بۇگىن ەلورداداعى دوستىق ۇيىندە «استانا قالاسى ءماسليحاتىنىڭ جۇمىسىن ۇيىمداستىرۋ جانە جەرگىلىكتى وكىلدى ورگانداردىڭ قىزمەتىن جەتىلدىرۋ تاجىريبەسى, مەملەكەت باسشىسى قاسىم-جومارت توقاەۆتىڭ جولداۋى اياسىندا رەفورمالاردى ىسكە اسىرۋ جونىندەگى زاڭناما ماسەلەسى» تاقىرىبى بويىنشا «قازاقستان ءماسليحاتتارى دەپۋتاتتارىنىڭ بىرلەستىگى» رقب ورتالىق كەڭەسىنىڭ وتىرىسى ءوتتى, دەپ حابارلايدى Egemen.kz.
باسقوسۋ بارىسىندا ءماسليحاتتاردىڭ قازىرگى كوكەيكەستى ماسەلەلەرى مەن سالالىق زاڭناماعا ەنگىزىلمەك تولىقتىرۋلار مەن وزگەرىستەر تالقىلانىپ, ورتاق ۇسىنىمدار مەن وريەنتيرلەر انىقتالدى. سونىمەن قاتار بىرنەشە پلەنارلىق سەسسيادا ماماندار ارنايى باياندامالار مەن دارىستەر وقىدى.
ءىس-شاراعا «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆ مودەراتورلىق ەتسە, استانا قالاسى ءماسليحاتىنىڭ توراعاسى ەرلان كاناليموۆ ەلوردالىق ءماسليحاتتىڭ جەرگىلىكتى مەملەكەتتىك باسقارۋدىڭ ءرولىن ارتتىرۋعا قاتىسۋ تاجىريبەسىمەن ءبولىستى.
«ەلىمىز جاڭا دا ادىلەتتى قازاقستان قۇرۋعا باتىل قادامدار جاساپ, جاڭا ساياسي-الەۋمەتتىك, ەكونوميكالىق جاعدايلار مەن سىن-تەگەۋرىندەرگە بايلانىستى ۇلتتىق يدەيا مەن يدەولوگيانى قايتا قۇرىلىمداپ جاتىر. تىپتەن, تيىمدىلىك تۇرعىسىندا جەرگىلىكتى ءوزىن-ءوزى باسقارۋ ماسەلەلەرىن شەشۋدىڭ جاڭا ادىستەمەسىنە كوشە باستادى. مەملەكەت باسشىسى جولداۋىندا ءماسليحاتتاردىڭ وزەكتى ماسەلەلەردى شەشىپ, ايماقتارداعى تۇرمىس ساپاسىن جاقسارتۋعا اسەر ەتە الاتىنىن باسا ايتتى. تىپتەن, «جەرگىلىكتى ءوزىن-ءوزى باسقارۋدىڭ مىقتى جۇيەسى ازاماتتاردىڭ ءوزى تۇراتىن جەردەگى تۇرمىس ساپاسىن جاقسارتۋعا تىكەلەي قاتىسۋىنا نەگىز بولاتىنىن ءتۇسىنۋىمىز كەرەك» دەپ اتاپ ءوتتى. بىزگە الەمدىك جوعارى دەڭگەيگە ءوتۋ كەرەك», دەيدى تولەۋبەك مۇقاشەۆ.
بۇل رەتتە قوستاناي وبلىسى ءماسليحاتىنىڭ توراعاسى سايلاۋبەك ەششانوۆ رەفەرەندۋمنىڭ قورىتىندىسى بويىنشا قازاقستاننىڭ ارالاس سايلاۋ جۇيەسىنە كوشۋىن رەتتەيتىن بىرقاتار زاڭدار قابىلدانىپ, ناتيجەسىندە ءماجىلىس پەن وبلىستىق ءماسليحاتتار دەپۋتاتتارىنىڭ ءبىر بولىگى جانە اۋداندىق ءماسليحاتتاردىڭ بارلىق دەپۋتاتتارىنىڭ ءبىر مانداتتى وكرۋگتەر بويىنشا سايلانعانىن اتاپ ءوتتى.
