ءشوپ باعاسى كۇننەن-كۇنگە شارىقتاپ بارادى. قاراڭىز, وڭىردە ءبىر تۇك جوڭىشقانىڭ باعاسى 1800 تەڭگە بولسا, ءبىر ورام جوڭىشقانىڭ قۇنى – 13-15 مىڭ.
شوپپەن اينالىساتىن شارۋالار جاڭبىردىڭ از جاۋعانىن العا تارتىپ, قىمباتشىلىققا سەبەپ ايتۋدا. ال كەيبىر ەلدى مەكەندە شوپكە شالعى وتە كەش ءتيدى. بۇرىندارى شىلدەنىڭ باسىندا-اق ەكىنشى ورامدى باستاپ كەتەتىن شارۋالار, مىنە, كۇز ورتاسىنا كەلگەندە عانا ءۇشىنشى ورامعا دايىندالىپ جاتىر. وسىدان-اق جەمشوپتىڭ قىستا تاپشى بولارىن باعامداي بەرۋگە بولادى. ماسەلەن, سارقان اۋدانىنا قاراستى قارابوگەت اۋىلىنىڭ فەرمەرلەرى جازدىڭ اپتاپ ىستىعىنان كوتەرىلە الماعان شابىندىقتىڭ ەسەسىن ەگىستىك القابىنان الۋدى ويلاپ وتىر. سول سەبەپتى اۋداندا مايبۇرشاق پەن ارپا ساباندارىن وراپ, تۇكتەۋدە.
ماسەلەن, قازىر ءبىر تۇك جوڭىشقا 1500-1800 ارالىعىندا بولسا, ايدىڭ اياعى 2 مىڭ تەڭگەگە تاپپايسىز. ءتىپتى قامىس ءشوپتىڭ دە باعاسى ۇشىپ بارادى. ال بىلتىر جۇگەرىنىڭ باعاسى سۋلىلىعىنا قاراي كگ 80-90 تەڭگەدەن, بيىل دا سول شامالاس. ال بيدايدىڭ باعاسى شارۋالارعا ءتىپتى قولايسىز بولىپ تۇر.
جەتىسۋ وبلىستىق اۋىل شارۋاشىلىعى باسقارماسىنىڭ بىزگە بەرگەن اقپاراتتارىنا سۇيەنسەك, 2023 – 2024 جىلعى قىسقى ناۋقانعا مال ازىعىنىڭ قوسىمشا قورى ەسكەرىلىپ, اۋدان جانە قالا اكىمدىكتەرىنە 2 205,5 مىڭ توننا مال ازىعىن دايىندالىپ جاتىر. ونىڭ ىشىندە ءشوپ – 1 236,7 مىڭ توننا, پىشىندەمە – 116,7 مىڭ توننا, سۇرلەم – 203,4 مىڭ توننا, سابان – 184,7 مىڭ توننا, جەم 241,9 مىڭ توننا قاجەت. قازىرگى تاڭدا اتالعان تاپسىرمانىڭ ورىندالۋى اۋدان جانە قالا اكىمدىكتەرىنىڭ اقپاراتتارىنا سايكەس قاجەتتىلىكتىڭ 88,5 پايىزى نەمەسە 1 953,5 مىڭ توننا مال ازىعى جينالعان. اتاپ ايتساق, اقسۋدا – 220,0 مىڭ توننا, الاكولدە – 183,3 مىڭ توننا, ەسكەلدىدە – 96,4 مىڭ توننا, قاراتالدا – 89,0 مىڭ توننا, كەربۇلاقتا – 167,5 مىڭ توننا, كوكسۋدا – 112,5 مىڭ توننا, پانفيلوۆتا – 203,4 مىڭ توننا, سارقاندا – 130,0 مىڭ توننا, تالدىقورعاندا – 25,2 مىڭ توننا, تەكەلىدە 7,1 مىڭ توننا مال ازىعى بار. ارينە, بۇل وتە از. از دەيتىن سەبەبىمىز, بيىل مال قىستاتۋ ناۋقانىنا ازىقتىڭ قاجەتتىلىگى 3 ملن تونناعا دەيىن بارۋى مۇمكىن. سەبەبى قىستىڭ بىلتىرعىداي مىنەز كورسەتۋى عاجاپ ەمەس. قازىر جەمشوپ دايىنداۋ جالعاسۋدا جانە تۇراقتى باقىلاۋدا. ءدال قازىر وڭىردە شامامەن 559,6 مىڭ ءىرى قارا, 1 769,5 مىڭ ۇساق مال, 189,8 مىڭ جىلقى بار.