ەلىمىزدىڭ ءار وڭىرىنەن, اسىرەسە اۋىلداردان, الىس-جاقىن شەتەلدەردەن كەلگەن ءبىلىم سالاسىنىڭ قىزمەتكەرلەرى استاناعا ات باسىن بۇردى. مۇنىڭ سەبەبى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى ۇيىمداستىرعان «اۋىل مەكتەبىنىڭ وركەندەۋى – قوعام يگىلىگىنىڭ كەپىلى» تاقىرىبىنداعى حالىقارالىق عىلىمي-تاجىريبەلىك كونفەرەنتسيادان وزدەرىنە كەرەگىن الىپ, تىڭ تاجىريبەسىن ءبولىسۋ ەدى.
اۋقىمدى جيىنعا پرەمەر-ءمينيستردىڭ ورىنباسارى تامارا دۇيسەنوۆا, وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا, NIS باسقارما توراعاسى ءانۋار جانعوزين, «قازاقستان حالقىنا» قوعامدىق قورى باسقارما توراعاسىنىڭ ورىنباسارى ءلاززات شىڭعىسباەۆا, ءبىلىم بەرۋ سالاسىن تۇراقتى دامىتۋ قورىنىڭ ديرەكتورى دانيار توقتارباەۆ جانە پەداگوگتەر قاتىستى.
كونفەرەنتسيانىڭ اشىلۋىندا ءسوز العان تامارا دۇيسەنوۆا ءبىلىم سالاسىندا كەيىنگى جىلدارى ىسكە اسىرىلىپ جاتقان باعدارلامالارعا توقتالىپ, اۋىلداردى دامىتۋعا ارنالعان جوباعا ساتتىلىك تىلەدى.
– ءبىلىم ساپاسىن كوتەرۋ ماقساتىندا قازىر ەلدەگى ۇزدىك مەكتەپتەردىڭ تاجىريبەسىن وزگە ءبىلىم مەكەمەلەرىنە تاراتۋ ءىسى جۇرگىزىلىپ جاتىر. ونىڭ وزەگىندە «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسى تۇر. قازىردە وعان 80 مەكتەپ قاتىسىپ جاتىر. ەكىنشى كەزەڭدە 200-گە تارتا ءبىلىم وشاعى قامتىلادى, – دەدى پرەمەر-ءمينيستردىڭ ورىنباسارى.
«نازارباەۆ زياتكەرلىك مەكتەپتەرى» دببۇ باسقارما توراعاسى ءا.جانعوزين 330-دان اسا اۋىل مۇعالىمىنىڭ باسىن قوسقان اۋقىمدى كونفەرەنتسيانىڭ ماڭىزىن اتاپ ءوتىپ, جوبانىڭ ۇلتتىق دەڭگەيدە ىسكە اسىرىلۋىنا قولداۋ بىلدىرگەن سەرىكتەستەرگە العىسىن ءبىلدىردى.
– ەكى كۇندىك حالىقارالىق كونفەرەنتسيانىڭ ماڭىزى ەرەكشە. ويتكەنى شارا اياسىندا سپيكەرلەر تەك ءبىلىم بەرۋگە عانا ەمەس, تاربيە ۇدەرىسىنە, وقۋشىلاردىڭ الەۋمەتتىك جاعدايىنا قاتىستى ماسەلەلەردى تالقىلايدى. بيىلعى وقۋ جىلىنان باستاپ 80 اۋىلدىق مەكتەپپەن نازارباەۆ زياتكەرلىك مەكتەپتەرى تىعىز بايلانىس ورناتىپ جاتىر. بۇگىنگى ءىس-شارا سول جۇمىستاردىڭ جالعاسى, – دەدى ءا.جانعوزين.
ۇيىمداستىرۋشىلاردىڭ دەرەگىنشە, قازىر جوبا اياسىندا 2 400-گە جۋىق پەداگوگ بىلىكتىلىگىن ارتتىرعان. سونىڭ ناتيجەسىندە پەداگوگتەردىڭ كاسىبي سەنىم دەڭگەيى 15 پايىزعا وسكەن. ال تىرەك مەكتەپتەردەگى وقۋشىلاردىڭ ساباقتى مەڭگەرۋ كورسەتكىشى 38%-عا ارتقان.
– بۇگىنگى تاڭدا «قازاقستان حالقىنا» قورى ءبىلىم سالاسىندا 9 قايىرىمدىلىق جوبانى جۇزەگە اسىرىپ كەلەدى. قوردىڭ اتالعان سالاداعى جوبالارعا قولداۋ ءبىلدىرۋى – ساپالى ءبىلىم الۋ ءۇشىن جاعداي جاساۋدىڭ ۇلگىسى, بالالىق شاققا سالىنعان ينۆەستيتسيا. ءبىزدىڭ ويىمىزشا, تۇرعىلىقتى جەرىنە قاراماستان, ءار بالا وسىندا جانە قازىر ءبىلىم الۋ ءۇشىن تەڭ مۇمكىندىكتەرگە يە بولۋى كەرەك. ءبىلىم بەرۋدى تۇراقتى دامىتۋ قورى مەن «نازارباەۆ زياتكەرلىك مەكتەپتەرى» ۇيىمىمەن بىرلەسىپ ىسكە اسىرىلىپ جاتقان وسى جوبا – سونىڭ ايقىن دالەلى, – دەدى ءلاززات شىڭعىسباەۆا.
ايتا كەتەيىك, ەكى كۇنگە سوزىلعان كونفەرەنتسيادا مۇعالىمدەرگە ۇلىبريتانياداعى كەمبريدج ۋنيۆەرسيتەتىنىڭ قۇرمەتتى پروفەسسورى كولين ماكلافلين, قازاقستاننىڭ ەڭبەك سىڭىرگەن ۇستازى كۇلاش ءشامشيدينوۆا, نيدەرلاندتاعى حالىقارالىق مەكتەپتەر كەڭەسىنىڭ (CIS) اتقارۋشى ديرەكتورى دجەين لارسسون, ۇلىبريتانياداعى Anglian Learning Multi Academy Trust كومپانياسىنىڭ نەگىزىن قالاۋشى كەيت ەۆانس, ليتۆالىق پسيحياتر داريۋس رادكياۆيچيۋس جانە ءبىلىم بەرۋ سالاسىنىڭ وزگە دە تانىمال شەتەلدىك جانە وتاندىق ساراپشىلارى ءوز زەرتتەۋلەرى مەن باياندامالارىن ۇسىندى.
پەداگوگيكالىق جيىن بارىسىندا اۋىل مۇعالىمدەرى وتاندىق جانە شەتەلدىك اۆتورلاردىڭ كىتاپتارىمەن تانىستى. كەمبريدج ۋنيۆەرسيتەتىنىڭ قۇرمەتتى پروفەسسورلارى كولين ماكلافلين, ليز ۆينتەر جانە ناتاليا ياكوۆەتس رەداكتسيالاعان «Mapping Educational Change in Kazakhstan» كىتابى مەن ءدۇيشون شاماتوۆ پەن ايگەرىم الياسقاردىڭ «بىلىمگە قۇشتارلىق», سونداي-اق اعىلشىن تىلىندە جازىلعان تۇڭعىش قازاق رومانىنىڭ اۆتورى عابيت بەكاحمەتوۆتىڭ «Barsa Kelmes: The Nomads Return» تۋىندىسىنىڭ تانىستىرىلىمى ءوتتى.