ل.تولستوي اتىنداعى وبلىستىق كىتاپحانادا «ۇلتتىق ۆاليۋتا – قازاقستان تاۋەلسىزدىگىنىڭ بەلگىسى» اتتى كىتاپ كورمەسى اشىلدى. قازاق تەڭگەسىنىڭ ارعى-بەرگى تاريحى مەن تاۋەلسىز قازاقستانداعى اقشا قاتىناسىنىڭ قالىپتاسۋى, سونداي-اق ەلىمىزدىڭ ەكونوميكالىق دامۋى جونىندەگى 100-گە جۋىق عىلىمي-تانىمدىق ەڭبەكتەر كورىنىس تاپقان كورمەنىڭ اشىلۋ راسىمىنە جەرگىلىكتى عالىم-ۇستازدار, ستۋدەنتتەر مەن وقۋشىلار, بانك سالاسىنىڭ وكىلدەرى, اسكەريلەر قاتىستى.
ءتول تەڭگەمىزدىڭ 30 جىلدىعىنا وراي ۇيىمداستىرىلعان كورمە ءتورت بولىمنەن تۇرادى. «اقشا تاريحى – حالىق تاريحى» دەپ اتالاتىن العاشقى بولىمگە قويىلعان كىتاپتار قازاق تەڭگەسىنىڭ ىقىلىم زاماندارداعى تاريحىن, ۇلى جىبەك جولىندا جاتقان وتىرار قالاسى سياقتى ءىرى ساۋدا ورتالىقتارىنداعى اقشا قاتىناسى تۋرالى باياندايدى.
ال «تەڭگە – ەلدىكتىڭ ەرەكشە بەلگىسى» اتتى بولىمدە تەڭگە اۆتورلارى مەن ۇلتتىق ۆاليۋتانىڭ قالىپتاسىپ, دامۋىن باياندايتىن ىرگەلى ەڭبەكتەرمەن قاتار, كۇندەلىكتى بۇقارالىق باسىلىمداردا جاريالانعان تانىمدىق ماقالالاردىڭ قيىندىلارى قويىلعان. بۇل بولىمدەگى ەڭبەكتەردىڭ ىشىندە تەڭگە ءديزاينىن جاساپ شىققان اۆتورلاردىڭ ءبىرى, سۋرەتشى حايروللا عابجالەلوۆتىڭ «تەڭگە» كىتابىنا قىزىعۋشىلىق تانىتقاندار كوپ بولدى.
سالتاناتتى راسىمگە ارنايى كەلگەن ۇلتتىق بانك فيليالىنىڭ وكىلدەرى كوپشىلىككە مەرەيتويلىق جانە ەسكەرتكىش مونەتالار جيىنتىعىن كورسەتىپ, ءار مونەتانىڭ شىعۋ تاريحىن اڭگىمەلەدى.
كىتاپحاناشى ءشاريپا دوسجانوۆانىڭ ايتۋىنشا, «قازاقستان ەكونوميكاسى: كەشە جانە بۇگىن» دەپ اتالاتىن ءتورتىنشى بولىمدە ەلىمىزدەگى ەكونوميكالىق رەفورمالار مەن نارىقتىق قاتىناستاردىڭ قالىپتاسىپ, دامۋى جونىندەگى عىلىمي ەڭبەكتەر قويىلعان. كوپشىلىك وقىرمان زالىنا قويىلعان كورمە جىل سوڭىنا دەيىن جۇمىس ىستەيدى.
قوستاناي وبلىسى