«Astana Hub» تەحنوپاركى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن, سونداي-اق «EPAM» جانە «Techno Woman» كومپانيالارىمەن بىرلەسىپ «IT-Aiel» وقۋ باعدارلاماسىن تابىستى جۇزەگە اسىرىپ جاتقانى ءمالىم. باعدارلامانىڭ ماقساتى – ەلىمىزدىڭ 17 وڭىرىنەن 2 مىڭنان استام جۇمىسسىز ايەلدى اقپاراتتىق تەحنولوگيا ماماندىقتارىنا وقىتۋ. بۇل ولاردىڭ العاشقى جوبالارىن جاساۋعا مۇمكىندىك بەردى. وقۋ بىتىرگەن 50 ايەلگە سەرتيفيكات تابىستالدى.
تسيفرلىق دامۋ, يننوۆاتسيالار جانە اەروعارىش ونەركاسىبى ءبىرىنشى ۆيتسە-ءمينيسترى قانىش تولەۋشين ءتۇرلى سالا ماماندارىن اقپاراتتىق تەحنولوگيالار سالاسىنداعى ماماندىقتاردى يگەرۋگە تارتۋ ماڭىزدى ەكەنىن تىلگە تيەك ەتتى. ء«بىزدىڭ الەۋەتىمىز وراسان زور ەكەنىن كورىپ وتىرمىز. ءارتۇرلى سالانىڭ ازاماتتارى اقپاراتتىق تەحنولوگيالار سالاسىنداعى ماماندىقتاردى ءومىرىنىڭ اجىراماس بولىگىنە اينالدىرعان كەزدە الەۋەتىمىز تولىق اشىلادى. «IT-Aiel» قاتىسۋشىلارى العاشقى قادام جاسادى. سىزدەردەن ۇلگى الىپ, ەرتەڭ ون مىڭداعان وتانداسىمىز IT سالاسىنا بەت بۇرارى انىق», دەدى ۆيتسە-مينيستر.
بۇگىنگى تاڭدا باعدارلاماعا قاتىسۋشى 122 ادام وقۋدى اياقتاپ, ەلەكتروندى سەرتيفيكات الدى. قالعانى وقۋدى جالعاستىرىپ جاتىر. 10 ايماقتان 50 ايەل ۆەب-سايت نەمەسە قوسىمشا سياقتى وزدەرىنىڭ IT ونىمدەرىن جاساپ, فينالدىق كەزەڭنەن ءوتىپ, سەرتيفيكات تابىس ەتۋ راسىمىنە قاتىسۋعا مۇمكىندىك الدى.
– ءبىز بۇل جوبانى قولعا العان كەزدە ونىڭ اۋقىمى مەن ناتيجەسى وسىنشالىقتى بولادى دەپ ويلامادىق. سىزدەر بۇگىنگى كۇننىڭ ناعىز باتىرىسىزدار. سىزدەر شىنىمەن كوپ ادامنىڭ قولىنان كەلمەيتىن نارسەنى ىستەدىڭىزدەر. مۇلدەم جاڭا سالاعا اياق باستىڭىزدار. كۇردەلى ءارى باسەكەگە قابىلەتتى سالاعا كىرۋدەن قورىقپادىڭىزدار. مەنىڭشە, بۇل باعدارلاما جىل سايىن وتەتىن بولسا, سىزدەر ءوز ۇلگىلەرىڭىزبەن, ەڭبەكتەرىڭىزبەن تالاي ايەلگە جول اشتىڭىزدار. بالكىم, بۇل سىزدەردىڭ جەتىستىككە, الەمگە تانىمال بولاتىن ءونىم جاساۋعا, ۇلكەن تابىسقا قاراي جاساعان العاشقى ۇلكەن قادامدارىڭىز شىعار, – دەدى «Astana Hub» باسقارۋشى ديرەكتورى الينا ءابدىراحمانوۆا.
وسى اپتادا بەس ايەل قاتىسۋشىلاردىڭ كاسىبي داعدىلارىن دامىتۋعا جانە ەلدەگى ايەلدەر كاسىپكەرلىگىن دامىتۋعا ايتۋلى ۇلەس قوساتىن جوبالارىن تانىستىردى. مىسالى, اقتوبەلىك دايانا احمەتباەۆا Welcome يمميگرانتتاردى الەۋمەتتىك ينتەگراتسيالاۋ قىزمەتىن ۇسىندى. ديانا ساۋلەباەۆا ىشكى ءتۋريزمدى دامىتۋعا ۇلەس قوسا الاتىن سايت جاسادى. سامال قاسەنوۆا بالالى وتباسىلارعا ارنالعان ءوزارا كومەك قىزمەتى – «MomSharing» جوباسىن تانىستىردى. ال اتىراۋلىق كوركەم قاسەنوۆا اۆياتسيالىق وقۋ ورتالىعىنىڭ سايتىن جاسادى. ءاليا ورازىمبەتوۆا بالالاردىڭ قارجىلىق, تسيفرلىق جانە كومپيۋتەرلىك ساۋاتتىلىعى بويىنشا بيزنەس-جوبا دايىنداپ, ينتەراكتيۆتى وقىتۋ ورتالىعىن اشۋدى جوسپارلاپ وتىر.
«IT-Aiel» باعدارلاماسىنا No Code School, Freelance School جانە كومپيۋتەرلىك ساۋاتتىلىق نەگىزدەرى سياقتى كۋرستاردى وقۋ نيەتى بار 18 جاستان اسقان 2 675 جۇمىسسىز ايەل ءوتىنىش ءبىلدىردى. باعدارلامادا ۆەبينارلار, شەبەرلىك ساباقتارى, تىكەلەي ەفيرلەر, سۇراق-جاۋاپ سەسسيالارى بولدى. وتىنىشتەردىڭ كوبى استانا قالاسى مەن اقمولا وبلىسىنان (847), الماتى قالاسى مەن الماتى وبلىسىنان (468), باتىس قازاقستان وبلىسىنان (275), اتىراۋ وبلىسىنان (179) جانە اقتوبە وبلىسىنان (120) تۇسكەن. قاتىسۋشىلاردىڭ ورتاشا جاسى – 32 جاس.