شەكارالى ايماق – رايىمبەك اۋدانىنىڭ سۇمبە اۋىلىنىڭ جاستارىن شات-شادىمان ەتكەن ايتۋلى جاڭالىق – زاماناۋي سپورت كەشەنىنىڭ پايدالانۋعا بەرىلۋى. اۋىلدىڭ اجارىن اشىپ, تۇرعىندار كوڭىلىن كوپسىتكەن ەڭسەلى عيمارات 1 گەكتاردان استام اۋماقتى الىپ جاتىر.
اۋلاسىندا باسكەتبول جانە فۋتبول الاڭدارى, كولىكتەرگە ارنالعان تۇراق, ۆوركاۋت الاڭى ورنالاسقان. ال كەشەننىڭ ىشىندە 70 كورەرمەنگە ارنالعان سپورت, بوكس, فيتنەس, كۇرەس, ءتىپتى گيمناستيكا زالدارى بار. سونىمەن قاتار عيماراتتا مەديتسينالىق پۋنكتى, دارەتحانا, كيىم ىلگىشتىڭ بولۋى اۋىل جاستارىنىڭ, اسىرەسە سپورتقا اۋەس بالالاردىڭ قۋانىشىن ەسەلەدى. مۇندا ءبىر ۋاقىتتا 100-دەن استام جاس سپورتپەن شۇعىلدانا الادى. سپورت كەشەنىن جىلىتۋ ءۇشىن بلوكتىق-مودۋلدىك قازاندىق ورناتىلعان. قۇرىلىسقا 1 ملرد تەڭگەگە جۋىق قارجى جۇمسالعان.
الماتى وبلىسىنىڭ اكىمى مارات سۇلتانعازيەۆ تاۋلى اۋدانعا بارعان ءىسساپارىندا اۋىل تۇرعىندارىمەن جۇزدەسىپ, سۇمبە اۋىلدىق سپورت كەشەنىنىڭ اشىلۋ سالتاناتىنا قاتىستى.
«اۋىلدا سپورتقا قىزىعۋشى بالالاردىڭ كوپ بولعانى قۋانتادى. بۇل نىساننىڭ سالاماتتى ءومىر سالتىن حالىق اراسىندا دارىپتەۋدە ماڭىزى زور. جالپى, نارىنقول ءوڭىرىنىڭ جاستارى بەلسەندى ءارى تالانتتى. وسى سپورت كەشەنىنەن ەلىمىزدىڭ تۋىن كوككە كوتەرەتىن, ايبىندى جاستار تاربيەلەنىپ شىعادى دەپ ۇمىتتەنەمىز», دەدى ءوڭىر باسشىسى.
شەتكەرىدەگى سۇمبە اۋىلىنىڭ ينفراقۇرىلىمى اي وتكەن سايىن جاڭعىرىپ, جاندانىپ كەلەدى. بۇلاي دەۋىمىز نەگىزسىز ەمەس. وسى جىلدىڭ مامىر ايىندا اۋىلدا قۇنى جارتى ميلليونعا جۋىقتايتىن مادەنيەت ءۇيى اشىلسا, ەندى مىنە, الەۋمەتتىك نىسان قاتارى حالىقتىڭ يگىلىگىنە ارنالعان سپورت كەشەنىمەن تولىعىپ, جاستاردىڭ قۇلشىنىسى مەن قىزىعۋشىلىعىن ارتتىرىپ كەلەدى.
الماتى وبلىسى