قىس – قىر استىندا. التى اي اق كورپە جامىلاتىن اسپانتاۋ ەلى ءۇشىن توننالاپ كومىر ءتۇسىرىپ, كۇل شىعارۋدىڭ ۋايىمى از ەمەس. قوڭىر كۇز ءتۇسىپ, اق قىراۋ تۇرعان كەزدەن باستاپ ءار ءۇيدىڭ مۇرجاسىنان كوك ءتۇتىن ورىلەتىن ولكەنىڭ قىسى ەرتە, جازى كەش كەلەتىنى بەلگىلى.
وسىعان وراي, «الداعى قىس ماۋسىمىنا ءوڭىر جۇرتشىلىعىنىڭ دايىندىعى قانداي؟» دەگەن ساۋالىمىزدى رايىمبەك اۋدانى اكىمىنىڭ ورىنباسارى عالىم جۋسانباەۆقا قويعان ەدىك. «رايىمبەك اۋدانىندا قىسقى جىلىتۋ ماۋسىمىنا دايىندىق شارالارى جۇيەلى جۇزەگە اسىرىلىپ جاتىر. الەۋمەتتىك نىساندار بار, جالپى سانى 7600 تۇتىننەن تۇراتىن اۋدان تۇرعىندارى ءبىر ماۋسىمدا 40 مىڭ تونناعا جۋىق كومىر جاعادى. تۇرعىندار تۇتىناتىن كومىر تۇتاستاي دەرلىك اۋدانىمىزداعى «ويقاراعاي» كومىر كەنىنەن تاسىمالدانادى. بۇگىنگى تاڭدا كەن ورنىندا كومىر باعاسى – تونناسىنا 8500 تەڭگە. اۋدان اۋماعىنداعى ەلدى مەكەندەرگە جول قاشىقتىعىنا بايلانىستى 14 پەن 17 مىڭ تەڭگە ارالىعىندا جەتكىزىلەدى. كەن ورنى جىلىنا 65-70 مىڭ توننا كومىر وندىرۋگە قاۋقارلى. سول سەبەپتى, كومىر تاپشىلىعى جوق. الەۋمەتتىك نىساندار مەن ءبىلىم وشاقتارى جىلىتۋ ماۋسىمىنا تولىقتاي دايىن», دەيدى اۋدان اكىمىنىڭ ورىنباسارى.
الماتى وبلىسى