الدا كەلە جاتقان رەسپۋبليكا كۇنىنە وراي, قوستانايداعى «قوناي» شاعىن اۋدانىندا كوپقاباتتى تۇرعىن ءۇي پايدالانۋعا بەرىلدى. «نۇرلى جەر» مەملەكەتتىك باعدارلاماسى اياسىندا بوي كوتەرگەن جاڭا ۇيگە باسپانا كەزەگىندە تۇرعان كوپبالالى وتباسىلار, مۇمكىندىگى شەكتەۋلى جاندار مەن كامەلەت جاسىنا تولعان جەتىم بالالار قونىستاندى. ەڭسەلى ءۇيدىڭ اۋلاسىندا وتكەن قونىس قۋانىشىنا قالا اكىمى مارات جۇندىباەۆ قاتىسىپ, باسپانالى بولعان وتباسىلارعا پاتەر كىلتتەرىن تابىس ەتتى.
بىرنەشە جىل بۇرىن قالا شەتىندەگى تاقىر جەرگە سالىنا باستاعان تۇرعىن ۇيلەردىڭ بۇگىندە قاتارى كوبەيىپ, ەندى ەڭسە تىكتەپ كەلە جاتقان جاڭا شاعىن اۋدانعا اينالعان. قازىر مۇندا 33 كوپقاباتتى تۇرعىن ءۇي بار. جەلتوقسان ايىندا 900 وقۋشىعا ارنالعان مەكتەپ قۇرىلىسى اياقتالىپ قالۋعا ءتيىس. مەكتەپتىڭ جانىنان 75 ورىندىق بالالار شاعىن ورتالىعى سالىنىپ جاتىر. 2024 جىلى «جايلى مەكتەپ» ۇلتتىق جوباسى اياسىندا 600 ورىندىق تاعى ءبىر مەكتەپتىڭ قۇرىلىسى باستالادى.
تۇرعىندار جاڭا قونىستانعان 83-كۆارتالداعى №1 ۇيگە بەينەباقىلاۋ قۇرىلعىسى, دوموفون, مۇمكىندىگى شەكتەۋلى جانداردىڭ كىرىپ-شىعۋىنا ىڭعايلى ارنايى پاندۋس ورناتىلعان. اۋلادا بالالار الاڭى, سپورت الاڭى, كەڭ اۆتوتۇراعى بار.
ماشمانوۆتار وتباسى بۇعان دەيىن بەس بالاسىمەن قالا ىرگەسىنە ورنالاسقان ساياجايداعى قۋىقتاي ءبىر بولمەلى ءۇيدى پانالاپ كەلىپتى. كوپتەن كۇتكەن ارمانى ورىندالعان كوپبالالى انا كوزىندەگى قۋانىش جاسىن جاسىرا المادى.
– قوستانايعا 2015 جىلى كوشىپ كەلدىك. ءۇي كەزەگىنە وسىدان ءۇش جىل بۇرىن تۇرعانبىز. بۇلايشا تەز الامىز-اۋ دەپ ويلاماپپىن. بۇگىندە ەلىمىزدە مەن سياقتى كوپبالالى انالارعا ۇلكەن قولداۋ جاسالىپ جاتىر عوي. سونىڭ ءبارىن سەزىنىپ جاتىرمىز. بەس بالام بار, ۇلكەنى – 11 جاستا, كەنجەم – ۇشتە. كوپبالالى انا رەتىندە كىشكەنتايلارىمنىڭ كەرەگىنە جۇمسايتىن جاردەماقى الىپ تۇرامىن. وبلىس باسشىلارىنا العىسىم شەكسىز, ەشقاشان جاماندىق كورمەسىن. بۇگىنگى قۋانىشىمىز بارشاعا جۇعىستى بولسىن, – دەيدى بەس بالدىرعاننىڭ اناسى ايگۇل ماشمانوۆا.
قونىس قۋانىشىنا جينالعانداردىڭ ىشىندە پاتەر يەلەرىنىڭ اتا-اناسى, جاقىن تۋىستارى, ارىپتەس جولداستارى دا ءجۇردى. بالاسى باسپانالى بولىپ جاتقان زەينەتكەر كۇلجان كۇمىسبەكوۆا كوپشىلىك الدىندا وبلىس باسشىلارى مەن قۇرىلىسشىلارعا العىسىن جاۋدىرىپ, قونىستانۋشىلارعا كول-كوسىر ىزگى تىلەگىن ارنادى.
– ون التى نەمەرەم بار. بۇگىن پاتەر الىپ جاتقان تورتاي – ۇلىم, اراي – كەلىنىم, ەكەۋىنەن بەس نەمەرە ءسۇيىپ وتىرمىن. ەندى, مىنە, رەسپۋبليكا كۇنى مەرەكەسىنە وراي, بالالارىم باسپانالى بولىپ, سوعان توبەمىز كوككە جەتكەندەي قۋانىپ جاتىرمىز. ون جىلدان بەرى بىرەۋدىڭ بوساعاسىن جالداپ تۇردى. بۇگىن, مىنە, اق تۇيەنىڭ قارنى جارىلىپ, تىلەگىم ورىندالدى. قاراپايىم حالىققا وسىنداي كەرەمەت ءۇي سالىپ بەرىپ, قاراسىپ, قامقورلىق جاساپ جاتقان جاناشىر مەملەكەتىمىزدىڭ قۋاتى ارتىپ, دامىپ, نىعايا بەرسىن! اللا تاعالا بىرلىك اتتى التىن بەلدىگىمىزدەن, ىنتىماق اتتى ەلدىگىمىزدەن ايىرماسىن! الدا كەلە جاتقان ۇلكەن مەرەكەمىز – رەسپۋبليكا كۇنى قۇتتى بولسىن! ەش جاماندىق بولماسىن! زامان تىنىش بولسىن! – دەيدى باتاگوي اجەي.
