الماتى وبلىسىنا ىسساپارمەن كەلگەن وقۋ-اعارتۋ ءمينيسترى عاني بەيسەمباەۆ ءبىلىم سالاسىنداعى وزەكتى ماسەلەلەردى ارقاۋ ەتكەن القالى جيىن وتكىزدى. وبلىستىق اكىمدىك عيماراتىندا ەڭ الدىمەن دەپۋتاتتارمەن كەزدەسىپ, ءوڭىردىڭ ءبىلىم بەرۋ ىسىنە قاتىستى بىرقاتار ماسەلەسىنىڭ جىگىن اشتى.
وبلىس اكىمىنىڭ ءبىرىنشى ورىنباسارى نۇرلان ءابدىراحىم الماتى وبلىسىنىڭ ءبىلىم ساپاسىن ارتتىرۋدىڭ 2023-2029 جىلدارعا ارنالعان ايماقتىق جول كارتاسى بەكىتىلگەنىن, سوعان سايكەس جان-جاقتى جۇمىستار جۇرگىزىلىپ جاتقانىن تىلگە تيەك ەتتى. ۆەدومستۆو باسشىسىمەن وتكەن كەزدەسۋدە دەپۋتاتتار وتكىر دە وزەكتى ماسەلەلەردى العا تارتتى. وندا كەيبىر اسحانالاردىڭ تالاپقا ساي ەمەستىگى, تاماقتاندىرۋدى ۇيىمداستىرۋداعى كەمشىلىكتەر, وقۋشىلار تاسىمالىنداعى جۇرگىزۋشىلەر جالاقىسىنىڭ ماردىمسىزدىعى, سپورتزال, ءپان كابينەتتەرىنىڭ جەتىسپەۋشىلىگى مەن جابدىقتالۋىنداعى ولقىلىقتار, مەكتەپتەردەگى مەيىربيكە تاپشىلىعى سىندى بىرقاتار ماسەلەنى ورتاعا سالدى.
– ءبىزدىڭ مىندەتىمىز – وسكەلەڭ ۇرپاقتى قاۋىپسىز جانە جايلى ورتادا جان-جاقتى دامىتۋدى قامتاماسىز ەتۋ. مينيسترلىك نەگىزگى ماسەلەلەردى شەشۋدە جەرگىلىكتى اتقارۋشى ورگاندى قولداۋعا دايىن. ءبىلىم بەرۋ ينفراقۇرىلىمىن دامىتۋمەن قاتار, وقىتۋ ساپاسىن ارتتىرىپ, تاربيە جۇمىستارىن كۇشەيتۋگە, سونداي-اق ءبىلىم بەرۋ ۇيىمدارىن بىلىكتىلىگى جوعارى كادرلارمەن قامتاماسىز ەتۋگە ەرەكشە كوڭىل بولىنەدى, – دەگەن عاني بەكتاي ۇلى دەپۋتاتتار ساۋالىنىڭ اياقسىز قالمايتىنىن, ماسەلەلەردىڭ وڭ شەشىم تابۋى نازارعا الىناتىنىن ايتتى. سونداي-اق ۆەدومستۆو باسشىسى بالالاردى وقىتۋ مەن تاربيەلەۋدە وتباسى مەن مەكتەپتىڭ ءوزارا بايلانىسىن نىعايتۋ, ءپوزيتيۆتى اتا-انا مادەنيەتىن دامىتۋ, ەڭ باستىسى, بالانىڭ ەسەبىنەن بيزنەس جاساۋعا بولمايتىنىن ايرىقشا اتادى.
بۇدان كەيىن وقۋ-اعارتۋ ءمينيسترى مەكتەپ پارلامەنتىنىڭ كوشباسشىلارىمەن كەزدەستى. ولاردىڭ قاتارىندا دجيۋ-دجيتسۋدان 7 دۇركىن الەم چەمپيونى جىبەك قۇلىمبەتوۆا, «سلاۆيان بازارى-2023» جەڭىمپازى شەرحان ارىستان, حالىقارالىق جانە رەسپۋبليكالىق وليمپيادالاردىڭ جۇلدەگەرلەرى بولدى. كەزدەسۋ بارىسىندا وقۋشىلار مينيسترگە وزدەرىن تولعاندىراتىن سۇراقتارىن قويىپ, جەتىستىكتەرى جانە بولاشاق ماقساتتارى تۋرالى ايتىپ بەردى. وقۋ-اعارتۋ ءمينيسترى وقۋشىلاردى جاقسى وقۋمەن قاتار, تاباندىلىققا, ماقساتشىلدىققا شاقىردى. جىبەرىلگەن قاتەلىكتەن قورىقپاۋعا, كەرىسىنشە ودان ساباق الىپ, قايتالاماۋ قاجەتتىگىن قۇلاعدار ەتتى. اراداعى ەمەن-جارقىن ديالوگتەن سوڭ شەرحان ارىستان «مولدابايدىڭ ءانىن» اۋەلەتسە, مينيستر دە قولىنا دومبىرا الىپ, بالالارمەن بىرگە «انا تۋرالى» ءاندى شىرقادى.
