رەسپۋبليكا كۇنى قارساڭىندا شىمكەنت قالالىق اكىمدىگىنىڭ, قازاقستان وزبەكتەرى «دۋستليك» قاۋىمداستىعىنىڭ, قالالىق ەتنومادەني بىرلەستىگىنىڭ ۇيىمداستىرۋىمەن «دوستىق داستارقانى» – شىمكەنت پالاۋى-2023» فەستيۆالى ءوتتى.
جىل سايىن شاھار تورىندە ۇيىمداستىرىلاتىن مەرەكەلىك ءىس-شارا بۇل جولى سايرام تۇرعىن الابىنداعى ناۋرىز پاركىندە بولدى. «دۋستليك» قاۋىمداستىعىنىڭ توراعاسى يكرامجان حاشيمجانوۆتىڭ ايتۋىنشا, فەستيۆالدى وتكىزۋدەگى ماقسات – رەسپۋبليكا كۇنىن مەرەكەلەۋ جانە بارلىق ەتنوستاردى ءبىر داستارقان باسىنا جيناپ, دوستىق پەن تاتۋلىقتى ناسيحاتتاۋ.
ۇيىمداستىرۋشىلار ۇيعارىمىمەن 43 ءتۇرلى پالاۋ باسىلىپ, قاتىسۋشىلار 7 اتالىم بويىنشا ماراپاتتالىپ, ەشكىم جۇلدەسىز قالمادى. ءىس-شارادا 100 كيلودان اسا پالاۋ ءپىسىرىلدى. 43 اسپاز وزدەرىنىڭ بار ونەرىن سالىپ, ءدامدى اس ءمازىرىن دايىندادى. فەستيۆالدە شىمكەنتتىڭ وزىنەن باسقا رەسپۋبليكا وڭىرلەرىنەن, كورشىلەس وزبەكستان, قىرعىزستان, تاجىكستاننان كەلگەن اسپازدار بولدى.
تاجىكستاندىق اسپاز يسماتۋللا راحيموۆ وسىنداي مەرەكەلىك ءىس-شاراعا قاتىسىپ جاتقانىنا قۋانىشتى ەكەنىن جەتكىزدى. «حالىقتار دوستىعى جاساي بەرسىن, بىرلىكتەرى جوعالماسىن» دەگەن تىلەك ارناپ, ەلىمىزدى رەسپۋبليكا كۇنىمەن قۇتتىقتادى. تاجىك حالقىندا پالاۋدى «وش» دەيدى ەكەن. ال ونىڭ دايىندالۋ ءادىسىنىڭ دە وزىندىك ەرەكشەلىكتەرى بار. پالاۋدان بولەك اسپاز باستاپ كەلگەن تاجىكستاندىق قوناقتار وزدەرىنىڭ ۇلتتىق تاعامى «قۇرىتاپتى» ازىرلەدى. ول پالاۋدان مۇلدەم وزگەشە. قازاقتىڭ كادىمگى قۇرتى, سارى ماي, نانىن قوسىپ جاسايدى. فەستيۆال بارىسىندا تاجىك باۋىرلار دايىنداعان پالاۋلارىنان كەلۋشىلەرگە ءدام اۋىز تيگىزدى.
ۇلكەن قازانعا باسىلعان پالاۋدان سايرام تۇرعىن الابىندا ورنالاسقان جەتىمدەر ۇيىنە تاماق تاراتىلدى. ەتنوسارالىق تاتۋلىقتى نىعايتۋعا ۇلەس قوسقان ءبىراز ازاماتتىڭ يىقتارىنا قازاقتىڭ داستۇرىمەن شاپان جابىلدى. سونىمەن بىرگە ەل پرەزيدەنتى, قازاقستان حالقى اسسامبلەياسىنىڭ توراعاسى قاسىم-جومارت توقاەۆتىڭ شەشىمىمەن بىرنەشە ادام «جومارت جان» مەدالىمەن, قۇرمەت گراموتاسىمەن, العىس حاتپەن ماراپاتتالدى. وسىنداي ماراپات يەسىنىڭ ءبىرى گەنەرال-مايور, ىشكى ىستەر ورگاندارىنىڭ ارداگەرى مولديار ورازاليەۆ: «قازاق-وزبەك حالىقتارىنىڭ دوستىعى ماڭگى جاساي بەرسىن, تاتۋلىق بولسا ەلدە تىنىشتىق بولادى. وسى اسىل قاسيەتىمىزدى جوعالتپايىق. بىرلىك بار جەردە ءاردايىم بەرەكە جۇرەدى. قازاق پەن وزبەك – باۋىرلاس ۇلت. قانشا عاسىردان بەرى تاتۋ-ءتاتتى بىرگە عۇمىر كەشىپ كەلەدى. سول تۋىسقان حالىقتاردىڭ اراسىنداعى دوستىق قارىم-قاتىناس ەشقاشان ۇزىلمەسىن», دەگەن تىلەگىن ارنادى.
ءىس-شارا بارىسىندا ونەرپازدار ساحنا تورىندە قازاق پەن وزبەك حالقىنىڭ اندەرىن شىرقاپ, كەلگەن قوناقتاردىڭ كوڭىلىن كوتەردى. مولىنان جايىلعان داستارقان ۇستىندە قاريالار ءسوز باستاپ, ساليقالى اڭگىمەنىڭ تيەگىن اعىتتى. پالاۋ فەستيۆالى – جىل سايىن وتەتىن ءداستۇرلى ءىس-شارا. شىمكەنتتە العاش رەت 2010 جىلى ۇيىمداستىرىلدى. سودان بەرى ۇزدىكسىز جالعاسىپ كەلەدى.
شىمكەنت