ءبىرىنشى توپتاعى مۇگەدەك, جەتىم وسكەن رۋسلان قوناقباەۆتىڭ پاتەر كەزەگىندە تۇرعانىنا باقانداي 14 جىل بولىپتى. بۇعان دەيىن مەملەكەت ۋاقىتشا دەپ بەرگەن ءبىر بولمەنى پانالاپ كەلگەن رۋسلان بۇگىن كوپپەن بىرگە جاڭا ءۇيدىڭ ءبىرىنشى قاباتىنان ءبىر بولمەلى پاتەر الدى.
– كوپبالالى انالارعا قاراعاندا, جەتىمدەرگە كەزەككە تۇرىپ پاتەر الۋ قيىن. سوندىقتان بۇگىن ءوز پاتەرىمنىڭ كىلتى قولىما ءتيىپ, قۋانىشىم قوينىما سىيماي تۇر. پرەزيدەنتىمىز ءالجۋاز الەۋمەتتىك توپتاردى باسپانامەن قامتۋ, مەملەكەتتىڭ قامقورلىعىنا الۋ ماسەلەسىن ۇنەمى قاداپ ايتىپ, ءتيىستى ورىندارعا مىندەتتەپ وتىرادى. بۇگىنگى قۋانىش, ءبىر جاعىنان, وسىنداي مەملەكەتتىك تۇرعىدان جاسالىپ جاتقان جاناشىرلىقتىڭ ناتيجەسى دەپ بىلەمىن. تەڭدىك پەن ادىلەت ۇستەمدىك قۇرعان ىزگى قوعامنىڭ قامقورلىعىن سەزىنگەندەي ۇلكەن ءبىر تولقىنىستا تۇرمىن, – دەيدى رۋسلان.
قالا اكىمىنىڭ ايتۋىنشا, قوستانايدا بيىل ءتورت جالدامالى تۇرعىن ءۇي پايدالانۋعا بەرىلەدى.
– جىل باسىندا «اۋەجاي» شاعىن اۋدانىندا ءبىر ءۇيدى ەل يگىلىگىنە وتكىزىپ بەردىك. ەكىنشىسى – بۇگىن, مىنە, وزدەرىڭىز كىرىپ جاتقان ءۇي. 24 قازاندا «يۋبيلەينىي» شاعىن اۋدانىندا تاعى ءبىر ءۇي پايدالانۋعا بەرىلەدى. ال جىل سوڭىنا قاراي «اەروپورت» شاعىن اۋدانىنداعى كوپقاباتتى ءۇيدىڭ تۇرعىندارىنا پاتەر كىلتىن تاپسىرامىز. بۇل ءتورت ۇيگە باس-اياعى 370 وتباسى قونىستانادى. ولاردىڭ 200-دەن استامى – كوپبالالى انالار, مۇمكىندىگى شەكتەۋلى جاندار مەن جەتىمدەر. قونايدا كەلەسى جىلى كوپقاباتتى تاعى 10 ءۇي تۇرعىزۋ جوسپارلانىپ وتىر. سونداي-اق ەكى مەكتەپ, ءبىر بالاباقشا جۇمىس ىستەيدى. دارىگەرلىك امبۋلاتوريا, ەمحانا سالىنادى. جالپى العاندا, «قوناي» شاعىن اۋدانى الداعى بەس-التى جىل ىشىندە 400 گەكتار اۋماقتى قامتىعان 80 مىڭ تۇرعىنى بار ىرگەلى ەلدى مەكەنگە اينالماق. كەيىنگى ءبىر-ەكى جىلدىڭ ىشىندە جاڭا شاعىن اۋدانعا جول سالىنىپ, قازىر قوعامدىق كولىكتەر قاتىنايتىن بولدى. كوشەلەرگە جارىق ورناتىلىپ جاتىر. جىل سوڭىنا دەيىن گاز قۇبىرىن تارتۋ جۇمىستارى تولىق اياقتالىپ, ءار ۇيگە كوگىلدىر وتىن كىرەدى. مۇنىڭ سىرتىندا, بيىل «قونايدا» 1 500 ءتۇپ اعاش كوشەتى وتىرعىزىلادى. بارشاڭىزدى شىن جۇرەكتەن قۇتتىقتايمىن! وتباسىلارىڭىزعا اماندىق, باقىت, تابىس تىلەيمىن! ەلىمىز امان, جۇرتىمىز تىنىش بولسىن! قونىسقا قونىس قوسىلا بەرسىن! – دەدى مارات جۇندىباەۆ.
سالتاناتتى ءىس-شارادان كەيىن بىرنەشە پاتەرگە كىرىپ شىققان قالا اكىمى تۇرعىندارمەن بىرگە جاڭا ءۇيدىڭ اۋلاسىنا شىرشا كوشەتتەرىن وتىرعىزدى.
قوستاناي وبلىسى