونداي-اق ىرعىز اۋدانىندا نۇركەن جۇبانازاروۆ – 1 091, نۇرلان قىزبەرگەنوۆ – 3 819, البەك تاۋباتىروۆ 1397 داۋىسقا يە بولدى. بارلىعىنا قارسى بولعاندار – 62 ادام.
سايلاۋ قورىتىندىسى بويىنشا, ىزگىلىك تىنىمگەرەەۆ – قوبدا, اسقار قازىباەۆ – ويىل, نۇرلان قىزبەرگەنوۆ ىرعىز اۋدانىنىڭ اكىمدەرى بولىپ سايلاندى. سوڭعى ەكى ۇمىتكەر بۇعان دەيىن دە سول اۋدانداردا اكىم قىزمەتىن اتقارىپ كەلگەن.
اقتوبە وبلىسى