ء«بىر مانداتتى وكرۋگتەر بويىنشا دەپۋتاتتار, پارتيالىق تىزىمدەردەگى دەپۋتاتتار سياقتى سايلاۋ الدىنداعى ۇگىت كەزەڭىندە ايتىلعان سايلاۋشىلاردىڭ تالاپ-تىلەكتەرىن ورىنداۋ جونىندە بەلسەندى جۇمىس جۇرگىزۋدە. ەگەر وڭ تاجىريبە تۋرالى ايتاتىن بولساق, بيىل ءماسليحات دەپۋتاتتارى وبلىستىق دەنساۋلىق ساقتاۋ سالاسىندا جۇرگىزىلىپ جاتقان رەفورمالاردى ىسكە اسىرۋعا بارىنشا بەلسەندى قاتىستى. تۇپتەپ كەلگەندە, ءماسليحاتتار وڭىرلەردە پرەزيدەنت ساياساتىن جۇرگىزۋدىڭ باستى تىرەگى بولۋعا ءتيىس», دەدى ول.
ايتا كەتەيىك, جيىنعا قر پارلامەنت سەناتى مەن ءماجىلىس دەپۋتاتتارى, 20 ءوڭىر ءماسليحاتىنىڭ توراعالارى, قر ۇكىمەت مۇشەلەرى مەن ورتالىق مەملەكەتتىك ورگاندار باسشىلارى, باق جانە ازاماتتىق قوعام وكىلدەرى قاتىستى. اتاپ ايتقاندا, قر پارلامەنتى سەناتى دەپۋتاتى, قر پارلامەنتى سەناتىنىڭ كونستيتۋتسيالىق زاڭناما, سوت جۇيەسى جانە قۇقىقتىق قورعاۋ ورگاندارى كوميتەتىنىڭ توراعاسى نۇرلان بەكنازاروۆ, قر ۇلتتىق ەكونوميكا ۆيتسە-ءمينيسترى باۋىرجان وماربەكوۆ, مەملەكەتتىك جانە جەرگىلىكتى باسقارۋ ينستيتۋتىنىڭ رەكتورى ابىكەن توقتىبەكوۆ ءسوز الىپ, جيىن كورىگىن قىزدىردى. ولار نەگىزىنەن ەكى ماسەلە – بىرىنشىدەن, سالالىق «قازاقستان رەسپۋبليكاسىنداعى جەرگىلىكتى ءوزىن-ءوزى باسقارۋ تۋرالى» زاڭ جوباسىندا كورىنىس تابۋعا ءتيىس تولىقتىرۋلار مەن وزگەرىستەرمەن قاتار – ەكىنشىدەن, ءبىلىم بلوگى, ياعني ءماسليحات دەپۋتاتتارىن ۇزدىكسىز وقىتۋ تۇجىرىمداماسىنا باسىمدىق بەردى.
بۇدان بولەك «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆ پەن مادەنيەتتانۋشى-فيلوسوف, پوليتتەحنولوگ ابىلايحان قالنازاروۆتىڭ بىرلەسكەن اۆتورلىعىمەن شىققان ء«ماسليحات دەپۋتاتى قانداي بولۋى كەرەك؟» اتتى كىتاپتىڭ تۇساۋى كەسىلگەنىن ايتا كەتۋ كەرەك. وسىناۋ بىرەگەي ساياسي ادەبيەت, ابىلايحان قالنازاروۆتىڭ جەتكىزۋىنشە, ءماسليحاتتار جانە جالپى دەپۋتاتتار تاقىرىبىندا جارىق كورىپ وتىرعان تۇڭعىش كاسىبي كىتاپ.
وتىرىس سوڭى «قازاقستان ءماسليحاتتارى دەپۋتاتتارىنىڭ بىرلەستىگى» رقب ورتالىق كەڭەسى وتىرىسى قاۋلىسىنىڭ قابىلدانۋى مەن ءماسليحات توراعالارىنىڭ استانا قالالىق ءماسليحاتىنىڭ جۇمىس تاجىريبەسىمەن تانىسىپ, بىرنەشە نىسانداردى ارالاۋىنا ۇلاستى.
ءوز كەزەگىندە بۇل «قازاقستان ءماسليحاتتارى دەپۋتاتتارىنىڭ بىرلەستىگى» رقب مەن استانا قالاسى ءماسليحاتىنىڭ بىرلەسىپ ۇيىمداستىرعان كەزەكتى ءىس-شاراسى. كەلەر جىلدىڭ ناۋرىزىندا ەلىمىزدە جەرگىلىكتى وكىلدى ورگاندار رەتىندە ءماسليحاتتاردىڭ قۇرىلعانىنا 30 جىل تولادى. تاراپتار وسى باعىتتا دا قالا اۋماعىندا بىرقاتار جوبالاردى قولعا الۋدى جوسپارلاپ وتىر.