ەسكە سالا كەتەيىك, قۇقىق پەن ءتارتىپ, اقپارات, سپورت جانە سالاماتتى ءومىر سالتى, ءوزىن-ءوزى تانۋ جانە باقىت (پسيحولوگيا), قامقورلىق (ەرىكتىلەر), مادەنيەت جانە ونەر (مۋزىكالىق, كوركەم شىعارماشىلىق), پىكىرتالاس قوزعالىسى, ەكولوگيا جانە ەڭبەك سىندى 8 فراكتسيادان تۇراتىن مەكتەپ پارلامەنتى – وقۋشىلاردىڭ ءبىلىم بەرۋ ۇيىمىنىڭ ءوزىن-ءوزى باسقارۋىنا, وقۋ-تاربيە ۇدەرىسىن ۇيىمداستىرۋ كەزىندە تۋىنداعان ماسەلەلەردى شەشۋگە مۇمكىندىك بەرەدى. وبلىس بويىنشا 34 مىڭ وقۋشى قامتىلعان 434 مەكتەپ پارلامەنتى جۇمىس ىستەيدى.
ساپاردا عاني بەيسەمباەۆ ءوڭىر تۇرعىندارىمەن, ۇستازدارمەن دە كەزدەستى. وبلىستىق ءبىلىم باسقارماسىنىڭ باسشىسى سالتانات بەسپاەۆا بايانداما جاساپ, ءبىلىم سالاسىنىڭ دامۋىنا جان-جاقتى قولداۋ بارىن اتادى. بيىل ءبىلىم سالاسىنىڭ بيۋدجەتى 323,1 ملرد تەڭگەنى قۇراپ, وتكەن جىلمەن سالىستىرعاندا 42,5 ملرد تەڭگەگە ارتىپ وتىرعانىن مىسال ەتتى. سونىمەن قاتار نەگىزگى بايانداماشى وڭىردەگى ءۇش اۋىسىمدى مەكتەپتەر ماسەلەسىن جويۋ جولىنداعى جوسپارلاردى تارقاتتى. «مەملەكەت باسشىسىنىڭ باستاماسىمەن قابىلدانعان «جايلى مەكتەپ» ۇلتتىق جوباسى اياسىندا 53 مەكتەپ سالۋ جوسپارلانعان. بيىل 26 مەكتەپتىڭ قۇرىلىسى باستالدى. الداعى جىلى 27 مەكتەپتىڭ ىرگەسى قالانادى. وسىلايشا, وڭىردە ءۇش اۋىسىمدى وقىتۋ مەن وقۋشى ورنىنىڭ تاپشىلىعىن تولىق شەشۋ كوزدەلىپ وتىر», دەدى باسقارما باسشىسى.
باسقوسۋدا وبلىستىق ءبىلىم سالاسىنىڭ ارداگەرلەرى مەن كوللەدج, دەپارتامەنت باسشىلارىنىڭ ۇسىنىس-تىلەكتەرى تىڭدالدى. كەزدەسۋ بارىسىندا مينيستر ساپالى ءبىلىم بەرۋ مەن تاربيەنىڭ تىزگىنىن تەڭ ۇستاۋ قاجەتتىگىنە نازار اۋدارتتى. وعان ءوڭىردىڭ اقساقالدار القاسىنىڭ قوسار ۇلەسى زور بولماق. سونداي-اق پەداگوگتەردىڭ كاسىبي دامۋى جانە بىلىكتىلىك تەستىلەۋىن وتكىزۋ ەرەجەلەرى ءسوز بولدى.
– مەملەكەت باسشىسىنىڭ تىكەلەي قولداۋىمەن 2019 جىلى پەداگوگ ماماندىعىنىڭ مارتەبەسى بەكىتىلدى. مۇعالىمدەردىڭ جالاقىسى كوتەرىلىپ, جۇمىس جاعدايى جاقساردى. ارتىق فۋنكتسيالاردان بوساتىلىپ, كاسىبي دامۋ مۇمكىندىكتەرى قاراستىرىلدى. مينيسترلىك اتتەستاتتاۋ جۇيەسىن جەتىلدىرىپ جاتىر. ءبىز ءبىلىم بەرۋ جۇيەسىن ۇزدىكسىز دامىتۋ ءۇشىن بار جاعدايدى جاساۋىمىز كەرەك. ءار مۇعالىمنىڭ ەڭبەگى وقۋشىنىڭ جەتىستىكتەرىمەن باعالانۋى كەرەك دەپ ەسەپتەيمىز. ول ءۇشىن ۇلتتىق پلاتفورما بازاسىندا مۇعالىمدەردى اتتەستاتتاۋ ۇدەرىسىن اۆتوماتتاندىرۋ جۇمىستارى جۇرگىزىلىپ جاتىر. ول وبەكتيۆتى جانە اشىق بولۋعا ءتيىس, – دەدى ع.بەيسەمباەۆ.
ايتا كەتەيىك, الماتى وبلىسىندا 33 مىڭعا جۋىق پەداگوگ جۇمىس ىستەيدى.
مينيستر بۇعان دەيىن بۇقارالىق اقپارات قۇرالدارىندا تالقىلانعان رەزونانستىق ماسەلەلەرگە توقتالىپ, ونداي فاكتىلەرگە جول بەرمەي, وبلىستىڭ بارلىق اۋدانىندا اقپاراتتىق-ءتۇسىندىرۋ جۇمىستارىن كۇشەيتۋ جونىندە تاپسىرما بەردى. سونىمەن قاتار قىركۇيەك ايىنان باستاپ مينيسترلىك 2023-2025 جىلدارعا ارنالعان ءبىرتۇتاس تاربيە باعدارلاماسىن قابىلداعاندىعىن ەسكە سالىپ, ونىڭ ەرەكشەلىكتەرىنە توقتالدى. ساپار سوڭىندا سالا باسشىسى وسكەلەڭ ۇرپاقتىڭ ءبىلىمى مەن ءتالىم-تاربيەسىنە جاۋاپتى ۇستازدارعا زور سەنىم ارتىپ, ەڭبەكتەرىنە ساتتىلىك تىلەدى.
الماتى وبلىسى