اقتوبەدە ەستۋ مۇمكىندىگى شەكتەۋلى قىزدار اراسىندا «ساۋكەلەلى ارۋ –2023» سۇلۋلىق كونكۋرسى ءوتتى. وعان ەلىمىزدىڭ استانا, الماتى, اقتاۋ, اتىراۋ, ورال جانە اقتوبە قالالارى جانە تاتارستان, قىرعىزستاننان كەلگەن ون بەس بويجەتكەن قاتىستى. بايقاۋدىڭ باستى ماقساتى – قازاق حالقىنىڭ ۇلتتىق كيىمدەرىن, اسىرەسە ساۋكەلەنى ناسيحاتتاۋ بولاتىن.
بۇل – ەكىنشى جىل وتكىزىلىپ وتىرعان سايىس. بىلتىرعىعا قاراعاندا كاتىسۋشىلار قاتارى كوبىرەك بولعانىن اتاپ وتكەن ءجون. بايگە بارىسىندا ۇمىتكەرلەردىڭ سىرتقى سۇلۋلىعى عانا ەمەس, ۇلتىنىڭ سالت-ءداستۇرى, ادەت-عۇرپى, تاريحى مەن مادەنيەتى, ادەبيەتىن ءبىلۋى جانە جەكە ونەرىن كورسەتە الۋى جارىستىڭ نەگىزگى شارتىنا اينالدى. ارينە ەستۋ مۇمكىندىگى شەكتەۋلى بويجەتكەندەرگە وسىنداي قاتال سىننان ءوتۋ وڭاي ەمەس. سوعان قاراماستان ارۋلار الۋان ءتۇرلى ۇلگىدە اسا تالعاممەن تىگىلگەن ۇلتتىق كيىمدەرىمەن جانە تابيعي سۇلۋلىقتارىمەن قازىلار القاسىنىڭ نازارىن اۋداردى.
بايقاۋ قورىتىندىسى بويىنشا «ساۋكەلەلى ارۋ – 2023» جۇلدەسىنە اتىراۋلىق بويجەتكەن قاراكوز مۇرات لايىق دەپ تانىلدى. جۇلدەلى ءى ورىندى اقتوبەنىڭ بويجەتكەنى گۇلدەن ءۋايىسوۆا, ءىى ورىندى بىشكەك قالاسىنان كەلگەن ەلزيرا ميرلانقىزى, ءىىى ورىندى استانالىق ايزادا جاۋعاشتينا يەلەندى. بۇل جولى اقتوبەگە بايقاۋعا كەلگەن قىزداردىڭ ەشقايسىسى قۇر كەتكەن جوق. ۇيىمداستىرۋشىلار قاتىسقانداردىڭ بارلىعىنا ارنايى سىي تاعايىندادى. ايتا كەتۋ كەرەك, ءساندى ساۋكەلەمەن قوسا تال بويلارىنا جاراسقان ۇلتتىق كيىمدەردىڭ ۇلگىسىن قىزدار وزدەرى تىككەن.
اقتوبە