«كەزدەسسەڭ ۇرلانا قارايمىن, اساۋداي تۋلايدى جاس جۇرەك...», دەپ «جاس قالام» ءانىن شىرايىن كىرگىزىپ شىرقايتىن ارقانىڭ اياۋلى ءانشىسى سەيىل اياعانوۆتىڭ ورنى, وكىنىشكە قاراي, ويسىراپ تۇر. جاقىندا عانا سۇلۋ انگە ادالدىق تانىتىپ وتكەن ونەرپازدىڭ تۇرعان ۇيىنە ەسكەرتكىش تاقتا ورناتىلدى.
مەموريالدىق تاقتانىڭ اشىلۋ ءراسىمى مارقۇمنىڭ تۋعان كۇنىنە وراي ۇيىمداستىرىلدى. تاعىلىمدى ءىس-شارا باستالماس بۇرىن ءانشىنىڭ «جاس قالام», «تاڭ سامالى» اندەرىن جيىلعان جۇرت تەرەڭ تەبىرەنىسپەن تىڭدادى. اياۋلى ۇلىن ساعىنعان ەلدىڭ كوزىنە ەرىكسىز جاس ىركىلدى.
مەموريالدىق تاقتانى وبلىس اكىمىنىڭ ورىنباسارى باۋىرجان اسانوۆ, ۇلت رۋحانياتىنىڭ جاناشىرى, قازاقستاننىڭ ەڭبەك سىڭىرگەن قايراتكەرى, قاراعاندى وبلىسىنىڭ قۇرمەتتى ازاماتى رىمبالا وماربەكوۆا, سەيىل مارقۇمنىڭ دوسى, دارىندى ءانشى ەرلان تولەۋتاي, تۋعان باۋىرى, سازگەر شىڭعىس مۇقاەۆ اشتى. اكىمنىڭ ورىنباسارى ب.اسانوۆ ءسوز سويلەپ, حالقىنىڭ اياۋلى پەرزەنتى حاقىندا جىلى لەبىزىن جەتكىزدى. «سەيىل اياعان – عۇمىرىن انگە ارناعان شىن تالانت. ونىڭ ەسىمى, داۋىسى ەلىنىڭ جۇرەگىندە ساقتالارى ءسوزسىز. سىزدەردەي تىڭدارمانى باردا سەيىل ءانشى ولمەيدى. وسىنداي اسىل تۋعان ۇلدارعا قۇرمەت كورسەتۋ – ءبىزدىڭ پارىزىمىز. قازاق ءانىنىڭ ودان ءارى جاڭعىرۋىنا زور ۇلەس قوستى. ايانباي ەڭبەك ەتتى. سوڭىنا دەيىن انگە بەرگەن سەرتىنەن تايمادى», دەدى باۋىرجان قوڭىرباي ۇلى.
الماتىدان ارنايى كەلگەن ە.تولەۋتاي ءانشى باۋىرىنىڭ جىلى ءجۇزىن, سىرشىل جۇرەگىن ساعىنعانىن ايتىپ, كوزىنە جاس الدى. «سەيىل باۋىرىمنىڭ ەكىنشى عۇمىرى ۇزاق بولادى دەپ سەنەمىز. رۋحىنا كورسەتىلگەن قۇرمەت مۇنىمەن توقتامايدى دەپ ويلايمىن. كەلەشەكتە سەيىل ءانشىنى ەسكە الۋ كەشتەرى وتەدى دەپ كۇتەمىز. سونىمەن قاتار سەيىلگە قاراعاندىداعى جۇلدىزدار اللەياسىنان ورىن بەرۋ كەرەك دەگەن ۇسىنىس بىلدىرەمىن», دەدى ونەر جاناشىرى.
ءداستۇرلى ءاننىڭ ءدۇلد ۇلى جاقسىگەلدى كەمالوۆ تا ءانشى باۋىرىنا دەگەن ىستىق ساعىنىشىمەن ءبولىستى: «سەيىل ەكەۋمىزدىڭ تۋعان كۇنىمىز قاتار. ەكەۋمىز ءبىر-ءبىرىمىزدى كۇن قىردان كوتەرىلە بەرگەندە قۇتتىقتاپ وتىرۋشى ەدىك. بيىل باۋىرىم حابارلاسپادى. تەلەفونىم ءۇنسىز. وزەگىمە وكسىك تىعىلدى. قايران باۋىرىم-اي! وزگەنىڭ باقىتىنا بالاداي قۋاناتىن تازا جۇرەگى توقتادى. ءان دە كىمگە قونارىن بىلەدى عوي, شىركىن».
اقىن, قازاقستان جازۋشىلار وداعىنىڭ مۇشەسى قايرات اسقار انشىگە ارناعان ولەڭىن وقىپ بەردى. مادەني ءىس-شارا اياۋلى ءانشىنىڭ سوڭىندا قالعان شىراقشىسى قىمبات تۇسىپبەكوۆانىڭ وسىنداي يگىلىكتى شاراعا اتسالىسقان ازاماتتارعا ريزاشىلىق بىلدىرۋىمەن تۇيىندەلدى. وسىلايشا, سەيىل سەرى قاراعاندى جۇرتشىلىعىنا قارا تاقتادان قارادى. قارا تاقتاعا مويىن بۇرىپ ءسىز قاراساڭىز, ءانشىنىڭ جىلى ءجۇزى كوز الدىڭىزعا, قوڭىر ءۇنى قۇلاعىڭىزعا كەلەدى. «جۇلدىزدار اللەياسىندا جۇلدىزى جارقىراسا», دەگەن ەرلان تولەۋتايدىڭ ءسوزىن ءبىز دە قۋاتتايمىز.
قاراعاندى وبلىسى